aufsurani.blogspot.com
سبق: نام دیو مالی
پیراگراف نمبر2
✍ اقتباس:
مقبرے کاباغ میری نگرانی میں تھا۔۔۔۔۔ اس کی حرکتیں دیکھ کر بہت تعجب ہوتا۔
✍ حوالۂ متن:
سبق کا عنوان: نام دیو مالی
مصنف کا نام: مولوی عبدالحق
صنف: خاکہ نگاری
ماخذ: چند ہم عصر
✍ خط کشیدہ الفاظ کے معانی:
مقبرہ ۔۔۔۔قبر، لحد۔ نگرانی ۔۔۔۔ حفاظت، دیکھ بھال۔
احاطہ ۔۔۔۔صحن۔ چمن ۔۔۔۔ باغ۔
مصروف ۔۔۔۔ مشغول۔ ہمہ تن ۔۔۔۔ مکمل طور پر۔
تعجب ۔۔۔۔ حیرانی۔
سپرد کرنا ۔۔۔۔ حوالے کرنا، سونپنا۔
✍ سیاق و سباق:
تشریح طلب اقتباس درسی سبق " نام دیو مالی " کے ابتدائی حصے سے اخذ کیا گیا ہے۔ اس کا سیاق و سباق یہ ہے کہ مصنف مقبرہ رابعہ دورانی اورنگ آباد کےباغ کے حوالے سے بتاتا ہے کہ اس کی نگرانی میرے ذمہ تھی۔ میں نے وہاں چمن بنانے کا کام نام دیو مالی کے سپرد کر دیا جو ذات کا تو "ڈھیڑ" تھا لیکن سچائی اور خلوص اس کے کام میں نمایاں نظر آتا تھا۔وہ پودوں کی انتہائی نگہداشت کرتا ۔وہ پودوں کے تھانولے صاف کرتا، انھیں پانی دیتا اور ہر پودے کو مڑ مڑ کر دیکھتا۔ وہ پودوں کو توانا دیکھ کر بہت خوش ہوتا۔
✍ تشریح:
مولوی عبدالحق اردو ادب کے نامور اور بلند پایہ محقق ، نقاد ، خاکہ نگار اور عمدہ انشاپرداز تھے۔انھوں نے اردو زبان و ادب کے فروغ میں نمایاں کردار ادا کیا۔ اردو کے حوالے سے نمایاں خدمات پر انھیں " بابائے اردو" کا لقب ملا۔ درسی سبق " نام دیو مالی " ان کی خاکہ نگاری کا عمدہ نمونہ ہے۔ اس میں وہ نام دیو مالی کی محنت ، ایمانداری اور اس کے پُرعظمت کام کو اجاگر کرتے ہیں۔
تشریح طلب اقتباس میں مصنف مقبرہ رابعہ دورانی اورنگ آباد کے گردونواح میں واقع باغ اور وہاں کے مالی نام دیو کے متعلق بیان کرتا ہے کہ مقبرے کا مکمل باغ میری نگرانی میں تھا اور اس باغ کے صحن میں ایک مکان تھا جس میں مَیں رہائش پذیر تھا۔ اپنے بنگلہ نما مکان کے سامنے کے حصے کو خوب صورت باغ میں تبدیل کرنے کےلیے اس میں پودے لگانے کی ذمہ داری میں نے نام دیو مالی کے سپرد کردی۔نام دیو اپنے کام سے لگن رکھنے والا اور انتہائی ایماندار شخص تھا اس لیے وہ ہی اس کام کو مکمل ذمہ داری سے سرانجام دے کر اسے پایۂ تکمیل تک پہنچا سکتا تھا۔ جیسا کہ حضرت علیؓ کا فرمان ہے:
✌" کسی شخص کی قدروقیمت کا اندازہ اس کے اندر پائی جانے والی احساسِ ذمہ داری سے ہوتا ہے"۔✌
مصنف کہتا ہے کہ میرے کمرے میں بڑی سی کھڑکی لگی ہوئی تھی۔ وہ کھڑکی میری میز کے بالکل سامنے تھی۔میں وہاں بیٹھ کر لکھنے پڑھنے میں مصروف رہتا۔ میں اس کھڑکی سے باہر باغ کو آسانی کے ساتھ دیکھ سکتا تھا۔ لکھنے پڑھنے کے دوران جب بھی کھڑکی سے باہر باغ کی طرف میری نظر جاتی تو میں نام دیو مالی کو دیکھتا کہ وہ پورے انہماک اور توجہ کے ساتھ باغ اور اس میں موجود پودوں کی خدمت اور ان کی دیکھ بھال میں مصروف ہوتا تھا۔وہ پودوں کی حفاظت اور ان کی آبیاری میں جانفشانی سے مگن ہوتا۔ بعض اوقات وہ پودوں کو ہر زاویے سے اس طرح عجیب و غریب حرکتیں کرکے پرکھتا کہ اسے دیکھ کر میں حیرت میں مبتلا ہو جاتا۔ ایک قول ہے:
✌" خلوص اور لگن جس کام میں بھی ہو وہ اپنے اندر کشش رکھتا ہے۔ "✌
No comments:
Post a Comment