سبق: ملمع
پیراگراف نمبر8
✍ اقتباس:
ارے قلی! تم مجھے یہاں کیوں لائے ۔۔۔۔۔۔۔۔۔ یہ آرزو پھڑپھڑانے لگی۔
✍ حوالۂ متن:
سبق کا عنوان: ملمع
مصنفہ کا نام: ہاجرہ مسرور
صنف: افسانہ
ماخذ: سب افسانے میرے
✍ خط کشیدہ الفاظ کے معانی:
قلی ۔۔۔۔ ریلوے سٹیشن پر سامان اٹھانے والا۔ چلائی ۔۔۔۔ چیخی، گرجی۔
ہجوم ۔۔۔۔ بھیڑ، اکٹھ۔ پلیٹ فارم ۔۔۔۔ ریل گاڑی کے رکنے کی جگہ۔
پیمائش کرنا ۔۔۔۔ ناپنا۔ نگاہ ۔۔۔۔ نظر، دید۔
سیکڑوں ۔۔۔۔ سو سے زائد۔ میلے کچیلے ۔۔۔۔ گندے، خراب۔
اوڑھے ہوئے ۔۔۔۔ پہنے ہوئے، لپیٹے ہوئے۔ طنز ۔۔۔۔ شرارت، مذاق۔
گوشہ ۔۔۔۔ کونا۔ آرزو ۔۔۔۔ خواہش، تمنا۔
پھڑ پھڑانا ۔۔۔۔ ابھرنا، حرکت کرنا۔
✍ سیاق و سباق:
تشریح طلب اقتباس درسی سبق" ملمع " کے درمیان سے اخذ کیا گیا ہے۔ اس کا سیاق و سباق یہ ہے کہ ایک لڑکی اپنے بیمار چچا کی عیادت کی غرض سے جانے کےلیے ریلوے سٹیشن پر موجود تھی۔ ریل گاڑی کے ڈبے میں سوار ہونے کی کوشش کے دوران وہ مردوں اور عورتوں کے ہجوم میں پھنس گئی۔ ایک عورت نے اس ہجوم میں اپنا ہاتھ برقعے کی گدڑی سے نکالنے کی کوشش میں اس لڑکی کو دھکا دے دیا اور وہ گرتے گرتے بچی۔وہ نوجوان لڑکی کو دیکھ کر مسکرا رہا تھا جس سے وہ اپنی اصلیت چھپانے کی کوشش کر رہی تھی۔ لڑکی قلی سےخفا ہو کر کہنے لگی تم مجھے یہاں کیوں لائے۔ وہ ہجوم سے نکل کر درجوں کو پڑھنے لگی۔ اسے انٹر کلاس کا درجہ موسلا دھار بارش میں گھنے درخت کاسایہ معلوم ہونے لگا۔ وہ بلا سوچے سمجھے دروازہ کھول کر اندر داخل ہوگئی۔
✍ تشریح :
ہاجرہ مسرور اردو ادب کی نامور مصنفہ اور افسانہ نگار تھیں۔ ان کے افسانوں میں خواتین کے مسائل کے ساتھ ساتھ دیگر معاشرتی مسائل کو بھی اجاگر کیا گیا ہے۔ " ملمع " بھی ان کا تحریر کردہ ایسا افسانہ ہے جس میں وہ معاشرتی رویوں میں پائی جانے والی ملمع کاری، دکھاوے اور نمودونمائش سے پردہ اٹھاتی ہیں۔
تشریح طلب اقتباس میں مصنفہ ہاجرہ مسرور اس لڑکی کے متعلق بیان کر رہی ہے جو اپنے بیمار چچا کی عیادت کی غرض سے جانے کےلیے ریل گاڑی کا سفر کرنا چاہ رہی تھی۔ ریل گاڑی کے زنانہ ڈبے میں سوار ہونے کے دوران لڑکی کو جب جھالروں سے مزین برقعے پہنے ہوئے خاتون نے دھکا دیا تو یہ سارا منظر وہ لڑکا بھی دیکھ رہا تھا جس سے لڑکی متاثر ہوکر اپنی غربت زدہ اصلیت چھپا کر اپنی سج دھج عیاں کر رہی تھی۔ وہ لڑکا یہ سب دیکھ کر مسکرا رہا تھا۔لڑکی نے سبکی محسوس کرتے ہوئے قلی پر غصے ہوکر برسنا شروع کر دیا کہ تم مجھے یہاں کیوں لے آئے ؟وہ قلی کو ساتھ لے کر کسی نہ کسی طرح لوگوں کے ہجوم سے باہر نکل آئی۔ اس نے اپنی توجہ لوگوں کے ہجوم سے ہٹا کر دوبارہ پلیٹ فارم کی طرف مرکوز کر لی اور پلیٹ فارم پر ٹہلنے لگی۔
لڑکے نے اسے دھکا پڑتے دیکھ لیا یہی چیز اسے اندر ہی اندر سے کھائے جا رہی تھی۔ وہ اس بات کو اپنے ذہن سے ہٹا دینا چاہتی تھی۔وہ ریل گاڑی میں سوار ہونے والوں کے ہجوم کو دیکھنے لگی۔ اس کی آنکھوں کے سامنے بہت سی خواتین میلے اور گندے برقعوں میں موجود تھیں اور یہ میلے کچیلے برقعے ہوا کی وجہ سے غباروں کی طرح اڑ کر لہرا رہے تھے۔وہ سوچوں میں گم ہوگئی۔ اس کے دل میں یہ خواہش بیدار ہوگئی کہ اگر اس نے بھی کوئی میلا کچیلا برقع پہن رکھا ہوتا تو دھکا پڑتے وقت وہ لڑکا مجھے دیکھ کر طنز سے نہ مسکراتا اور میری اس کے سامنے یوں سبکی نہ ہوتی بلکہ اس کی شرارتی اور طنزیہ نگاہوں سے محفوظ رہتی۔ بقول شاعر:
؎ اصل سونے پر تھا جتنا بھی ملمع جل گیا
دھوپ اس شدت کی الفاظ و معانی پر پڑی
No comments:
Post a Comment