aufsurani.blogspot.com
سبق: ملمع
پیراگراف نمبر5
✍ اقتباس:
لڑکی نے ایک سخت تنقیدی نگاہ ۔۔۔۔۔۔۔۔ چہرے کو رشک سے دیکھتی۔
✍ حوالۂ متن:
سبق کا عنوان: ملمع
مصنفہ کا نام: ہاجرہ مسرور
صنف: افسانہ
ماخذ: سب افسانے میرے
✍ خط کشیدہ الفاظ کے معانی:
تنقیدی ۔۔۔۔چبھتی ہوئی، جائزہ لیتی۔ تنقیدی نگاہ ۔۔۔۔ چبھتی نظر، جائزہ لیتی نظر۔
دل ہی دل میں ۔۔۔۔ اپنے من میں۔ سوکھی مونڈی ۔۔۔۔ دبلی پتلی، کمزور و ناتواں۔
خشک ۔۔۔۔ سخت ، بنجر۔ پوکھر ۔۔۔۔ تالاب، جوہڑ۔
ساکت ۔۔۔۔ بےحس و حرکت، رکا ہوا۔ بےچین ۔۔۔۔ بےقرار ۔
ریشمی ۔۔۔۔ ریشم سے بنے۔ دہکنا ۔۔۔۔ چمکنا، روشن ہونا۔
رشک ۔۔۔۔ کسی دوسرے جیسا بننے کی خواہش۔
✍ سیاق و سباق:
تشریح طلب اقتباس درسی سبق " ملمع " کے درمیان سے اخذ کیا گیا ہے۔ اس کا سیاق و سباق یہ ہے کہ ایک لڑکی اپنے بیمار چچا کی عیادت کےلیے ریل گاڑی کے ذریعے جا رہی تھی۔ اس نے ریلوے سٹیشن پر کھانسی کی وجہ سے کھوں کھوں کرتی ،جھریوں زدہ چہرے اور سفید بالوں والی بڑھیا کو دیکھا جو حلیے سے عیسائی معلوم ہوتی تھی۔ لڑکی اس خشک ساتھ پر افسوس کرنے لگی۔ اسی دوران قلی نے آکر اس لڑکی کو ٹکٹ گھر کھلنے کی اطلاع دی۔ لڑکی تھرڈ کلاس کا ٹکٹ خریدتے ہوئے خود کو اس امیر زادے کی نظروں سے بچانا چاہتی تھی جس کا سامنا اسے ریلوے سٹیشن پر کرنا پڑا تھا۔ لڑکی نے ادھر ادھر دیکھا تو وہ لڑکا کہیں نظر نہ آیا اس لیے اس نے اطمینان سے ٹکٹ لے لیا۔
✍ تشریح:
ہاجرہ مسرور اردو ادب کی نامور مصنفہ اور افسانہ نگار تھیں۔ ان کے افسانوں میں خواتین کے مسائل کے ساتھ ساتھ دیگر معاشرتی مسائل کو بھی اجاگر کیا گیا ہے۔ " ملمع " بھی ان کا تحریر کردہ ایسا افسانہ ہے جس میں وہ معاشرتی رویوں میں پائی جانے والی ملمع کاری، دکھاوے اور نمودونمائش سے پردہ اٹھاتی ہیں۔
تشریح طلب اقتباس میں مصنفہ ہاجرہ مسرور اس لڑکی کے متعلق بیان کرتی ہے جو اپنے بیمار چچا کی عیادت کےلیے ریل گاڑی کے ذریعے سفر کرنا چاہ رہی تھی۔ اس نے اپنے سفر کو بہترین بنانے اور دورانِ سفر دوسروں کو متاثر کرنے کی غرض سے اچھے لباس کے ساتھ ساتھ خوب صورت برقع بھی پہن رکھا تھا اور ساتھ میں چرمی بٹوہ بھی لیا ہوا تھا۔ اس نے ریلوے سٹیشن پر کھانسی کی وجہ سے کھوں کھوں کرتی ، جھریوں زدہ چہرے اور سفید بالوں والی بڑھیا کو دیکھا۔ وہ تراشے ہوئے بالوں اور ہیٹ سے عیسائی لگتی تھی۔ لڑکی اس کو دیکھ کر افسردہ ہوگئی۔ اسے اپنی دکھاوے کی ساری سج دھج بےکار جاتی محسوس ہوئی۔ اس نے سوچا ہوا تھا کہ اس کا سفر کسی کھلکھلاتی لڑکی کے ساتھ گزرے گا جو اس کی خوش پوشی سے متاثر ہوتی مگر یہاں تو اس کا سامنا ایک کمزور و ناتواں اور دنیا و مافیہا سے بےنیاز بوڑھی سےہوگیا۔ بقول شاعر:
؎ گردشِ لمحات کے اندھے وتیرے دیکھیے
ہم جو بیٹھے زیرِ سایہ، چل پڑی دیواربھی
اس نے ایک چبھتی ہوئی اور ناپسندیدگی سے مزین نظر اس کمزورو ناتواں بوڑھی پر ڈالی اور اس بات پر افسوس کرنے لگی کہ اب اسے اس بڑھیا کے ساتھ سفر کرنا پڑے گا توسفر انتہائی روکھا اور ناخوشگوار گزرے گا۔ اسےاس بڑھیا کا ساتھ اس تالاب اور جوہڑ کی طرح لگ رہا تھا جس کا پانی ہمیشہ رکا ہوا ہوتاہےاوراس میں کوئی خوب صورتی اور کشش نہیں ہوتی جس سے انسان لطف اندوز ہوسکے۔ اس کے برعکس سمندر کا پانی پُر کشش اور آنکھوں کوخیرہ کرنے والا اور محسورکن ہوتا ہے۔ لڑکی یہی سوچ رہی تھی کہ کاش میرا سفر بھی سمندر کی طرح جوش مارتی، پُرکشش اور خوب رُو لڑکی کے ساتھ گزرتا تو وہ مجھ سے اور میری سج دھج سے متاثر ہوکر رہ جاتی۔ وہ جب میرے خوب صورت ریشمی برقعے،خوب صورت لباس کے ساتھ ساتھ چمکتے دمکتے حسین چہرے کو حسرت سے دیکھتی تو اس کے دل میں بھی خواہش جاگ اٹھتی کہ کاش میں بھی اس جیسی خوب صورت ہوتی۔ مگر افسوس کہ اس لڑکی کی یہ ساری سوچ اور خواب دھرے دھرے رہ گئے۔ بقول شاعر:
؎ مٹتے ہوئے نقوشِ وفا کو ابھاریے
چہروں پر جو سجا ہے ملمع اتاریے
No comments:
Post a Comment