aufsurani.blogspot.com
سبق: چغل خور
پیراگراف نمبر2
✍ اقتباس:
دراصل وہ اپنی عادت سے ۔۔۔۔۔۔ فاقوں کی نوبت نہ آجائے۔
✍ حوالۂ متن:
سبق کا عنوان: چغل خور
مصنف کا نام: شفیع عقیل
صنف: لوک داستان
ماخذ: پنجابی لوک داستانیں
✍ خط کشیدہ الفاظ کے معانی:
دراصل ۔۔۔۔ اصل میں، حقیقت میں۔ ملازمت ۔۔۔۔ نوکری۔
ہاتھ دھونا ۔۔۔۔ گنوا دینا، ضائع کرنا۔ بےکار ۔۔۔۔ بے فائدہ۔
عادت ۔۔۔۔ خصلت۔ مجبور ۔۔۔۔ بےبس، لاچار۔
بہتیری ۔۔۔۔ بہت زیادہ۔ کوشش ۔۔۔۔ جدوجہد، سعی۔
کامیاب ۔۔۔۔ کامران، فتح یاب۔ جمع پونجی ۔۔۔۔ جمع کردہ رقم۔
گزربسر ۔۔۔۔ گزران،اوقات بسر کرنا۔ سرمایہ ۔۔۔۔ دولت، خزانہ۔
پریشان ۔۔۔۔ فکرمند۔افسردہ۔ سرتوڑ ۔۔۔۔مکمل طور پر،پوری کی پوری۔
فاقوں نوبت آنا ۔۔۔۔بھوکا مرنا۔بھوک سے برا حال ہونا۔
✍ سیاق و سباق:
تشریح طلب اقتباس درسی سبق " چغل خور " کے ابتدائی حصے سے اخذ کیا گیا ہے۔ اس کا سیاق و سباق یہ ہے کہ پرانےوقتوں میں ایک چغل خور رہتا تھا۔ وہ کوشش کے باوجود اپنی چغل خوری کی عادت ترک نہیں کر پا رہا تھا۔ اپنی اس بری عادت کی وجہ سے وہ ملازمت سے بھی ہاتھ دھو بیٹھا۔ وہ نوکری اور مزدوری کی تلاش میں در در کی خاک چھانتا مگر اسے چغل خوری کی وجہ سے کوئی ملازمت کےلیے رکھنے کو تیار نہ ہوتا تھا۔
✍ تشریح:
لوک داستان کسی معاشرے ، تہدیب اور ثقافت کی ایسی کہانی ہوتی ہے جو سینہ بہ سینہ سفر کرتے ہوئے ایک نسل سے دوسری نسل میں منتقل ہوتی ہے۔ اس کے مصنف کا کوئی پتا نہیں ہوتا۔ اردو کے نامور ادیب شفیع عقیل نے مختلف تہذیب و ثقافت سے تعلق رکھنے والی لوک داستانوں کے اردو تراجم کرکےبڑی علمی و ادبی اور ثقافتی خدمات سرانجام دیں۔" چغل خور " بھی ایسی ہی لوک داستان ہے جس میں چغل خوری کے نقصان اور اس کے معاشرے پر پڑنے والے گہرے اثرات کو اجاگر کیا گیا ہے۔
تشریح طلب اقتباس میں مصنف چغل چغل خوری جیسی بری عادت کی وجہ سے چغل خور کی زبوں حالی کو بیان کرتے ہوئے کہتا ہے کہ اپنی اس بری خصلت کی وجہ سے وہ نوکری سے بھی محروم ہوگیا۔اب وہ بےکار اور نکما تھا۔ اس نے بہت کوشش کی کہ کہیں اور ملازمت مل جائے تاکہ اس کا گزربسر اچھے طریقے سے ہوسکے ۔اسے کوئی بھی ملازمت دینے کےلیے تیار نہیں تھا کیونکہ وہ لوگوں میں اپنا اعتبار مکمل طور پر کھو چکا تھا۔ کسی دانا کا قول ہے:
✌ " تعلق اعتبار پر قائم ہوتا ہے جب اعتبار ختم ہوجائے تو تعلق بھی دم توڑ دیتا ہے "۔✌
چغل خور کہیں بھی ملازمت نہ ملنے کی وجہ سے مجبوراً اس رقم پر گزارا کرنے لگا جو اس نے کچھ عرصے سے جوڑ رکھی تھی۔ جمع شدہ سرمایہ بھی آہستہ آہستہ ختم ہونے لگا اور اس کی پریشانی بڑھتی چلی گئی۔ جیسا کہ مشہور کہاوت ہے۔
✌ " برے کام کاانجام بھی برا ہی ہوتا ہے۔"✌
اس لیے چغل خور کو اب واضح نظر آ رہا تھا کہ جمع شدہ سرمایہ ختم ہونے کے بعد اسے بھوکوں مرنا پڑے گا۔اس لیے اس نے نوکری اور مزدوری کی تلاش میں اپنی پوری توانیاں صرف کر دیں۔ وہ مکمل کوشش میں تھا کہ اسے کہیں نوکری یا مزدوری کا سہارا مل جائے تاکہ بھوک اور افلاس کا سامنا کرنے سے بچ سکے۔ جیسا کہ کہاوت ہے:
✌ " ڈوبتے کو تنکے کا سہارا چاہیے ہوتا ہے"۔ ✌
No comments:
Post a Comment