سبق: ملمع
پیراگراف نمبر10
✍ اقتباس:
"لے آؤ سامان" وہ ایک دل فریب ۔۔۔۔۔۔۔۔ ایک دم کِھل اٹھا۔
✍ حوالۂ متن:
سبق کا عنوان: ملمع
مصنفہ کا نام: ہاجرہ مسرور
صنف: افسانہ
ماخذ: سب افسانےمیرے
✍ خط کشیدہ الفاظ کے معانی:
دل فریب ۔۔۔۔ دل کش۔ مسکراہٹ ۔۔۔۔ ہنسی، مسرت، خوشی۔
گھورنا ۔۔۔۔ تکنا، غور سے دیکھنا۔ تہ تک پہنچنا ۔۔۔۔ مکمل سمجھنا۔
بھانپنا ۔۔۔۔ سمجھ لینا، پرکھ لینا۔ چمکتی ہوئی ۔۔۔۔ روشن، چمک دار۔
اٹھنی ۔۔۔۔ آٹھ آنے، آدھا روپیا۔ حقارت ۔۔۔۔ نفرت۔
جذبات ۔۔۔۔ جذبہ کی جمع، جوش و ولولے۔ باعث ۔۔۔۔ وجہ، سبب۔
چہرہ لٹکا ہونا ۔۔۔۔ افسردہ ہونا، ناخوش ہونا، مایوس ہونا۔ کِھل اٹھنا ۔۔۔۔ مسکرانا، خوش ہونا۔
مزدوری ۔۔۔۔ اجرت ۔ معاملات ۔۔۔۔ لین دین، کام کاج۔
غرض ۔۔۔۔ مقصد، مطلب، لالچ۔ یقین ۔۔۔۔ اعتماد، بھروسا۔
ہلکے پھلکے ۔۔۔۔ تھوڑے بہت، معمولی سے۔ اسباب ۔۔۔۔ سازوسامان۔
اٹھوائی ۔۔۔۔سامان ایک جگہ سے دوسری جگہ رکھوانا۔
✍ سیاق و سباق:
تشریح طلب اقتباس درسی سبق " ملمع" کے درمیان سے اخذ کیا گیا ہے۔ اس کا سیاق وسباق یہ ہےکہ ایک لڑکی اپنے بیمار چچا کی عیادت کی غرض سے جانے کےلیے ریلوے سٹیشن پر موجود تھی۔وہاں اس کا سامنا ایک امیر زادے سے ہوا۔ وہ اس سے متاثر ہو کر اپنی غربت زدہ اصلیت اس سے چھپانا چاہتی تھی۔جب لڑکی ڈبے پر سوار ہونے کے دوران ہجوم میں پھنسی تو ایک خاتون نے دھکا دے دیا۔ وہ لڑکا یہ سب دیکھ کر مسکرا رہا تھا۔ لڑکی کو اس نوجوان کے سامنے سبکی محسوس ہوئی۔ اس نے اس معاملے کو نظرانداز کرنے کےلیے درجوں پر لکھی عبارت پڑھنا شروع کر دی۔زنانہ انٹر کا درجہ پڑھتے ہی اسے احساس ہوا کہ یہ درجہ موسلادھار بارش میں اس کےلیے گھنے درخت کے سائے کی مانند ہے۔ وہ بلا سوچے سمجھے اس میں داخل ہوگئی۔
✍ تشریح:
ہاجرہ مسرور اردو ادب کی نامور مصنفہ اور افسانہ نگار تھیں۔ ان کے افسانوں میں خواتین کے مسائل کے ساتھ ساتھ دیگر معاشرتی مسائل کو بھی اجاگر کیا گیا ہے۔ " ملمع " بھی ان کا تحریر کردہ ایسا افسانہ ہے جس میں وہ معاشرتی رویوں میں پائی جانے والی ملمع کاری، دکھاوے اور نمودونمائش سے پردہ اٹھاتی ہیں۔
تشریح طلب اقتباس میں مصنفہ ہاجرہ مسرور اس لڑکی کے متعلق بیان کر رہی ہے جو اپنے بیمار چچا کی عیادت کے سلسلے میں سفر کرنے کےلیے ریلوے سٹیشن پر موجود تھی۔ وہاں وہ ایک امیرزادے سے اپنی غربت زدہ اصلیت چھپانے کی کوشش کر رہی تھی۔ اسی کوشش میں وہ تھرڈ کلاس کا ٹکٹ لیے ہوئے ہونے کے باوجود بلا سوچے سمجھے زنانہ انٹر کلاس کے ڈبے میں داخل ہوگئی۔لڑکی نے ڈبےمیں داخل ہوتے ہی خوب صورت اور مسکراتے چہرے کے ساتھ قلی سے مخاطب ہوکر کہا کہ میرا سامان اندر لے آؤ۔ قلی نے سامان اندر تو رکھ دیا لیکن وہ لڑکی کی اس حرکت پر کافی حیران کھڑا تھا۔ اسے سمجھ نہیں آ رہی تھی کہ لڑکی تھرڈ کلاس کا ٹکٹ لے کر انٹر کلاس میں داخل کیوں ہوئی؟ وہ لڑکی کو تک کر اور غور سے دیکھ رہا تھا جیسا کہ وہ جاننا چاہ رہا ہو کہ لڑکی نے ایسا کیوں کیا ؟ لڑکی قلی کے چہرے کے تاثرات سے سارے معاملے کو سمجھ گئی۔ بقول شاعر:
؎ احباب کو دے رہا ہوں دھوکا
چہرے پر خوشی سجا رہا ہوں
لڑکی نہیں چاہتی تھی کہ قلی کی وجہ سے اس کی حرکت کا بھانڈا پھوٹ جائے اس لیے اس نے اپنا بٹوہ کھول کر اس میں سے آٹھ آنے کا چمک دار سکہ نکالا اور قلی کے حوالے کردیا۔ قلی جو پہلے لڑکی کی عجیب و غریب حرکات کے باعث اس کےلیے نفرت کے جذبات اپنے اندر رکھے ہوئے تھا اور اس کے چہرے پر خفگی کے آثار بھی نمایاں تھے مگر آٹھ آنے کا سکہ ملتے ہی اس کا مرجھایا چہرہ پُر رونق ہوگیا اور وہ خوشی سے کھل اٹھا۔ ایک مزدور کا اصل مدعا اس کی بروقت مزدوری ہوتا ہے۔ اس کی خوشی اس میں ہوتی ہے کہ اسے اس کے کام کا اجر اچھا اور بروقت میسر آئے۔ جیسا کہ حدیث مبارکہ میں ہے:
✌ " مزدور کو اس کی مزدوری پسینہ خشک ہونے سے پہلے ادا کی جائے۔( ابن ماجہ) ✌
چناں چہ قلی کو بھی اس کی اجرت بروقت مل گئی۔ اب اسے لڑکی اور اس کے معاملات سے کوئی غرض نہیں تھی۔اسے معمولی سا سامان اٹھانے پر اس قدر معاوضے کی توقع نہیں تھی۔ اسے اتنا معاوضہ ملنے پر یقین بھی نہیں آ رہا تھا اس لیے وہ معاوضے میں ملنے والی اٹھنی کو ہاتھ سے مسل کر خود کو یقین دلانے کی کوشش کر رہا تھا کہ کیا واقعی معمولی سے کام کی اجرت اتنی زیادہ مل سکتی ہے جو اسےمل گئی تھی۔
No comments:
Post a Comment