پیراگراف نمبر8 چغل خور

 aufsurani.blogspot.com

                                                                         سبق: چغل خور

                                               پیراگراف نمبر8

                                                                    ✍   اقتباس: 

                                  اس نے ایک بار پھر آگے بڑھ کر۔۔۔۔۔۔۔۔۔ کسان کے سالے باہر نکل آئے۔

                                                                ✍  حوالۂ متن:

                                                      سبق کا عنوان:                چغل خور

                                                       مصنف کا نام:                  شفیع عقیل

                                                              صنف:                  لوک داستان

                                                                ماخذ:                  پنجابی لوک داستانیں

                                                             ✍ خط کشیدہ الفاظ کے معانی:

                               کلائی ۔۔۔۔ بازو اور ہاتھ کے جوڑ والا حصہ۔      آؤ دیکھا نہ تاؤ ۔۔۔۔ پروا کیے بغیر، بلا سوچے سمجھے۔

                            ٹھکائی ۔۔۔۔ مارپیٹ۔                                       جوں ہی ۔۔۔۔ جیسے ہی۔

                            برسانا ۔۔۔۔ پے در پے مارنا۔ بوچھاڑ کرنا۔

    ✍    سیاق و سباق: 

                            تشریح طلب اقتباس درسی سبق " چغل خور  " کے آخری حصے سے اخذ کیا گیا ہے۔ اس کا سیاق و سباق یہ ہے کہ چغل خور نے کسان کی بیوی کے پاس جا کر  کہا کہ تمھارا خاوند کوڑھی ہو چکا ہے۔ تم کسان کے جسم کو چاٹ کر اس بات کی تصدیق کر سکتی ہو۔اس کا جسم نمکین ہوگا۔اس کے بعد اس نے کسان کو یہ کہ کر بدگمان کیا کہ تمھاری بیوی پاگل ہو چکی ہے اور کاٹ کھانے کو دوڑتی ہے۔ کسان کی بیوی جب کھیتوں میں کسان کو روٹی دینے گئی تو موقع ملتے ہی اس نے کسان کی کلائی پکڑی اوراسےچاٹنے کی کوشش کی تو کسان پرے ہٹ گیا۔اسے یقین ہوگیا کہ اس کی بیوی واقعی پاگل ہوگئی ہے۔ اس طرح کسان کی بیوی کو بھی یقین ہوگیا کہ یہ مجھ سے پیچھے ہٹنے کی کوشش کر رہا ہے تو واقعی کوڑھی ہوچکا ہے۔ غلط فہمی میں آکر کسان نے بیوی کو مارنا شروع کر دیا۔ کسان کے سالوں کو چغل خور پہلے ہی خبردار کر آیا تھا کہ کسان تمھاری بیوی پر ظلم ڈھاتا ہے اس لیے وہ چھپ کر کسان کو مارپیٹ کرتا دیکھ رہے تھے۔ سب للکارتے ہوئے کسان پر ٹوٹ پڑے۔

       ✍    تشریح: 

                           لوک داستان کسی معاشرے ، تہدیب اور ثقافت کی ایسی کہانی ہوتی ہے جو سینہ بہ سینہ سفر کرتے ہوئے ایک نسل سے دوسری نسل میں منتقل ہوتی ہے۔ اس کے مصنف کا کوئی پتا نہیں ہوتا۔ اردو کے نامور ادیب شفیع عقیل نے مختلف تہذیب و ثقافت سے تعلق رکھنے والی  لوک داستانوں کے اردو تراجم کرکےبڑی علمی و ادبی اور ثقافتی خدمات سرانجام دیں۔" چغل خور " بھی ایسی ہی لوک داستان ہے جس میں چغل خوری کے نقصان اور اس کے معاشرے پر پڑنے والے گہرے اثرات کو اجاگر کیا گیا ہے۔

                          تشریح طلب اقتباس میں مصنف چغل خور کی چغلی کی وجہ سے ہونے والے نقصان کو اجاگر کرتے ہوئے کہتا ہے کہ کسان کی بیوی نے یہ دیکھنے کےلیے کہ کسان کوڑھی ہو چکا ہے یا نہیں کسان کی کلائی پکڑی اور کسان کو چاٹنے کی کوشش کی تو کسان اچھل کر دور ہٹ گیا۔ اس کی بیوی کا شک یقین میں بدل گیا کہ کسان واقعی کوڑھی ہو چکا ہے۔ اس نے دوبارہ کسان کی کلائی پکڑنے کی کوشش کی۔ کسان نے اپنی بیوی کی عجیب و غریب اور پاگلوں جیسی حرکات و سکنات دیکھیں تو اسے  یقین ہوگیا کہ نوکر ٹھیک ہی کہتا تھا کہ اس کی بیوی پاگل ہوچکی ہے اور کاٹ کھانے کو دوڑتی ہے۔

                      کسان سے اپنی بیوی کا طرزعمل برداشت نہ ہوا اس لیے اس نے بلا سوچے سمجھے اور نتائج کی پروا کیے بغیر اپنا جوتا اتارا اور اپنی بیوی کو مارنا پیٹنا شروع کر دیا۔ جیساکہ شیخ سعدی کا فرمان ہے:

                                  ✌" چغل خور دو آدمیوں کو لڑانے کےلیے ایندھن لانے والا ثابت ہوتا ہے "۔✌

چغل خور کسان کےسالوں کو بھی بتا آیا تھا کہ کسان تمھاری بہن پر ظلم و ستم کرتا ہے۔ وہ اس منظر کو اپنی آنکھوں سے دیکھنے کےلیے قریبی کھیتوں میں چھپے ہوئے تھے۔ جب انھوں نے اپنی بہن کی کسان کے ہاتھوں جوتوں سے مرمت ہوتی دیکھی تو انھیں بھی نوکر کی بات پر مکمل یقین ہوگیا کہ وہ ٹھیک ہی کہ رہا تھا کہ کسان ان کی بہن کو ظلم و ستم کا نشانہ بناتا ہے۔اب وہ آنکھوں سے بھی اپنی بہن کو مار کھاتا  دیکھ رہے تھے اس لیے وہ اپنی بہن کے دفاع کےلیے کھیتوں سے باہر نکل آئے۔ بقول شاعر:

                                                                ؎      چغلی نکال کر زبان سے    عجب کھیل دکھائے

                                                                    انسانوں کے رشتوں میں اک دراڑ سی پڑ جائے

                                                                        aufsurani.blogspot.com