سبق: مجھے میرے دوستوں سے بچاؤ
پیراگراف نمبر18
✍ اقتباس:
آخر کار میں نےوہی اپنا پرانا ۔۔۔۔۔۔۔۔۔ ہمہ تن مشغول ہوگیا۔
✍ حوالۂ متن:
سبق کا عنوان: مجھے میرے دوستوں سے بچاؤ
مصنف کا نام: سجاد حیدر یلدرم
صنف: افسانہ
ماخذ: خیالستان
✍ خط کشیدہ الفاظ کے معانی:
استعمالی ۔۔۔۔ قابل استعمال۔ مفید ۔۔۔۔ فائدہ مند
معمولی ۔۔۔۔ واجبی سی، ہلکی سی۔ نہایت ۔۔۔۔ بہت زیادہ۔
ایمانداری ۔۔۔۔ دیانت داری، لگن۔ پراں ۔۔۔۔ دُور، بکھرے ہوئے۔
خیالات ۔۔۔۔ خیال کی جمع، تصورات۔ قفس ۔۔۔۔ قید خانہ، پنجرہ۔
قفسِ کاغذ ۔۔۔۔ کاغذ کی قید میں ہونا، قلم بند کرنا۔ مرغان ۔۔۔۔ پرندے۔
خوش نوا ۔۔۔۔ اچھی آواز والے۔ مرغانِ خوش نوا ۔۔۔۔ اچھی آواز والے پرندے۔
تعریف ۔۔۔۔ ستائش۔ شعرا ۔۔۔۔ شاعر کی جمع، شعر و شاعری کرنے والے۔
رطب اللسان ۔۔۔۔ بہت تعریف کرنے والے۔ عنایت ۔۔۔۔ شفقت، مہربانی۔
کان بند کرنا ۔۔۔۔ توجہ ہٹا لینا، کان نہ دھرنا۔ ہمہ تن ۔۔۔۔ مکمل طور پر، سربسر۔
مشغول ہونا ۔۔۔۔ مصروف ہونا، مگن ہونا۔
✍ سیاق و سباق:
تشریح طلب اقتباس درسی سبق " مجھے میرے دوستوں سے بچاؤ " کے درمیان میں سے اخذ کیا گیا ہے۔ اس کا سیاق و سباق یہ ہے کہ مصنف کہتا ہے کہ اپنے دوست شاکر خان کے ہاں قیام کے دوران کمرے میں مجھے لکھنے کی غرض سے جو سازوسامان مہیا کیا گیا تھا وہ اگرچہ قیمتی اور نایاب تھا مگر وہ کسی طور بھی میرے لکھنے میں مددگار ثابت نہ ہوا۔ اس لیے میں نے اپنے پرانے قلم دوات سے ہی لکھنا شروع کر دیا۔ میں دنیا و مافیہا سے بےنیاز ہوکر لکھ ہی رہا تھا کہ تَن تَن کی آواز نے چونکا دیا۔یہ ستار بجنے کی آواز تھی جو شاکر خان کے بھائی بڑی خوب صورتی سے بجا رہے تھے۔
✍ تشریح:
سجاد حیدر یلدرم اردو ادب کے نامور مصنف اور افسانہ نگار تھے۔ان کے افسانوں میں رومانیت کا رنگ غالب ہوتا ہے اور یہ انشائے لطیف کا بھی عمدہ نمونہ ہیں۔ ایسا ہی ان کا افسانہ "مجھے میرے دوستوں سے بچاؤ" ہے جس میں وہ اپنے مخلص دوستوں سے عاجز نظر آتے ہیں اور انھیں ہر صورت چھوڑ دینے کے درپے ہیں۔
تشریح طلب اقتباس میں مصنف کہتا ہے کہ جب میں نے اپنے کمرے میں موجود لکھنے کے سازوسامان کا جائزہ لیا تو اس میں سے کچھ بھی میرے لیے کارآمد ثابت نہ ہوا اس لیے مجبوراً میں نے اپنے پرانے بکس میں سے دوات اور قلم نکالا۔ یہ قلم دوات ہرگز قیمتی نہ تھے بلکہ واجبی سے تھے مگر انھوں نے ہمیشہ ایمانداری سے لکھنے میں میری مدد کی۔ میں ہمیشہ ان کی مدد سے بڑی تیزی سے اپنے بکھرے ہوئے خیالات کو یکجا اور مرتب کرکے کاغذ پر لکھ دیتا تھااور کاغذ انھیں اپنے اندر سمو کر اپنی قید میں جکڑ لیتا اور ہمیشہ کےلیے خود میں محفوظ کر لیتا تھا۔
مصنف کہتا ہے کہ میرے لکھنے کے دوران مجھے اپنے پرانے قلم دوات سے تو کوئی مسئلہ پیش نہ آیا البتہ باہر کھلی فضا میں موجود پرندوں کی خوش گوار آوازوں نے ضرور مداخلت کی۔ پرندوں کی خوب صورت چہچہاہٹ کو شعرا حضرات ہمیشہ پسند کرتے آئے ہیں اور اپنی شاعری میں ان پرکشش آوازوں کی تعریف اور ستائش بھی کرتے آئے ہیں۔ جیسا کہ شاعر کہتا ہے:
؎ پھوار ، ابر ، پرندوں کے گیت ، مست ہوا
بھرے کٹورے کی صورت چھلک رہی ہے فضا
مجھے ان پرندوں کی سریلی آواز اور ان کی چہچہاہٹ کسی طور پر پسند نہ آئی اور میں لکھنے کے دوران ان آوازوں کی مداخلت پر ذرا بھی خوش نہیں تھا کیونکہ سارے پرندے میرے کمرے کے نیچے موجود درخت پر جمع ہوگئے اور خوب شور مچاناشروع کر دیا جس سے لکھنے کے دوران میری توجہ ہٹ جاتی تھی۔ ان پرندوں کی اس طرح کی مداخلت کا حل میں نے یوں نکالا کہ میں نے ان کے شور کو مکمل نظرانداز کرکے اور ان سےاپنی توجہ ہٹا کر مکمل توجہ اپنے لکھنے پر لگادی اور پوری تن دہی اور انہماک سے لکھنے میں مصروف ہوگیا۔
No comments:
Post a Comment