سبق: ملمع
پیراگراف نمبر11
✍ اقتباس:
آخر اس ملمع سے کیا فائدہ ۔۔۔۔۔۔۔۔۔۔ اب اس کی منزل مقصود قریب تھی۔
✍ حوالۂ متن:
سبق کا عنوان: ملمع
مصنفہ کا نام: ہاجرہ مسرور
صنف: افسانہ
ماخذ: سب افسانے میرے
✍ خط کشیدہ الفاظ کے معانی:
ملمع ۔۔۔۔ سونے یا چاندی کا پانی چڑھانا، دکھاوا، نمائش۔ اوورکوٹ ۔۔۔۔ لمبا انگریزی کوٹ۔
متاثر ہونا ۔۔۔۔ اثر قبول کرنا۔ سہمے ہوئے ۔۔۔۔ ڈرے ہوئے۔
کانپنا ۔۔۔۔ ہانپنا، ڈرنا۔ منزلِ مقصود ۔۔۔۔ وہ مقام جہاں پہنچنا ہو۔
✍ سیاق و سباق:
تشریح طلب اقتباس درسی سبق" ملمع " کے درمیان سےاخذ کیا گیا ہے۔ اس کا سیاق وسباق یہ ہے کہ ریلوے اسٹیشن پر موجود لڑکی ایک امیرزادے سےاپنی اصلیت اور غربت چھپانے کےلیے تھرڈ کلاس کا ٹکٹ خرید کر انٹر کلاس میں داخل ہوگئی۔ جب ریل گاڑی ایک چھوٹے سے اسٹیشن پر رکی تو وہ قدرے خوف زدہ ہوگئی کہ اگر کسی نے اس کا ٹکٹ دیکھ لیا تو کیا ہوگا؟ وہ سوچنے لگی کہ اس طرح ملمع کرنے سے اسے کیا فائدہ ہوا؟ ریل گاڑی میں دورانِ سفر جو عورتیں سوئی ہوئی تھیں، وہ اٹھ بیٹھیں اور جمائیاں لے کر کسی دوسرے صوبے کی زبان میں باتیں کر رہی تھیں۔ ان میں سے کوئی بھی لڑکی کی طرف متوجہ نہ تھی۔
✍ تشریح:
ہاجرہ مسرور اردو ادب کی نامور مصنفہ اور افسانہ نگار تھیں۔ ان کے افسانوں میں خواتین کے مسائل کے ساتھ ساتھ دیگر معاشرتی مسائل کو بھی اجاگر کیا گیا ہے۔ " ملمع " بھی ان کا تحریر کردہ ایسا افسانہ ہے جس میں وہ معاشرتی رویوں میں پائی جانے والی ملمع کاری، دکھاوے اور نمودونمائش سے پردہ اٹھاتی ہیں۔
تشریح طلب اقتباس میں مصنفہ ہاجرہ مسرور اس لڑکی کے متعلق بیان کرتی ہے جو اپنے بیمار چچاکی عیادت کی غرض سے جانے کےلیے ریل گاڑی کا سفر کر رہی تھی۔وہ ایک امیرزادے سے اپنی غربت اور اپنی اصلیت کو چھپانے کی غرض سے تھرڈ کلاس کا ٹکٹ لیے ہونے کے باوجود ریل گاڑی کے زنانہ انٹر کلاس کے ڈبے میں داخل ہوگئی۔ جب ریل گاڑی ایک چھوٹے اسٹیشن پر رکی تو لڑکی کو خوف لاحق ہوگیا کہ کہیں اس کا ٹکٹ نہ دیکھ لیا جائے۔ یہ خیال آتے ہی وہ گہری سوچ میں پڑ گئی کہ دکھاوے، نمودونمائش اور صرف اپنی اصلیت چھپانے کےلیے ایسی حرکت کرنے کی کیا ضرورت تھی۔ اب اگر ٹکٹ کسی نے دیکھ لیا تو سارا بھانڈا پھوٹ جائے گا اور اصلیت بھی سب کے سامنے بےنقاب ہو جائے گی کیونکہ ملمع کاری معمولی سی رگڑ سے ہی پہچان لی جاتی ہے۔دنیا میں امیر اور غریب سب رہتے ہیں۔ سب کی اپنی اپنی جداگانہ حیثیت ہے۔انسان کی پہچان دولت سے ہرگز نہیں ہوتی اور نہ ہی دولت سب کچھ ہوتی ہے۔ جیساکہ ایک قول ہے:
✌ " انسان کی پہچان اس کی دولت یا رتبے سے نہیں بلکہ ظرف سے ہوتی ہے "۔ ✌
چناں چہ ایک خوش لباس اور اوورکوٹ والے نوجوان سے اس قدر متاثر ہوکر یہ سب کچھ کرنے کی ضرورت ہی نہیں تھی۔ہر آدمی کو اپنی اصلیت کے مطابق ہی رہنا چاہیے۔یہی اصل زندگی ہے۔ بےجا دکھاوے اور نمودونمائش سے جب اصلیت بےنقاب ہوتی ہے تو معاشرے میں شرمندگی اٹھانا پڑتی ہے۔ بقول شاعر:
؎ مٹتے ہوئے نقوشِ وفا کو ابھاریے
چہروں پر جو سجا ہے ملمع اتاریے
دورانِ سفر وقت گزرنے کے ساتھ ساتھ رات کی تاریکی دن کے اجالے میں بدلنے لگی اور ستارے ڈگمگاتے ہوئے منظر یوں سے غائب ہو رہے تھے جیسے دن سے ان کو ڈر لگتا ہو۔ریل گاڑی ایک اور اسٹیشن پر رکی۔ لڑکی نے ڈبے کے دروازے سے اپنا سر باہر نکال کر یہ دیکھنے کی کوشش کی کہ کون سا اسٹیشن ہے؟ اس نے اسٹیشن کا نام پڑھا تو اسے معلوم ہوگیا کہ اس سے اگلا اسٹیشن ہی اس کی منزل ہے۔ اس نے تمام سفر بغیر کسی ناخوشگوار واقعے کے اور احسن طریقے سے طے کر لیا تھا۔اب اس کی منزل بھی قریب آچکی تھی۔ بقول شاعر:
؎ چلے تو کٹ ہی جائے گا سفر آہستہ آہستہ
ہم اس کے پاس جاتے تھے مگر آہستہ آہستہ
No comments:
Post a Comment