پیراگراف نمبر 7چغل خور

 aufsurani.blogspot.com

                                                                   سبق: چغل خور

                                             پیراگراف نمبر7

                                                           ✍        اقتباس: 

                                        جوں ہی وہ چھاچھ کا مٹکا ۔۔۔۔۔۔۔۔۔ کاٹ کھانے کو دوڑتی ہے۔

                                                        ✍       حوالۂ متن: 

                                                 سبق کا عنوان:                 چغل خور

                                                 مصنف کا نام:                 شفیع عقیل

                                                        صنف:                لوک داستان

                                                           ماخذ:                پنجابی لوک داستانیں

                                                    ✍   خط کشیدہ الفاظ کےمعانی:

                             جوں ہی ۔۔۔۔ جیسے ہی۔                             چنگیری ۔۔۔۔ روٹی رکھنے کا گول ظرف۔

                              بہانے ۔۔۔۔ عذر، حیلے۔                            سرکنا ۔۔۔۔ حرکت کرنا۔

                           جھپٹ کر ۔۔۔۔  لپک کر، حملہ آور ہوکر۔               کلائی ۔۔۔۔ بازو اور ہاتھ کا جوڑ۔

                               یقین ۔۔۔۔ اعتماد، بھروسا۔                     کاٹ کھانا ۔۔۔۔ نقصان پہنچانا، اذیت دینا۔

              سیاق و سباق:

                              تشریح طلب اقتباس درسی سبق " چغل خور"کے درمیان سے اخذ کیا گیا ہے۔ اس کا سیاق و سباق یہ ہےکہ کسان کی بیوی نےچغل خور کے کہے کے مطابق کسان کو روٹی دینے کے بہانے اسے چاٹنے کی کوشش کی تو کسان پرے ہٹ گیا۔کسان کو چغل خور کی بتائی ہوئی بات پر یقین ہو گیا کہ اس کی بیوی واقعی پاگل ہوگئی ہے اور کاٹ کھانے کو دوڑتی ہے۔ کسان کی  پیچھے ہٹنے کی حرکت دیکھ کر  اس کی بیوی سوچنے لگی کہ نوکر ٹھیک ہی کہتا تھا۔ کسان واقعی کوڑھی ہوگیا ہے۔

                تشریح:         

                           لوک داستان کسی معاشرے ، تہدیب اور ثقافت کی ایسی کہانی ہوتی ہے جو سینہ بہ سینہ سفر کرتے ہوئے ایک نسل سے دوسری نسل میں منتقل ہوتی ہے۔ اس کے مصنف کا کوئی پتا نہیں ہوتا۔ اردو کے نامور ادیب شفیع عقیل نے مختلف تہذیب و ثقافت سے تعلق رکھنے والی  لوک داستانوں کے اردو تراجم کرکےبڑی علمی و ادبی اور ثقافتی خدمات سرانجام دیں۔" چغل خور " بھی ایسی ہی لوک داستان ہے جس میں چغل خوری کے نقصان اور اس کے معاشرے پر پڑنے والے گہرے اثرات کو اجاگر کیا گیا ہے۔

                  تشریح طلب اقتباس میں مصنف چغل خور کے کردار اور اس کے نتیجے میں پیدا ہونے والے بُرے اثرات کو اجاگر کرتا ہے۔ چغل خور نے  کسان کے کوڑھی ہونے کا بتا کر کسان کی بیوی کو اس سے بدگمان کیا اور یہ بھی کہا کہ تم کسان کا جسم چاٹ کر اس کے کوڑھی ہونے کی تسلی کر سکتی ہو۔اس نے کسان کو بھی  یہ کہ کر بدگمان کردیا کہ تمھاری بیوی پاگل ہوچکی ہےاور کاٹنے کو دوڑتی ہے۔چناں چہ دوسرے دن جب کسان کی بیوی روٹی لے کر کھیتوں میں کسان کے پاس گئی تو کسان پہلے ہی اس کی طرف سے چوکنا ہوکر بیٹھا تھا۔کسان کی بیوی لسّی کا مٹکا اور روٹیوں کی چنگیری زمین پر رکھ کر بیٹھی تو کسان اس سے محتاط ہوکر پیچھے ہٹ گیا۔اس کی بیوی اسے کھانا دینے کے بہانے اس کے مزید قریب ہوگئی۔کسان نے جیسے ہی روٹی لینے کےلیے ہاتھ آگے کیا تو اس کی بیوی نے لپک کر اس کی کلائی کو پکڑ لیا اور چغل خور کے کہے کے مطابق کسان کو چاٹنے کی کوشش کرنے لگی۔ کسان خود کو اس سے بچاتے ہوئے تیزی سے دُور ہٹ گیا۔

                  کسان کو چغل خور کی بات پر یقین ہوگیا کہ اس کی بیوی سچ مچ میں پاگل ہوچکی ہے اور اسی پاگل پن میں انسان کو کاٹنے کی کوشش کرکے اسے ایذا پہنچانے کی کوشش کرتی ہے۔اس طرح چغل خور کی بری عادت کی وجہ سے دونوں میاں بیوی کے درمیان غلط فہمی اور بدگمانی پیدا ہوگئی۔ بقول شاعر:

                                        ؎   چغلی نکال کر زبان سے    عجب کھیل دکھائے

                                         انسانوں کے رشتوں میں اک دراڑ سی پڑ جائے

                                             aufsurani.blogspot.com