سبق: ملمع
پیراگراف نمبر12
✍ اقتباس:
اس وقت ٹکٹ اس کے ہاتھ میں ۔۔۔۔۔۔۔ یہ احساس اس کے سینے کو برما رہا تھا۔
✍ حوالۂ متن:
سبق کا عنوان: ملمع
مصنفہ کا نام: ہاجرہ مسرور
صنف: افسانہ
ماخذ: سب افسانے میرے
✍ خط کشیدہ الفاظ کے معانی:
ایک من ۔۔۔۔ چالیس کلو کا وزن۔ بوجھ ۔۔۔۔ وزن۔
تذبذب ۔۔۔۔ فکرمندی، پریشانی۔ شکست ماننا ۔۔۔۔ ہار قبول کرنا، ہمت ہار جانا۔
مضمحل ۔۔۔۔ تھکے ماندے، بوجھل۔ چھینٹ ۔۔۔۔ قطرہ ۔
شرابور ۔۔۔۔ تر ہونا ، بھیگا ہونا۔ نگاہ ۔۔۔۔ نظر، دید۔
درجہ ۔۔۔۔ حیثیت، رتبہ، مقام۔ احساس ۔۔۔۔ محسوس ہونا ، دل کو لگنا۔
برمانا ۔۔۔۔ زخمی کرنا، برمے سے چھید کرنا، گھائل کرنا۔ سینے کو برمانا ۔۔۔۔ سینے کو چھلنی کرنا۔
✍ سیاق و سباق:
تشریح طلب اقتباس درسی سبق " ملمع " کے آخری حصے سے اخذ کیا گیا ہے۔اس کا سیاق و سباق یہ ہے کہ ایک لڑکی اپنے بیمار چچا کی عیادت کو جانے کےلیے ریل گاڑی کا سفر کر رہی تھی۔ جہاں اس نے ایک امیرزادے سے متاثر ہو کر اس سے اپنی غربت زدہ اصلیت چھپانے کی کوشش کی۔ اس نے تھرڈ کلاس کا ٹکٹ خرید کر محض نوجوان کی نظروں میں اہم بننے کےلیے انٹر کلاس میں سفر کیا۔اپنے مطلوبہ اسٹیشن پر اترنے کے بعد لڑکی گیٹ پر بھی اپنا تھرڈ کلاس کا ٹکٹ لڑکے سے چھپانا چاہتی تھی مگر وہ اس میں کامیاب نہ ہوسکی اور لڑکا اس کی اصلیت جان گیا ۔ لڑکی جب اپنے چچاکے گھر پہنچی تو اس کا گرم جوشی سے استقبال کیا گیا مگر وہ اس گرم جوشی کے مقابلے میں بہت سرد دکھائی دے رہی تھی۔
✍ تشریح:
ہاجرہ مسرور اردو ادب کی نامور مصنفہ اور افسانہ نگار تھیں۔ ان کے افسانوں میں خواتین کے مسائل کے ساتھ ساتھ دیگر معاشرتی مسائل کو بھی اجاگر کیا گیا ہے۔ " ملمع " بھی ان کا تحریر کردہ ایسا افسانہ ہے جس میں وہ معاشرتی رویوں میں پائی جانے والی ملمع کاری، دکھاوے اور نمودونمائش سے پردہ اٹھاتی ہیں۔
تشریح طلب اقتباس میں مصنفہ ہاجرہ مسرور اس لڑکی کا واقعہ بیان کر رہی ہے جس نے ایک امیر زادے کے سامنے ریل گاڑی کے پورے سفر کے دوران اپنی غربت زدہ اصلیت چھپا لی تھی مگر آخر میں ریل گاڑی سے اترنے کے بعد گیٹ پر ٹکٹ جمع کراتے وقت وہ اس نوجوان سے اپنا تھرڈ کلاس کا ٹکٹ نہ چھپاسکی اور اسے اپنی شکست تسلیم کرتے ہوئے نوجوان کے سامنے ہی ٹکٹ دینا پڑا۔
لڑکی نوجوان سے اپنی اصلیت نہ چھپا سکنے پر افسردہ تھی۔ وہ بوجھل اور تھکے ماندے قدموں کے ساتھ ریلوے اسٹیشن سے باہر نکل آئی۔ وہ تمام سفر میں اس نوجوان کے سامنے خود کو امیرزادی بنا کر پیش کرنے میں کامیاب رہی تھی مگر آخری لمحے میں وہ اپنی اصلیت چھپانے میں مکمل ناکام ہوگئی۔ اس کی مثال اس شخص کی سی ہوگئی تھی جس نے اپنے کپڑوں کو پانی میں بھیگنے سے بچا کر دریا تو پار کرلیا ہو مگر عین کنارے پر پہنچ کر وہ پھسل گیا ہو جس سے اس کی خود کو بچانے کی ساری محنت رائیگاں ہوگئی ہو۔ بالکل ایسے ہی لڑکی بھی پورے سفر میں نوجوان کے سامنےاپنی اصلیت چھپانے میں کامیاب رہی مگر عین آخری لمحے میں گیٹ پر ٹکٹ جمع کراتے وقت وہ اپنے تمام تر ملمع کو بےنقاب کر بیٹھی۔ وہ نوجوان اب لڑکی کو کہیں نظر نہیں آ رہا تھا جس سے واضح تھا کہ اب وہ اس کے نزدیک کوئی حیثیت نہیں رکھتی تھی کیونکہ اس کی تمام کارستانی جان گیا تھا۔ یہی احساس لڑکی کے دل کو چھلنی کر رہا تھا اور وہ اسی دکھ میں تانگے پر بیٹھ کر رونے لگی۔ بقول شاعر:
؎ اصل سونے پر تھا جتنا بھی ملمع جل گیا
دھوپ اس شدت کی الفاظ و معانی پر پڑی
No comments:
Post a Comment