پیراگراف نمبر6 چغل خور

 aufsurani.blogspot.com

                                                                سبق:   چغل خور

                                        پیراگراف نمبر6

                                                               ✍   اقتباس:

                                  چغل خور نے جب یہ جان لیا ۔۔۔۔۔۔۔۔۔ میں بیان نہیں کرسکتا۔

                                                          ✍    حوالۂ متن:

                                               سبق کا عنوان:                  چغل خور

                                              مصنف کا نام:                  شفیع عقیل

                                                      صنف:                  لوک داستان

                                                        ماخذ:                 پنجابی لوک داستانیں

                                               ✍       خط کشیدہ الفاظ کےمعانی:

                    جان گیا ۔۔۔۔ آگاہ ہوگیا، پہچان لیا۔                     باتوں میں آنا ۔۔۔۔  بہکاوے میں آنا۔

                      سالے ۔۔۔۔ بیوی کے بھائی۔                                مزے ۔۔۔۔ عیش و عشرت۔

                      بہنوئی ۔۔۔۔ بہن کا خاوند۔                                 ادھو موا ۔۔۔۔ نیم مردہ، بےہوش،مرنے کے قریب۔

                      ظالمانہ ۔۔۔۔ ظلم و ستم کرتےہوئے۔

            ✍  سیاق و سباق:

                                 تشریح طلب اقتباس درسی سبق " چغل خور " کےدرمیان سے اخذ کیا گیا ہے۔ اس کا سیاق و سباق یہ ہے کہ چغل خور نے کسان کے گھر میں ملازمت کرنے کےدوران کسان کی بیوی سے کہا کہ تمھارا خاوند کوڑھی ہوگیا ہے۔ اگر یقین نہیں آتا تو تم اس کے جسم کو چاٹ کر دیکھ لینا۔ اس کا جسم نمکین ہوگا۔اسی طرح وہ کسان کے پاس جا کر کہنے لگا کہ تمھاری بیوی پاگل ہوگئی ہے اور کاٹ کھانے کو دوڑتی ہے۔اگر میری بات کا یقین نہیں تو جب وہ کھانا لے کر آئے تو اس وقت دیکھ لینا۔اس کے بعد وہ کسان کے سالوں کے پاس پہنچ گیا اور انھیں کہا کہ کسان تمھاری بہن کو بہت  مارتا ہے۔ کسان کے سالے اس کی بات سن کر پریشان ہوگئےاور کہا ہماری بہن نے تو ہمیں یہ کبھی نہیں بتایا۔

        ✍      تشریح:        

                              لوک داستان کسی معاشرے ، تہدیب اور ثقافت کی ایسی کہانی ہوتی ہے جو سینہ بہ سینہ سفر کرتے ہوئے ایک نسل سے دوسری نسل میں منتقل ہوتی ہے۔ اس کے مصنف کا کوئی پتا نہیں ہوتا۔ اردو کے نامور ادیب شفیع عقیل نے مختلف تہذیب و ثقافت سے تعلق رکھنے والی  لوک داستانوں کے اردو تراجم کرکےبڑی علمی و ادبی اور ثقافتی خدمات سرانجام دیں۔" چغل خور " بھی ایسی ہی لوک داستان ہے جس میں چغل خوری کے نقصان اور اس کے معاشرے پر پڑنے والے گہرے اثرات کو اجاگر کیا گیا ہے۔

                     تشریح طلب اقتباس میں مصنف چغل خور کی بُری خصلت کو بیان کرتے ہوئے کہتا ہے کہ اس نے جب کسان کو بتایا کہ اس کی بیوی پاگل ہو کر کاٹنے کو دوڑتی ہے تو کسان اس کی بات کو سچ مان بیٹھا۔ جب چغل خور کو اچھی طرح معلوم ہوگیا کہ کسان اس کی باتوں پر یقین کر چکا ہے تو وہ وہاں سے سیدھا کسان کی بیوی کے بھائیوں کے پاس چلا گیا۔ اس نے کسان کے سالوں کو اکساتےہوئے کہا کہ تم کیسے بھائی ہو؟ کہ تمھیں اپنی بہن کی کوئی پروا نہیں ہے۔ تم اس سے بےفکر ہوک یہاں مزے اور سکون کی زندگی گزار رہے ہو۔ شیخ سعدی کا فرمان ہے: 

                  ✌" چغل خور دو آدمیوں کو لڑانے کےلیے ایندھن لانے والا ثابت ہوتا ہے"۔✌

               چغل خور مزید لگائی بجھائی کرتے ہوئے کسان کے سالوں سے کہنے لگا کہ تمھارا بہنوئی روزانہ تمھاری بہن کو مارتاہےاور اس شدت سے اس پر ظلم کرتا ہے کہ وہ بےچاری بےہوش ہوکر رہ جاتی ہے۔ کسان جس طرح بےرحمی سے تمھاری بہن کو مارتا ہے اسے بیان کرنے کےلیے میرے پاس الفاظ نہیں۔ تمھیں اپنی بہن کی مدد کرنی چاہیے مگر تم ہو کہ اس بات سےمکمل لاعلم ہو۔ میں کسان کے تمھاری بہن پرکیے گئے مظالم اور اس کی سنگ دلی سے کی گئی مارپیٹ کو بیان ہی نہیں کرسکتا۔

                                                        aufsurani.blogspot.com