سبق: ملمع
پیراگراف نمبر9
✍ اقتباس:
وہ ہرپھرکر بلامقصد ہی درجوں ۔۔۔۔۔۔۔ قلی باہر متعجب سا کھڑا تھا۔
✍ حوالۂ متن:
سبق کا عنوان: ملمع
مصنفہ کا نام: ہاجرہ مسرور
صنف: افسانہ
ماخذ: سب افسانے میرے
✍ خط کشیدہ الفاظ کے معانی:
ہرپھر کر ۔۔۔۔ گھوم پھر کر۔ بلامقصد ۔۔۔۔ بغیر کسی مطلب کے۔
درجے ۔۔۔۔ حصے، اول دوم اور سوم کی ترتیب۔ عبارت ۔۔۔۔ متن۔
فرسٹ ۔۔۔۔ پہلا درجہ۔ سیکنڈ ۔۔۔۔ دوسرا درجہ۔
انٹر ۔۔۔۔ اوسط، درمیانہ درجہ۔ دفعتاً ۔۔۔۔ ایک دم ، اچانک۔
موسلادھار ۔۔۔۔ لگاتار ، مسلسل۔ گھنا ۔۔۔۔ سایہ دار۔
سایہ ۔۔۔۔ چھاؤں۔ بلا سوچے سمجھے ۔۔۔۔ بغیر کسی سوچ بچار اور فکر کے
متعجب ۔۔۔۔ حیران ہوکر۔
✍ سیاق و سباق:
تشریح طلب اقتباس درسی سبق " ملمع" کے درمیان سے اخذ کیا گیا ہے۔ اس کا سیاق و سباق یہ ہے کہ ایک لڑکی اپنے بیمار چچا کی عیادت کی غرض سے سفر کرنے کےلیے ریلوے سٹیشن پر موجود تھی۔ جہاں اس کا سامنا کسی امیر زادے سے ہو گیا۔ لڑکی اس سے متاثر ہوکر اس سے اپنی غربت زدہ اصلیت کو چھپاناچاہ رہی تھی۔ریل گاڑی کے ڈبے پر سوار ہونے کے دوران ہجوم کی وجہ سے ایک خاتون نے اسے دھکا دیا تو وہ گرتے گرتے بچی۔ وہ لڑکا اس منظر کو دیکھ کر مسکرا رہا تھا۔ لڑکی اس کی مسکراہٹ کو اپنے دل پر لے گئی اور وہ سوچنے لگی کہ کاش اس نے بھی کوئی میلا کچیلا برقع پہن رکھا ہوتا تو آج یہ لڑکا اس پر طنز سے نہ مسکراتا۔لڑکی بلاسوچے سمجھے محض لڑکے کو متاثر کرنے کےلیے انٹر کلاس کے درجے میں داخل ہوگئی اور قلی سے کہنے لگی سامان لےآؤ جبکہ قلی اس کی اس حرکت پر حیران کھڑا تھا۔
✍ تشریح:
ہاجرہ مسرور اردو ادب کی نامور مصنفہ اور افسانہ نگار تھیں۔ ان کے افسانوں میں خواتین کے مسائل کے ساتھ ساتھ دیگر معاشرتی مسائل کو بھی اجاگر کیا گیا ہے۔ " ملمع " بھی ان کا تحریر کردہ ایسا افسانہ ہے جس میں وہ معاشرتی رویوں میں پائی جانے والی ملمع کاری، دکھاوے اور نمودونمائش سے پردہ اٹھاتی ہیں۔
تشریح طلب اقتباس میں مصنفہ ہاجرہ مسرور اس لڑکی کے بارے میں بیان کر رہی ہے جو اپنے بیمار چچا کی عیادت کی غرض سے جانے کےلیے ریل گاڑی کا سفر کرنا چاہ رہی تھی۔ ریل گاڑی کے ڈبے میں سوار ہونے کی کوشش اور دھکم پیل میں جب ایک خاتون نے اس لڑکی کو اپنی راہ میں حائل دیکھا تو اسے دھکا دے دیا۔لڑکی گرتے گرتے بچی جبکہ وہ لڑکا اس منظر کو دیکھ کر مسکرا رہا تھا جس سے لڑکی اپنی غربت زدہ اصلیت چھپانا چاہ رہی تھی۔ وہ لڑکے کے سامنے ہونے والی سبکی کو دل میں لیے ریل گاڑی کے ڈبوں پر لکھے درجوں کو پڑھنے لگی۔ ان ڈبوں پر نمایاں الفاظ میں الگ الگ لکھے ہوئے فرسٹ ، سیکنڈ اور زنانہ انٹر سب درجوں کو پڑھ رہی تھی۔ زنانہ انٹر کا نام پڑھتے ہی وہ کچھ دیر رک گئی اور دوبارہ اس درجے کو پڑھنے لگی۔ اسے لگا کہ یہ درجہ لڑکے کےسامنے ہونے والی اس کی سبکی اور اس کی اصلیت پر پردہ ڈالنے میں کامیاب ہوگا۔ وہ درجہ اسے شدید بارش میں اس سایہ دار اور گھنے درخت کی طرح لگ رہا تھا جو کسی مسافر کو بارش سے بچنے میں مدد دیتا ہے۔
چناں چہ تھرڈ کلاس کا ٹکٹ خریدا ہونے کے باوجود صرف لڑکے کے سامنے اپنی اہمیت اجاگر کرنے اور اپنی اصلیت چھپانے کےلیے وہ سوچ بچار اور نتائج کی پروا کیے بغیر انٹر کلاس کے ڈبے میں داخل ہوگئی۔ قلی جانتا تھا کہ اس نے تھرڈ کلاس کا ٹکٹ خرید رکھا ہے اس لیے وہ لڑکی کی اس حرکت پر حیران و پریشان کھڑا تھا۔ اسے سمجھ نہیں آ رہی تھی کہ لڑکی یہ سب کیا اور کیوں کر رہی ہے۔ بقول شاعر:
؎ مٹتے ہوئے نقوش وفا کو ابھاریے
چہروں پر جو سجا ہےملمع اتاریے
No comments:
Post a Comment