aufsurani.blogspot.com
سبق: نام دیو مالی
پیراگراف نمبر1
✍ اقتباس :
نام دیو، مقبرہ رابعہ دورانی اورنگ آباد ۔۔۔۔۔۔۔۔جیسی نیچی ذات والوں میں۔
✍ حوالۂ متن:
سبق کا عنوان: نام دیو مالی
مصنف کا نام: مولوی عبدالحق
صنف: خاکہ نگاری
ماخذ: چند ہم عصر
✍ خط کشیدہ الفاظ کے معانی:
مالی ۔۔۔۔ پودوں کو پانی دینے والا۔ ڈھیڑ ۔۔۔۔ آنکھ کا میل، ہندوؤں کی نچلی ذات۔
ذات ۔۔۔۔ شخصیت۔ نیچ ۔۔۔۔ کم تر، گھٹیا۔
امتیاز ۔۔۔۔ فرق۔ مصنوعی ۔۔۔۔ خودساختہ، عارضی۔
رفتہ رفتہ ۔۔۔۔ آہستہ آہستہ۔ نسلی ۔۔۔۔ خاندانی،وراثتی۔
خوبیاں ۔۔۔۔ اچھائیاں۔
✍ سیاق و سباق:
تشریح طلب اقتباس درسی سبق " نام دیو مالی" کا ابتدائی پیراگراف ہے۔ مصنف، نام دیو کے متعلق بیان کرتا ہے کہ وہ ریاست دکن کے شہر اورنگ آباد کے باغ میں مالی تھا۔ مصنف کہتا ہے کہ وہ باغ میری نگرانی میں تھا اور میرا رہنے کا مکان بھی باغ کے احاطے میں ہی تھا۔ میں نے اس بنگلے کے سامنے چمن بنانے کا کام نام دیو کے سپرد کیا ہوا تھا۔ نام دیو ہمیشہ محنت اور لگن سے اپنے کام میں مصروف رہتا تھا۔
✍ تشریح:
مولوی عبدالحق اردو ادب کے نامور اور بلند پایہ محقق ، نقاد ، خاکہ نگار اور عمدہ انشاپرداز تھے۔انھوں نے اردو زبان و ادب کے فروغ میں نمایاں کردار ادا کیا۔ اردو کے حوالے سے نمایاں خدمات پر انھیں " بابائے اردو" کا لقب ملا۔ درسی سبق " نام دیو مالی " ان کی خاکہ نگاری کا عمدہ نمونہ ہے۔ اس میں وہ نام دیو مالی کی محنت ، ایمانداری اور اس کے پُرعظمت کام کو اجاگر کرتے ہیں۔
تشریح طلب اقتباس میں مصنف بتاتا ہے کہ ہندوستان کی ریاست دکن کا مشہور شہر اورنگ آباد ہے۔ اس شہر میں مغل بادشاہ اورنگ زیب عالم گیر کی بیوی کا عظیم الشان مقبرہ ہے جو مقبرہ رابعہ دورانی کے نام سے مشہور ہے۔ نام دیو اسی مقبرے کے وسیع و عریض باغ میں مالی کے طور پر خدمات سر انجام دیتا تھا۔ نام دیو ہندوؤں کی سب سے کم حیثیت رکھنے والی ذات سے تعلق رکھتا تھا جو "ڈھیڑ" کے نام سے جانی جاتی تھی۔ " ڈھیڑ " کا معنی بھی " آنکھ کا میل " ہے اس سے یہ اندازہ لگایا جاسکتا ہے ہندوؤں کے نزدیک اس ذات کی حیثیت کیا ہے۔
دنیا میں موجود قوموں کی اپنی اپنی ذاتیں اور قبائل ہیں ۔قوموں میں ذات پات کی تقسیم انسان کی حیثیت اور اس کے مقام کی برتری یا کمتری کےلیے ہرگز نہیں تھی بلکہ یہ ذاتیں اس لیے وجود میں آئیں تاکہ ایک دوسرے کی پہچان میں آسانی ہو۔ جیسا کہ قرآن مجید میں ارشاد ہے:
✌" اور ہم نے تم کو قوموں اور قبیلوں میں بنایا تاکہ تم ایک دوسرے کو پہچان سکو"۔(سورة الحجرات: 13)۔✌
ہم نے اپنی پہچان کےلیے کی گئی مصنوعی تقسیم کو خودساختہ طور پر اسے اپنی نسلوں میں منتقل کرکے اسے برتری اور کمتری کا معیار بنا لیا۔ یہ ذاتیں اور قبائل کسی کے کم تر اور برتر ہونے کا معیار اس لیے نہیں کیونکہ برتری کا حقیقی معیار راست بازی،اچھائی اور نیکی ہے۔ جیساکہ آخری خطبہ میں حضوراکرمﷺ نے فرمایا:
✌" کسی عربی کو عجمی پر اور کسی عجمی کو عربی پر، کسی گورے کو کالے پر اور کسی کالے کو گورے پر کوئی فضلیت نہیں سوائے تقویٰ کے۔"✌
چناں چہ سچائی، نیکی اور اچھائی جیسی اعلیٰ خوبیاں کسی نسل، ذات پات اور قبائل کی وراثت ہیں اور نہ ہی ان کی محتاج۔ یہ خوبیاں اور اچھائیاں اگر اونچی ذات والوں میں پائی جاسکتی ہیں تو نیچی اور کم تر ذات سے تعلق رکھنے والوں میں بھی بدرجہ اُتم موجود ہوسکتی ہیں۔ اس لیے اخلاق اور انسانی اقدار انسانوں میں ذات پات کے حوالے سے اعلیٰ اور ادنیٰ ہونے کے امتیاز کو قبول نہیں کرتے کیونکہ یہ امتیاز خودساختہ اور مصنوعی ہے۔ بقول حالیؔ:
؎ قیس ہو ، کوہ کن ہو یا حالیؔ
عاشقی کچھ کسی کی ذات نہیں
No comments:
Post a Comment