سبق: ملمع
پیراگراف نمبر13
✍ اقتباس :
باجی یہ برقع تو بڑا اچھا سا بنا ڈالا تم نے ۔۔۔۔۔۔۔ دل سے محو کر دینا چاہتی تھی۔
✍ حوالۂ متن:
سبق کا عنوان: ملمع
مصنفہ کا نام: ہاجرہ مسرور
صنف: افسانہ
ماخذ: سب افسانے میرے
✍ خط کشیدہ الفاظ کےمعانی:
مارے شوق کے ۔۔۔۔ پسند کرتے ہوئے۔ قہر آلودہ ۔۔۔۔ غصے سے، کھا جانے والی نظروں سے۔
مضطربانہ ۔۔۔۔ پریشانی سے، اضطراب سے۔ رہ رہ کر یاد آنا ۔۔۔۔ بہت زیادہ یاد آنا۔
محو کرنا ۔۔۔۔ ہٹا دینا، مٹا دینا۔
✍ سیاق و سباق:
تشریح طلب اقتباس درسی سبق " ملمع " کے آخری حصے سے اخذ کیا گیا ہے۔ اس کا سیاق و سباق یہ ہے کہ اپنے بیمار چچا کی عیادت کی غرض سے جانے کےلیے ریل گاڑی کا سفر کرنے والی لڑکی نے وہاں موجود امیرزادے سے تمام سفر میں اپنے غریب ہونے کی اصلیت کامیابی سے چھپائے رکھی۔ لڑکا بھی اسی اسٹیشن پر اترا جہاں لڑکی اتری تھی۔ اس لڑکے نے بدقسمتی سے لڑکی کو گیٹ پر تھرڈ کلاس کا ٹکٹ دیتےہوئے دیکھ لیا۔ لڑکی کو اپنی تمام تر محنت عین وقت میں غارت ہونے کی وجہ سے بہت دکھ اور ارمان ہوا۔ وہ چچا کے ہاں پہنچ کر بھی ان تمام واقعات کی یادوں سے جان نہیں چھڑا پا رہی تھی۔
✍ تشریح :
ہاجرہ مسرور اردو ادب کی نامور مصنفہ اور افسانہ نگار تھیں۔ ان کے افسانوں میں خواتین کے مسائل کے ساتھ ساتھ دیگر معاشرتی مسائل کو بھی اجاگر کیا گیا ہے۔ " ملمع " بھی ان کا تحریر کردہ ایسا افسانہ ہے جس میں وہ معاشرتی رویوں میں پائی جانے والی ملمع کاری، دکھاوے اور نمودونمائش سے پردہ اٹھاتی ہیں۔
تشریح طلب اقتباس میں مصنفہ ہاجرہ مسرور اپنے بیمار چچا کی عیادت کےلیے ان کے گھر آئی ہوئی لڑکی کے متعلق بیان کرتی ہے کہ لڑکی دھوپ کھانے کی غرض سے بالائی مکان کی طرف چلی گئی تو اس کے پیچھے اس کی چچازاد بہن بھی اس کا برقع پہن کر پہنچ گئی۔ اسے وہ برقع بہت پسند آیا ہوا تھا۔ وہ اس کی تعریف کیے بغیر نہ رہ سکی اور کہنے لگی کہ باجی آپ نے یہ برقع بہت ہی خوب صورت اور عمدہ بنایا ہے۔ لڑکی نے اس کی بات سن کر کوئی جواب نہ دیا۔ اس کے نزدیک اب اس برقعے کی کوئی حیثیت نہیں تھی کیونکہ وہ خوب صورت برقع پہنے ہونے کے باوجود سفر کے دوران امیرزادے کے سامنے اپنے غریب ہونے کی اصلیت نہ چھپا سکی تھی۔
وہ برقعے کو غصے اور نفرت کی نگاہوں سے دیکھ رہی تھی۔ اسے اس بات کا بہت رنج تھا کہ اس کا ملمع اور دکھاوا لڑکے کے آگے بےنقاب ہوکر رہ گیا تھا۔ اس لیے اس برقعے کی تعریف سنتے ہی اسے ریل گاڑی کے سفر کے دوران پیش آنے والے سارے واقعات اچھی طرح یاد آنے لگے۔ تمام سفر کے دوران نہ تو کوئی اس سے متاثر ہوا اور نہ ہی کسی عورت نے اسے اہمیت دی تھی۔ ایک نوجوان قدرے اس کی خوش پوشی سے متاثر ہوا تو اس کےسامنے بھی وہ اپنی اصلیت چھپانے کی کوشش میں ناکام ثابت ہوئی تھی۔ وہ ان تمام ناخوشگوار یادوں کو دل سے مٹا کر ہمیشہ کےلیے بھلا دینا چاہتی تھی۔ جیساکہ شاعر کہتا ہے:
؎ بند کر دے کوئی ماضی کا دریچہ مجھ پر
اب اس آئینے میں صورت دیکھی نہیں جاتی
یا
؎ یادِ ماضی عذاب ہے یا رب
چھین لے مجھ سے حافظہ میرا
No comments:
Post a Comment