سبق: مجھے میرے دوستوں سے بچاؤ
پیراگراف نمبر21
✍ اقتباس:
مل ملا کر شام کو واپس آئے ۔۔۔۔۔۔۔۔ دوست کو بھی چھوڑ دوں گا۔
✍ حوالۂ متن:
سبق کا عنوان: مجھے میرے دوستوں سے بچاؤ
مصنف کانام: سجاد حیدر یلدرم
صنف: افسانہ
ماخذ: خیالستان
✍ خط کشیدہ الفاظ کے معانی:
مل ملا کر ۔۔۔۔ ملنے کے بعد، ملاقات کرکے۔ بے ربط ۔۔۔۔ بےسروپا۔
بےسلسلہ ۔۔۔۔ بےترتیب۔ رنج ۔۔۔۔ غم ، دکھ ۔
میزبان ۔۔۔۔ مہمان نوازی کرنے والا۔ ناراض ۔۔۔۔ ناخوش۔
ناشکرا ۔۔۔۔ جو شکرگزار نہ ہو۔ احسان فراموش ۔۔۔۔ احسان بھلا دینے والا۔
مجبور ۔۔۔۔ لاچار، بےکس بےربط و بےسلسلہ ۔۔۔۔ بےسروپا، جس میں ربط اور تسلسل نہ ہو
✍ سیاق و سباق:
تشریح طلب اقتباس درسی سبق " مجھے میرے دوستوں سے بچاؤ " کے آخری حصے سے لیا گیا ہے۔ اس کا سیاق و سباق یہ ہے کہ مصنف کا دوست شاکر مصنف کو اپنے دوستوں سے ملانے اور سیروتفریح کےلیے کہیں لے جانا چاہتا تھا تو اس دوران مصنف سے پوچھتا ہے کہ آج تو صفحے کے صفحے لکھ ڈالے ہوں گے۔ مصنف جواب دیتا ہے کہ کچھ بھی نہیں لکھ سکا مگر وہ اس پر یقین نہیں کرتا اور اسے کسر نفسی شمار کرتا ہے۔آخر میں مصنف کہتا ہے کہ میرے ایسے دوستوں کی فہرست یہیں ختم نہیں ہوتی بلکہ اور بھی ایسے احباب موجود ہیں جن سے میں رخصت طلب کرسکتا ہوں۔
✍ تشریح:
سجاد حیدر یلدرم اردو ادب کے نامور مصنف اور افسانہ نگار تھے۔ان کے افسانوں میں رومانیت کا رنگ غالب ہوتا ہے اور یہ انشائے لطیف کا بھی عمدہ نمونہ ہیں۔ ایسا ہی ان کا افسانہ "مجھے میرے دوستوں سے بچاؤ" ہے جس میں وہ اپنے مخلص دوستوں سے عاجز نظر آتے ہیں اور انھیں ہر صورت چھوڑ دینے کے درپے ہیں۔
تشریح طلب اقتباس میں مصنف کہتا ہے کہ شام کو جب شاکر صاحب کے دوستوں سے مل ملا کر جب ہم واپس آئے تو کھانا کھایا اور کچھ گپ شپ کی۔ جب نیند کرنے کا وقت آیا تو میں سونے سے پہلے پورے دن میں اپنا لکھا ہوا کام دیکھتا ہوں کیونکہ میرا اصل مقصد مضمون لکھنا ہی تھا جس کےلیے یہاں آیا تھا۔ میرا لکھا گیا مضمون ایک صفحے سے بڑھ کر نہیں تھا اور وہ ایک صفحہ بھی بےسروپا لکھا ہوا تھا۔لکھی ہوئی باتوں کی نہ تو کوئی ترتیب تھی اور نہ ہی جملوں میں کوئی تسلسل اور ربط تھا۔
مجھےاپنی دن بھر کی محنت ضائع ہونے پر بہت دکھ اور افسوس ہوتا ہے اور میں اس دکھ اور افسوس میں اپنا لکھا ہوا مضمون پھاڑ دیتا ہوں۔ اگلے روز اپنے میزبان دوست شاکر خان سے اپنی ناراضی کا اظہار کرتا ہوں کہ جس مقصد کےلیے میں یہاں آیا تھا وہ کچھ بھی پورا نہ ہوسکا اور میں سوائے وقت کے ضیاع اور کچھ نہ کرسکا۔ اپنے دوست کو ناراض کرکے میں واپس اپنے گھر چلا آتا ہوں۔اگرچہ اس طرح اپنے دوست کو ناراض کرنے پر مجھے ناشکرگزاری کرنے والا اور احسان بھلا دینے والا ہی سمجھا جائے گا مگر مجھے اس کی کوئی پروا نہیں کیونکہ میں ایسا کرنے پر مجبور ہوچکا ہوں ۔اپنے کام کےلیے دوستوں کی ناراضی مول لینا اور انھیں چھوڑنا میری مجبوری بن چکا ہے اس لیے میں شاکر خان جیسے اپنے مہربان دوست کو بھی چھوڑ دوں گا۔ بقول شاعر:
~ بچا کے رکھنا محبت کے پھیر سے خود کو
یہ اچھے اچھوں کی حالت بگاڑ دیتی ہے
No comments:
Post a Comment