پیراگراف نمبر9 چغل خور

 aufsurani.blogspot.com

                                                                          سبق: چغل خور

                                                  پیراگراف نمبر9

                                                                       ✍    اقتباس:

                          اور اس کے بعد وہ سب ایک دوسرے پر پِل پڑے۔۔۔۔۔۔۔۔ تم لوگ اس طرح کیوں لڑ رہے تھے؟

                                                                    ✍     حوالۂ متن:

                                                          سبق کا عنوان:                  چغل خور

                                                           مصنف کا نام:                  شفیع عقیل

                                                                  صنف:                   لوک داستان

                                                                    ماخذ:                  پنجابی لوک داستانیں

                                                                ✍   خط کشیدہ الفاظ کے معانی:

                    پِل پڑنا ۔۔۔۔ ٹوٹ پڑنا، حملہ کرنا، دھاوا بولنا۔      سَرپُھٹَوَّل ۔۔۔۔ وہ لڑائی جس میں سر پھٹ جائے، شدید لڑائی۔

                    لاٹھیاں ۔۔۔۔ ڈنڈے۔                          خون میں نہانا ۔۔۔۔ شدید زخمی ہونا۔

                    بیچ بچاؤ ۔۔۔۔ چھڑانا، صلح کرانا۔                        قدرے ۔۔۔۔ کچھ ، تھوڑا بہت۔

   ✍    سیاق و سباق:

                          تشریح طلب اقتباس درسی سبق " چغل خور " کےآخری حصے سے اخذ کیا گیاہے۔ اس کا سیاق و سباق یہ ہے کہ چغل خور نے کسان کی بیوی کو کسان کےخلاف اور کسان کو اس کی بیوی کے خلاف بدظن کیا۔ اسی طرح کسان کے سالوں اور کسان کےبھائیوں کو بھی غلط فہمی کا شکار کردیا۔ یہ سب کھیتوں میں غلط فہمی کی بنیاد پر باہم لڑ پڑے۔ کھیتوں میں کام کرنے والے دوسرے لوگوں نے ان میں بیچ بچاؤ کرایا اور ان سے لڑنے کی وجہ پوچھی۔ جب سب نے باری باری اپنی بات بتائی تو پتاچلا کہ یہ سب چغل خور کا کیا دھرا تھا۔

     ✍      تشریح:

                          لوک داستان کسی معاشرے ، تہدیب اور ثقافت کی ایسی کہانی ہوتی ہے جو سینہ بہ سینہ سفر کرتے ہوئے ایک نسل سے دوسری نسل میں منتقل ہوتی ہے۔ اس کے مصنف کا کوئی پتا نہیں ہوتا۔ اردو کے نامور ادیب شفیع عقیل نے مختلف تہذیب و ثقافت سے تعلق رکھنے والی  لوک داستانوں کے اردو تراجم کرکےبڑی علمی و ادبی اور ثقافتی خدمات سرانجام دیں۔" چغل خور " بھی ایسی ہی لوک داستان ہے جس میں چغل خوری کے نقصان اور اس کے معاشرے پر پڑنے والے گہرے اثرات کو اجاگر کیا گیا ہے۔

                  تشریح طلب اقتباس میں مصنف چغل خور کی چغلی کی وجہ سے کسان، اس کی بیوی،کسان کے سالوں اور اس کےبھائیوں کے درمیان ہونے والی لڑائی کے متعلق بیان کرتے ہوئے کہتا ہے کہ کسان کے سالوں نے اپنی بہن کو کسان کے ہاتھوں مار کھاتے دیکھا تو وہ اسے بچانے کی غرض سے کسان پر ٹوٹ پڑے۔ کسان کے بھائی کسان کی مدد کےلیے سامنے آگئے۔ ان سب میں شدید ہاتھا پائی ہوگئی۔ انھوں نے ڈنڈوں سے حملہ کرکے ایک دوسرے کے سر پھاڑ ڈالے۔ جیسا کہ شیخ سعدیؒ کا قول ہے:

                        ✌  " چغل خور دو فریقوں کو لڑانے کےلیے ایندھن لانے والا ثابت ہوتا ہے"۔✌

                    اس قدر شدید لڑائی میں سارے شدید زخمی ہوگئے اور ان کے جسموں سے خون بہنا شروع ہوگیا۔ گردو نواح کے کھیتوں میں کام کرنے والے لوگوں نے جب ان کو باہم گتھم گتھا دیکھا تو وہ سب دوڑ کر آئے تاکہ ان کو لڑائی جھگڑے سےروک سکیں۔ جیسا کہ قرآن مجید میں ارشاد ہے: 

       ✌" اور اگر مسلمانوں کے دو گروہ آپس میں جھگڑ پڑیں تو ان میں صلح کرادیا کرو "۔ (سورة الحجرات آیت: 9)۔✌

انھوں نے بیچ میں پڑ کر اور  ان کی لڑائی میں مداخلت کرکے  ان سب کو آپس میں لڑنے سے روکا اور انھیں ایک دوسرے سے چھڑوایا۔ وہ سب ایک دوسرے پر شدید غصہ ہو رہے تھے۔ جب ان کا غصہ کچھ ٹھنڈا ہوا تو سب لوگوں نے ان سے اس طرح لڑنے کی وجہ پوچھی کہ آپ کیوں آپس میں اس قدر شدید  لڑائی کر رہے تھے؟۔

                                                             aufsurani.blogspot.com