سبق: ملمع
پیراگراف نمبر2
✍ اقتباس :
یہ سوچ کر اس کا دل بیٹھنے لگا ۔۔۔۔۔ یکے کی دھندلی لالٹین
✍ حوالۂ متن:
سبق کا عنوان: ملمع
مصنفہ کا نام: ہاجرہ مسرور
صنف: افسانہ
ماخذ: سب افسانے میرے
✍ خط کشیدہ الفاظ کے معانی؛
دل بیٹھنا ۔۔۔۔ دل گھبرانا، پریشان ہونا۔ نیم تاریک ۔۔۔۔ قدرے ندھیرا ہونا، تھوڑا بہت اندھیرا ہونا۔
کالی کلوٹی ۔۔۔۔ بہت زیادہ سیاہ۔ چرخ چوں ۔۔۔۔ چرخے کی آواز، چرخے کی چوں چوں۔
یکہ ۔۔۔۔ تانگا۔ میلی ۔۔۔۔ گندی، غیرشفاف۔
چمنی ۔۔۔۔ لالٹین کا شیشہ۔ کثیف ۔۔۔۔ گندی، میلی، غیرشفاف۔
امیرکبیر ۔۔۔۔ دولت مند۔ درحقیقت ۔۔۔۔ اصل میں، حقیقت میں۔
مٹے ہوئے ۔۔۔۔ بدحال ، خستہ حال۔ قابل ۔۔۔۔ لائق۔
پریشانِ حال ۔۔۔۔ برے حال والی ،غم زدہ۔ دھندلی ۔۔۔۔ نیم شفاف۔
اکا دکا ۔۔۔۔ چند ایک۔
✍ سیاق و سباق:
تشریح طلب اقتباس درسی سبق " ملمع " کے ابتدائی حصے سے اخذ کیا گیا ہے۔ اس کا سیاق و سباق یہ ہے کہ ایک لڑکی اپنے بیمار چچا کی عیادت کرنے کی غرض سے اکیلی اپنے گھر سے اپنے چچا کے ہاں جارہی تھی۔ وہ رات کے ساڑھے گیارہ بجے ریلوے سٹیشن پر موجود تھی مگر ریل گاڑی کے آنے میں ابھی کچھ دیر تھی اورٹکٹ گھر بھی بند تھا۔ اس نے اپنی مدد کےلیے قلی کو ساتھ لیا ہوا تھا۔ جب قلی نے اس کا سامان رکھنے اور باقی لوگوں کے ساتھ بیٹھ کر گاڑی کا انتظار کرنے کی بات کی تو وہ غصے میں آکر کہنے لگی میں یہاں نہیں بیٹھوں گی۔
✍ تشریح :
ہاجرہ مسرور اردو ادب کی نامور مصنفہ اور افسانہ نگار تھیں۔ ان کے افسانوں میں خواتین کے مسائل کے ساتھ ساتھ دیگر معاشرتی مسائل کو اجاگر کیا گیا ہے۔ " ملمع " بھی ان کا تحریر کردہ ایسا افسانہ ہے جس میں وہ معاشرتی رویوں میں پائی جانے والی ملمع کاری، دکھاوے اور نمودونمائش سے پردہ اٹھاتی ہیں۔
تشریح طلب اقتباس میں مصنفہ ایک لڑکی کے بارے میں بتاتی ہے جو اپنے بیمار چچا کی عیادت کرنے ریل گاڑی کے ذریعے ان کے گھر جانا چاہ رہی تھی اور وہ ریلوے سٹیشن پر ریل گاڑی کی آمد کی منتظرتھی۔ جب قلی نے اس کے ریشمی برقعے، خوب صورت چہرے اور نفیس سامان کی قدر کیے بغیر لاشوں کی طرح بکھرے لوگوں کے ساتھ بیٹھ کر ریل گاڑی کا انتظار کرنے کو کہا تو اس لڑکی کو قلی کے اس رویے پر شدید دکھ اور افسوس ہوا۔ اسے اپنا دل ڈوبتا ہوا محسوس ہوا اور اسے چپ لگ گئی۔ وہ اسی ڈوبتے دل کے ساتھ خاموشی سے اپنی توجہ قلی کی بات سے ہٹا کر سڑک کی طرف دیکھنے لگی جو انتہائی سیاہ تھی اور اس پر قدرے اندھیرا چھایا ہوا تھا۔ اس سڑک پر اگر کچھ روشنی تھی تو وہ ان چند ایک تانگوں کی میلی کچیلی چمنیوں کی بتیوں کی تھی جو اس سڑک پر چل رہے تھے اور ان تانگوں سے چرخے کے چلنے جیسی آوازیں نکل رہی تھیں۔ چمنیوں کی بتیوں کی غیر شفاف اور دھندلی روشنی سڑک پر رینگ رہی تھی جس کی وجہ سے سڑک کی تاریکی قدرے کم ہوجاتی تھی۔
اس لڑکی کی توجہ سڑک سے ہٹنے کے بعد فوراً اپنی موجودہ حالت کی طرف چلی گئی۔ وہ خود پر اور اپنی اصلیت پر دل ہی دل میں غور کرنے لگی۔ وہ دل میں ہی سوچ رہی تھی کہ میری اصل حقیقت کیا ہے اور میں اس وقت جو بنی پھر رہی ہوں حقیقت میں ویسی نہیں ہوں۔ بقول شاعر:
؎ حقیقت چھپ نہیں سکتی بناوٹ کے اصولوں سے
خوش بو آ نہیں سکتی کبھی کاغذ کے پھولوں سے
مجھے دیکھنے والے میری ظاہری حالت کو دیکھ کر مجھے دولت مند اور امیر گھرانے کی بےفکر اور آزاد رہنے والی لڑکی سمجھتے ہوں گے مگر میری حقیقت اور اصلیت یہ ہے کہ میں ایک پسماندہ اور خستہ حال خاندان سے تعلق رکھنے والی لڑکی ہوں جس کے نصیب میں غم اور پریشانیوں کے علاوہ کچھ نہیں۔ جس کی حالت تانگے کی غیر شفاف لالٹین کی روشنی کی طرح انتہائی خستہ اور کم تر ہے۔ جیسا کہ قول ہے:
✌" اپنی اصلیت کو دوسروں سے تو چھپایا جاسکتا ہے مگر خود سے چھپانا ممکن نہیں۔ " ✌
No comments:
Post a Comment