پیراگراف4 اردو ادب میں عیدالفطر

                                                  سبق:       اردو ادب میں عیدالفطر

                                               مصنف:        ڈاکٹر وحید قریشی

                      پیراگراف نمبر4

                                                                   اقتباس:

                                    اس رجحان نے تخلیقی سطح ۔۔۔۔۔۔۔۔ منظرکشی تک جاکر ختم نہیں ہوتا۔

                                                                حوالۂ متن

                                           سبق کا عنوان:                     اردو ادب میں عیدالفطر

                                           مصنف کا نام:                        ڈاکٹر وحید قریشی

                                                   صنف:                        مضمون نگاری

                                                     ماخذ:                     اردو نثر کے میلانات

                                                          خط کشیدہ الفاظ کے معانی

                     رجحان ۔۔۔۔۔ میلان، لگاؤ، توجہ۔                                    تخلیقی ۔۔۔۔۔ منفرد اختراع و ایجاد۔

                 تخلیقی سطح ۔۔۔۔۔ منفرد کارنامے کی سطح۔                            بےموقع ۔۔۔۔۔ بےمحل۔

                     محض ۔۔۔۔۔ صرف۔                                                تہوار ۔۔۔۔۔ تہذیبی یا مذہبی دن۔ 

                اچھل کود ۔۔۔۔۔ خوشی منانا، ناچنا۔                                      منحصر ۔۔۔۔۔ انحصار کرنا۔

                    اقدار ۔۔۔۔۔ قدر کی جمع، تہذیب و تمدن۔                        تخلیقات ۔۔۔۔۔ تخلیق کی جمع، جوہر۔

             داخلی رویے ۔۔۔۔۔ انسان کے اندر کے جذبات۔                        یک طرفہ ۔۔۔۔۔ ایک طرف کا، علاحدہ۔

               مناظرکشی ۔۔۔۔۔ نظارے اجاگر کرنا۔                              ناقابل فراموش ۔۔۔۔۔ بھلایا نہ جانے والا۔

                   تشریح:

                                   تشریح طلب اقتباس درسی سبق " اردو ادب میں عیدالفطر" کے درمیان سے اخذ کیا گیا ہے جسےڈاکٹر وحید قریشی نے تحریر کیا ہے۔ وہ اردو اور فارسی ادب کے ایک اہم محقق اور نقاد تھے۔ان کا زیادہ تر سرمایۂ ادب تنقیدی کتب پر مشتمل ہے۔

                                 اس اقتباس میں مصنف بیان کرتا ہے کہ عیدالفطر کے متعلق شاعری  کو دیکھ کر یہ نتیجہ اخذ کرنا بےجا نہ ہوگا کہ عید کے حوالے سے شعروشاعری کے نئے میلان نے ایک نئی جہت کو اجاگر کیا۔شعرو شاعری کی اس نئی جہت نے یہ ثابت کیا کہ عید کا تصور، عید کا موقع اور عید کا دن مسلمانوں کےلیے صرف اچھل کود کر خوشی منانے کا دن نہیں بلکہ اس خوشی کا رشتہ اور ناطہ ہماری معاشرتی روایات،مذہبی اقدار اور امت مسلمہ کی مشترکہ دینی احساسات کے ساتھ مضبوطی سے جڑا ہوا ہے۔ جیسا کہ علما کرام فرماتے ہیں:

                             " عیدالفطر امت مسلمہ کےلیے شکر کا دن اور ان کےلیے وحدت کی اکائی ہے ۔"

                            عیدالفطر کےساتھ ہماری معاشرتی اور مذہبی اقدار کے اسی مضبوط تعلق کو اجاگر کرتے ہوئے اردو ادب کے شعرا کرام نے اپنے علمی جویر اور اپنی تخلیقات کو ایک نئی سمت عطا کی اور اس حوالے سے ہمارے داخلی رویوں اور ہمارے اندر کے احساسات کو موضوع سخن بنایا۔اس سے قبل عید کے حوالے سے شعروشاعری محض یک طرفہ مناظرکشی پر جاکر ختم ہوجاتی تھی۔شعرا کی علمی کاوشوں کی بدولت  عیدالفطر کے حوالے سے شعر و شاعری کو جو نئی جہت ملی وہ  ہماری تہذیبی و تمدنی زندگی کا ایسا حصہ بن گئی جس کو ہم کبھی بھلا نہیں سکتے۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

                  محمدامیرعمرفاروق سہرانی              03065976174                aufsurani.blogspot.com       

   

       

پیراگراف3 اردو ادب میں عیدالفطر

                                                       سبق:      اردو ادب میں عیدالفطر

                                                    مصنف:        ڈاکٹر وحید قریشی

                         پیراگراف نمبر3

                                                                       اقتباس

                                          اقبال کے ہاں ہلال عید ۔۔۔۔۔۔۔۔۔ مائل ہوتے جاتے ہیں۔

                                                                     حوالۂ متن

                                            سبق کا عنوان:                         اردو ادب میں عیدالفطر

                                              مصنف کانام:                           ڈاکٹر وحید قریشی

                                                    صنف:                            مضمون نگاری

                                                       ماخذ:                        اردو نثر کے میلانات

                                                            خط کشیدہ الفاظ کے معانی

                          ہنسی اڑانا ۔۔۔۔۔ تمسخر اڑانا، مذاق اڑانا۔                          رویّہ ۔۔۔۔۔  برتاؤ۔

                        عکاسی کرنا ۔۔۔۔۔  ظاہر کرنا۔ تصویرکشی کرنا ۔                    نثرنگار ۔۔۔۔۔ نثر لکھنے والا۔

                       خامہ فرسائی ۔۔۔۔۔ قلم سے لکھنا۔                                  یادطفلی ۔۔۔۔۔ بچپن کی یاد۔

                         تصویرکشی ۔۔۔۔۔  عکاسی،منظرکشی۔                                 منظرکشی ۔۔۔۔۔ منظر عیاں کرنا۔

                            رجحان ۔۔۔۔۔ میلان، لگاؤ، توجہ۔                            مائل ہونا ۔۔۔۔۔ راغب ہونا۔

                    تشریح:                        

                                 تشریح طلب اقتباس درسی سبق " اردو ادب میں عیدالفطر" کے درمیان سے اخذ کیا گیا جسےڈاکٹر وحید قریشی نے تحریر کیا ہے۔ وہ اردو اور فارسی ادب کے ایک اہم محقق اور نقاد تھے۔ان کا زیادہ تر سرمایۂ ادب تنقیدی کتب پر مشتمل ہے۔

                اس اقتباس میں مصنف اردو ادب میں عیدالفطر کی اہمیت کو بیان کرتے ہوئے کہتا ہے کہ مختلف شعرا نے اپنی شاعری میں عیدالفطر کو اپنے اپنے مخصوص انداز میں بیان کیا ہے۔علامہ محمد اقبالؒ کے نزدیک عیدالفطر کا چاند جہاں ہم مسلمانوں کےلیے مسرت اور خوشی کا پیغام لاتا ہے وہیں ہماری اجتماعی خستہ حالی اور تباہ حالی کا تمسخر بھی اڑاتا ہے۔ جیسا کہ اقبالؒ خود فرماتے ہیں:

                                                            عیدِ آزاداں شکوۂ ملک و دیں

                                                            عیدِ    محکوماں    ہجومِ   مومنیں

                                                                          یا 

                                    بقول اقبالؒ

                                                        خزاں میں مجھ کو    رلاتی ہے یادِ فصلِ بہار

                                                         خوشی ہو عید کی کیونکر کہ سوگوار ہوں میں

          اس طرح  یتیموں کی بدحالی اور ان کی خستہ حالی کے حوالے سے بہت سے نثر نگاروں نے اپنی نثری تحریروں کے ذریعے ان کےلیے آواز اٹھائی۔ علامہ اقبالؒ نے بھی اپنی شاعری میں ان نثر نگاروں کے احساسات کی ترجمانی کی اور یتیموں کے حوالے سے اپنے  ہمدردانہ رویے اور جذبات ہم تک پہنچائے۔ جیساکہ حضورﷺ کا فرمان ہے :

                         " یتیم کی کفالت کرنے والا جنت میں میرے ساتھ ایسے ہوگا جیسے ہاتھ کی انگلیاں ساتھ ساتھ ہیں۔ "

         مصنف مزید کہتا ہے کہ عیدالفطر کے چاند کا ہمارے بچپن کی یادوں سے بڑا گہرا تعلق ہے۔ علامہ اقبالؒ کو بھی بچپن کی یادیں عید کے چاند کی منظرکشی پر مجبور کرتی ہیں۔ ان کا رجحان اور میلان عید کے چاند کے مناظر بیان کرنے کی طرف راغب ہوجاتا ہے اور وہ کہتے ہیں:

                                                                  اے  مہ عید   بےحجاب  ہے  تُو

                                                                  حسن خورشید کا   جواب ہے تُو

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

                              محمدامیرعمرفاروق  سہرانی        03065976174         aufsurani.blogspot.com

پیراگراف2 اردو ادب میں عیدالفطر

                                                           سبق:       اردو ادب میں عیدالفطر

                                                          مصنف:        ڈاکٹر وحید قریشی

                      پیراگراف نمبر2

                                                                              اقتباس:

                                              اس تمدنی پسِ منظر کے طفیل ۔۔۔۔۔۔۔ ذکر اہمیت رکھتا ہے۔

                                                                            حوالۂ متن

                                                  سبق کا عنوان:                                 اردو ادب میں عیدالفطر

                                                  مصنف کا نام :                                   ڈاکٹر وحید قریشی

                                                           صنف:                                     مضمون نگاری

                                                             ماخذ:                                اردو نثر کے میلانات

                                                                     خط کشیدہ الفاظ کے معانی

                         تمدنی ۔۔۔۔۔ تہذیبی، رہنے سہنے کے متعلق۔                          پس منظر ۔۔۔۔۔ ماضی کے محرکات۔

                        طفیل ۔۔۔۔۔ سبب، بدولت۔                                                وقتی ۔۔۔۔۔ عارضی۔

                   جذبۂ ہیجان ۔۔۔۔۔ بڑھتا ہوا جوش و جذبہ۔                                     تہذیبی ۔۔۔۔۔ تمدنی۔

                تہذیبی اکائی ۔۔۔۔۔ تمدنی وحدت۔                                       وسعت پذیری ۔۔۔۔۔ پھیلاؤ۔

                      بربادی ۔۔۔۔۔ تباہی۔                                                       نوحے ۔۔۔۔۔ رونا پیٹنا،رنج و الم بیان کرنا۔

                  محروم ہونا ۔۔۔۔۔ کھو دینا، گنوا دینا، ضائع ہونا۔                          کس مپرسی ۔۔۔۔۔ خستہ حالی، بدحالی، تباہ حالی۔

                    بسر کرنا ۔۔۔۔۔ گزارنا۔                                                اہمیت رکھنا ۔۔۔۔۔ اہم ہونا۔مقام رکھنا۔

                   تشریح:                                                             

                                 تشریح طلب اقتباس درسی سبق " اردو ادب میں عیدالفطر" کے درمیان سے اخذ کیا گیا جسےڈاکٹر وحید قریشی نے تحریر کیا ہے۔ وہ اردو اور فارسی ادب کے ایک اہم محقق اور نقاد تھے۔ان کا زیادہ تر سرمایۂ ادب تنقیدی کتب پر مشتمل ہے۔

                            اس اقتباس میں مصنف  مسلمانوں کے جذبات و احساسات کی ترجمانی کرتے ہوئے ان کی تہذیبی اور تمدنی زندگی میں عیدالفطر کی اہمیت کو بیان کر رہا ہے۔ مصنف کہتا ہے کہ عیدالفطر کے تمدنی اور تہذیبی پس منظر کو پرکھا جائے تو یہ دن ہمیں متوسط اور غریب طبقے کے حالات و مسائل سے منسلک نظر آتا ہے۔ اس لیے یہ دن اسی تمدنی اور تہذیبی پس منظر کے سبب اس بات کا غماز نہیں کہ ہم اسے وقتی جوش اور جذبے سے منانے تک محدود رہیں اور اپنی تہذیب اور اسلامی روایات کو یکسر فراموش کر دیں۔ عیدالفطر کا دن ہماری اسلامی تہذیب کو نہ صرف اجاگر کرتا ہے بلکہ اس کی جڑیں ہماری معاشرتی اور سماجی زندگی میں بہت دور تک پھیلی ہوئی ہیں اور بہت مضبوط ہیں۔ جیسا کہ علما کرام فرماتے ہیں:

                                         " عیدالفطر امت مسلمہ کےلیے شکر کا دن اور ان کےلیے وحدت کی اکائی ہے۔"

                          مصنف کہتا ہے کہ جس طرح عیدالفطر کی جڑیں مسلمانوں کی معاشرتی زندگی میں گہری اور وسیع ہیں بالکل اسی طرح اس موضوع کی جڑیں ہماری ادبی روایات میں بھی بہت پھیل چکی ہیں۔خواجہ حسن نظامی نے اپنی تحریروں میں عیدالفطر کے حوالے سے جہاں مسلمانوں کی عظمت رفتہ کو اجاگر کیا وہیں انھوں نے انگریزوں کے ہاتھوں دلی شہر کی ہونے والی  بربادی کے حالات و واقعات بھی قلم بند کیے۔انھوں نے دلی کی تباہی و بربادی کو اجاگر کرتے ہوئے مسلمانوں پر واضح کیا کہ انگریزوں کے ہاتھوں اپنی عظمت  اور اپنی شان و شوکت کھونے کے بعد مغل بادشاہ اور ان کے شہزادے اور شہزادیاں  کس طرح خستہ حالی، بدحالی اور تباہ حالی میں اپنی عید بسر کرنے پر مجبور تھے۔ بقول اقبال

                                                                  عید آزاداں شکوۂ ملک و دیں

                                                                    عید محکوماں    ہجومِ مومنیں

                                                                                یا 

                                      بقول اقبال

                                                          خزاں میں مجھ  کو    رلاتی   ہے   یادِ فضل بہار

                                                          خوشی ہو عید کی کیونکر کہ سوگوار ہوں میں

--------------------------------------------------------------------------------------------------------------------

                        03065976174                                                           aufsurani.blogspot.com

پیراگراف1 اردو ادب میں عیدالفطر

                                                                   سبق:     اردو ادب میں عیدالفطر

                                                                مصنف:    ڈاکٹر وحید قریشی

                  پیراگراف نمبر1

                                                                                اقتباس:

                                                اردو کی غزلیہ شاعری میں ۔۔۔۔۔۔۔۔شدید سے شدید تر کردیا۔

                                                                            حوالۂ متن

                                                     سبق کا عنوان:                             اردو ادب میں عیدالفطر

                                                     مصنف کا نام:                                ڈاکٹر وحید قریشی

                                                            صنف:                                 مضمون نگاری

                                                               ماخذ:                             اردو نثر کے میلانات

                                                                    خط کشیدہ الفاظ کے معانی

                                 ہلال ۔۔۔۔۔ پہلی تاریخ کا چاند۔                                  ابرو ۔۔۔۔۔ بھنویں۔

                         ہلال و ابرو ۔۔۔۔۔ پہلی کا چاند اور بھنویں۔                           محبوب ۔۔۔۔۔ پیارا،پسندیدہ

                           متعلقات ۔۔۔۔۔ متعلق کی جمع، تعلق رکھنے والے۔                  حدود ۔۔۔۔۔ حد کی جمع، علاقہ بندی۔

                           وسعت ۔۔۔۔۔ پھیلاؤ۔                                                توجہ ۔۔۔۔۔ دھیان، خیال۔

                         موضوع ۔۔۔۔۔ عنوان۔                                              اشاراتی ۔۔۔۔۔ اشارے کنایوں کے ساتھ۔

                        علامتی ۔۔۔۔۔ نشانی کے طور پر، مماثلت کے ساتھ۔                امکامات ۔۔۔۔۔ امکان کی جمع،ممکن ہونا،آثار ہونا۔

                     خط و خال ۔۔۔۔۔ نقوش۔                                        اقدار و روایات ۔۔۔۔۔ طور طریقے، رسم و رواج۔

                         شدید ۔۔۔۔۔ شدت کے ساتھ، سخت۔

          تشریح:

                     تشریح طلب  اقتباس  درسی سبق "اردو ادب میں عیدالفطر " کا ابتدائی نثرپارہ ہے جسے نامور ادیب ڈاکٹر وحید قریشی نے تحریر کیا ہے۔وہ اردو اور فارسی ادب کے ایک اہم محقق اور نقاد تھے۔ان کا زیادہ تر سرمایہ تنقیدی کتب پر مشتمل ہے۔

                  اس قتباس میں بھی مصنف نے اردو کی ابتدائی  شعروشاعری کا تنقیدی جائزہ لینے کی کوشش کی ہے۔مصنف کہتے ہیں کہ ابتدا میں اردو کی  شعرو شاعری میں صرف غزلیہ شاعری بہت مقبول تھی۔عیدالفطر کے حوالے سے اُس وقت  غزلیہ شاعری  عید  اور  عید کے چاند کو بیان کرنے  تک محدود تھی۔مگر جب   عید کے موضوع کے حوالے سے غزلیہ شعری میں   مزیدکچھ وسعت ہوئی تو اسے محبوب سے عید کے روز کی ملاقاتوں اور اس کے متعلقات کے طور بھی بیان کیا جانے لگا۔ محبوب کی بھنوؤں کو عید کے باریک چاند سے تشبیہات غزلیہ شاعری کا خاصہ تھا۔ جیسا کہ شاعر کہتا ہے۔

                                                                  ابرو کا اشارہ کیا تم نے تو ہوئی عید 

                                                                   اے جان! یہی ہے   مہ  شوال   ہمارا

اس طرح ابتدا میں غزلیہ شاعری عیدالفطر کے حوالے سے ایسے ہی مخصوص موضوعات کےگرد گھومتی تھی۔ مصنف کہتا ہے کہ 1857ء کی جنگ آزادی میں مسلمانوں کو انگریزوں کے ہاتھوں شکست کا سامنا کرنا پڑا۔اس ناکامی کے بعد مسلمانوں کا درد رکھنے والے  نامور شعرا نے اردو کی شاعری کی حدود کو مزید وسعت اور پھیلاؤ دیا۔انھوں نے شعروشاعری کو محض غزلوں تک محدود نہ رکھا بلکہ اپنی توجہ نظموں کی طرف بھی مرکوز کرلی۔انھوں نے حالات کی نزاکت کو سمجھتے ہوئے عید کے موضوع کو مسلمانوں کے ملی احساسات و جذبات کی ترجمانی کا ذریعہ بنایا۔ انھوں نے اپنی نظموں میں تمثیلوں،اشاروں کنایوں اور علامتی رموز کو استعمال کرکےمسلمانوں کی فکری زندگی کو ابھارہ  اور  اسے  ایک نیا رخ دیا۔ جیسا کہ ڈاکٹر وزیرآغا کہتے ہیں:

                                           " شعروشاعری میں اشارات و علامات کسی شےکے مخفی تصور کو اجاگر کرتے ہیں"۔

چناں چہ ان شعرا نے عیدالفطر کے موضوع میں اشارات اور علامتی امکانات کو نمایاں کرتے ہوئے اردو ادب میں اسلامی رسوم و رواج اور طور طریقوں کو اجاگر کیا اور ان پر عمل کرنے کے جذبات کو بھی جلا بخشی۔

--------------------------------------------------------------------------------------------------------------------

                                                                  aufsurani.blogspot.com

 

فوڈ کنٹرولر کے نام درخواست،راشن ڈپو کی شکایت کےلیے

 

بخدمت جناب فوڈکنٹرولر، تحصیل و ضلع ا۔ب۔ج

عنوان: درخواست برائے شکایت راشن ڈپو

                      جناب عالی!

گزارش ہے کہ ہمارے محلہ کا راشن ڈپو جس کا نمبر 123 ہے ہمارے لیے پریشانی کا باعث بنا ہوا ہے۔ ایک تو یہ بروقت نہیں کھلتا اور دوسرا یہاں کے ملازمین کا رویہ گاہکوں سے انتہائی نامناسب اور جارحانہ ہوتا ہے۔اگر ان ملازمین کے واقف کاروں میں سے کوئی آ جائے تو اس کے ساتھ اچھے اخلاق سے بھی پیش آتے ہیں اور ان کو سودا سلف بھی اچھا اور پورا تول کر دیتے ہیں مگر دوسرے لوگوں کے ساتھ ان کا رویہ اس کے برعکس ہوتا ہے۔

                           جناب عالی! راشن ڈپو پر عام طور پر چینی بھی نہیں ملتی۔ چینی کی بوریاں آتی ہیں مگر نہ جانے کہاں چلی جاتی ہیں؟ گاہکوں کو اکثر یہ جواب ملتا ہے کہ چینی ملتی ہی نہیں تو دیں کہاں سے؟ ایک طرح سے بندر بانٹ کا سلسلہ شروع ہو چکا ہے۔لوگ بےچارے بازار سے مہنگے داموں چیزیں خریدنے پر مجبور ہیں۔ براہِ مہربانی اس راشن کے کرتادھرتا لوگوں کو حکم جاری فرمائیں کہ وہ باقاعدگی سے اور مقررہ وقت پر راشن ڈپو کھولیں اور صارفین کے ساتھ خوش اخلاقی کے ساتھ پیش آئیں۔ ناپ تول میں کمی بیشی کریں اور نہ ہی اشیائے ضرورت کو بلیک میں فروخت کریں۔آپ کی بروقت توجہ اور کاروائی پر ہم آپ کے انتہائی شکرگزار ہوں گے۔

             اللہ تعالیٰ آپ کا اقبال بلند فرمائے۔

                        درخواست گزار

                          اہلیانِ محلہ

                             ا۔ب۔ج

ہیلتھ آفیسر کے نام درخواست برائے صفائی محلہ

 

بخدمت جناب ہیلتھ آفیسر،میونسپل کارپوریشن ا۔ب۔ج

عنوان: درخواست برائے صفائی محلہ

                            جناب عالی!

ہم باشندگان محلہ ا۔ ب۔ج  آپ سے عرض پرداز ہیں کہ اس وقت ہمارے محلے میں صفائی اور نکاسیٔ آب کی صورتِ حال انتہائی ناگفتہ بہ ہوچکی ہے۔گلیوں اور سڑکوں پر کھڑا پانی مچھروں کی افزائش کا سبب بنا ہوا ہے۔گھروں کا گندا پانی خراب نالیوں میں رکا رہتا ہے اور پھر اِدھر اُدھر پھیل کر لوگوں کی آمدورفت میں مشکلات کا باعث بنتا ہے۔ راہ گیروں کے گرنے اور کیچڑ میں لت پت ہونے کے متعدد واقعات بھی پیش آ چکے ہیں۔ بدبو اور تعفن اس قدر بڑھ گیا ہے کہ لوگ محلے سے نقل مکانی پر مجبور ہوگئے ہیں۔

               جناب عالی! یہاں کے خاکروب انتہائی لاپروا ہیں۔ وہ بیرونی سڑک کی صفائی تو بالعموم کر جاتے ہیں لیکن محلے کی اندرونی گلیوں کی گندگی کی طرف کوئی توجہ نہیں دیتے۔ ان کی شدید لاپروائی کی وجہ سے محلے میں وبائی امراض کے پھیلنے کا خطرہ پیدا ہو چکا ہے۔براہ مہربانی گلیوں اور محلے سے غلاظت اٹھوانے اور محلے کی باقاعدہ صفائی کے احکامات جاری فرما کر اور اس پریشان کن صورتِ حال سے نجات دلا کر ہمیں شکرگزاری کا موقع عنایت فرمائیں۔

                        اللہ تعالیٰ آپ کا اقبال بلند فرمائے۔

                              درخواست گزار

                               اہلیانِ محلہ

                                   ا۔ب۔ج

پارک کے قیام کےلیے درخواست۔ برائے انٹر کلاسز

             ناظم کے نام درخواست تفریحی پارک کے قیام کےلیے

                                  بخدمت جناب ناظم ، تحصیل و ضلع الف ۔ ب ۔ج

                            عنوان: درخواست برائے تفریحی پارک کا قیام

                                           جناب عالی!  

نہایت ادب سے گزارش ہے کہ خان پور ضلع رحیم یار خان کا ایک اہم تجارتی اور تعلیمی مرکز ہے۔قرب و جوار کے ساتھ ساتھ  دُوردراز سے بھی لوگ اس شہر کا رخ کر رہے ہیں جس کی وجہ سے شہر کی آبادی میں روز بروز اضافہ ہو رہا ہے۔ مکانات، رہائشی کالونیوں اور کاروباری مراکز کی تعمیر میں بھی تیزی سے اضافہ ہو رہا ہے۔حیران کن امر یہ ہے کہ تعمیراتی منصوبے بناتے وقت عوام کی بنیادی ضروریات کا بالکل بھی خیال نہیں رکھا جا رہا۔سب سے زیادہ تشویش ناک امر یہ ہے کہ کسی بھی رہائشی کالونی میں نہ کھیلوں کا میدان ہے اور نہ ہی سیروتفریح کےلیے کوئی  پارک  بنایا گیا ہے ۔جس کی وجہ سے یہاں کے مکینوں کو صحت مند فضا میسر نہیں۔

              جناب عالی! ایک صحت مند معاشرے کے لئےکھیلوں کے میدان اور پارک کی اہمیت سے انکار نہیں کیا جاسکتا، لیکن ہمارے ہاں  عوام کی صحت مندانہ ضروریات  کا قطعی خیال نہیں رکھا جاتا  اس لیے یہاں کھیل کے میدانوں اور  پارکوں کی شدید کمی ہوچکی ہے۔ جن جگہوں پر میدان اور پارک  ہوتے بھی ہیں تو وہاں بچت بازار لگا دئیے جاتے ہیں۔ بدقسمتی سے یہ بات کوئی نہیں سوچتا کہ اِس حرکت کی وجہ سے بچوں اور نوجوانوں کی  جسمانی سرگرمیاں متاثر ہوتی ہیں۔یہ تشویش ناک مسئلہ اس شہر میں بھی بدرجہ اُتم موجود ہے۔ اس لیے آپ سے التماس ہے کہ مندرجہ بالا حالات کو مدنظر رکھتے ہوئے اور عوام الناس کو صحت مندانہ ماحول فراہم کرنے کےلیے تفریحی پارک اور کھیل کے میدان کے قیام کی منظوری عطا فرمائیں۔اہل شہر اس عنایت پر تادم زیست آپ کے احسان مند رہیں گے۔

                  ۲۷۔اپریل ۲۰۲۱ء                               درخواست گزار 

                                                                    نیاز مندان 

             الف۔ ب۔ج