پیراگراف نمبر12 مجھے میرے دوستوں سے بچاؤ

 

                                                        aufsurani.blogspot.com

                                                    سبق:    مجھے میرے دوستوں سے بچاؤ

                          پیراگراف نمبر12

                                                           ✍     اقتباس:

                                اسی طرح میرے مقدمے باز دوست۔۔۔۔۔۔۔۔۔خاص عنایت فرماتے ہیں۔

                                                          ✍   حوالۂ متن:

                                             سبق کا عنوان:                       مجھے میرے دوستوں سے بچاؤ

                                             مصنف کا نام:                              سجاد حیدر یلدرم

                                                   صنف:                                       افسانہ 

                                                     ماخذ:                                    خیالستان

                                                        ✍  خط کشیدہ الفاظ کے معانی:

                         مقدمے باز ۔۔۔۔ مقدمے کرنے والا، پرچے کرانے والا۔                ریاست ۔۔۔۔ جائیداد، زمینی ملکیت۔

                        فریقِ مخالف ۔۔۔۔ مدمقابل آنے والا۔                                     تعریف ۔۔۔۔ ستائش۔  

                             مضمون ۔۔۔۔ عنوان ، موضوع۔                                         مذمت ۔۔۔۔ مخالفت، تائید نہ کرنا۔

                          من جملہ ۔۔۔۔ مکمل ، تمام۔                                               عنایت ۔۔۔۔ شفقت ، مہربانی۔

             ✍     سیاق و سباق: 

                                        تشریح طلب اقتباس درسی سبق " مجھے میرے دوستوں سے بچاؤ " کے درمیان سے اخذ کیا گیا ہے۔ اس کا سیاق و سباق یہ ہے کہ مصنف اپنے دوستوں سے عاجز نظر آتا ہے اور انھیں چھوڑ دیناچاہتا ہے۔ اس حوالے سے وہ اپنے مختلف دوستوں کی کارستانی بیان کرتا ہے۔اپنے دوست محمد تحسین کے حوالے سے بیان کرتا ہے کہ وہ جس کسی سے ملتے ہیں اس سے اپنے گھر والوں کی بیماری کا ذکر کرتے رہتے ہیں پھر مقدے باز دوست کا احوال بیان کرنے کے ساتھ ساتھ شاکر خان کے متعلق کہتا ہے کہ وہ موضع سلیم پور کے رئیس اور نہایت معزز آدمی ہیں اور وہ اہلِ علم کی قدر کرنا امرا کی شایان شان سمجھتے ہیں۔

                ✍  تشریح:

                                          سجاد حیدر یلدرم اردو ادب کے نامور مصنف اور افسانہ نگار تھے۔ان کے افسانوں میں رومانیت کا رنگ غالب ہوتا ہے اور یہ انشائے لطیف کا بھی عمدہ نمونہ ہیں۔ ایسا ہی ان کا افسانہ "مجھے میرے دوستوں سے بچاؤ" ہے جس میں وہ اپنے مخلص دوستوں سے عاجز نظر آتے ہیں اور انھیں ہر صورت چھوڑ دینے کے درپے ہیں۔

                           تشریح طلب اقتباس میں مصنف اپنے ایک مقدمے باز دوست کے متعلق بیان کرتے ہوئے کہتا ہے کہ میرے اس دوست کو اپنے مخالفین پر مقدمے کرنے کے علاوہ اور کوئی کام نہیں۔انسانی زندگی میں تنازعات اور جائیداد کے حوالے سے جھگڑے وغیرہ ہوتے رہتے ہیں جنھیں باہم مل جل کر بہتر طریقے سے حل کرنا ہی بڑی اہمیت رکھتا ہے اور انھیں باہمی رضامندی سے سلجھا کر ختم کرنا ہی عقل مندی ہے۔ جیساکہ حدیث مبارکہ ہے:

 ✌" میں ضامن ہوں اس شخص کو وسط جنت میں گھر دلانے کا جس نے حق پر ہونے کے باوجود جھگڑا چھوڑ دیا"۔ (سنن ابوداؤد،حدیث نمبر1396)۔✌

لیکن میرا مقدمے باز دوست اپنی جائیداد کے تنازعات کو پُرامن طریقے سے حل کرنے کی بجائے وہ اپنے فریق کے خلاف مقدمے کرنے اور ان کی برائیاں کرنے میں مصروف رہتا ہے۔ جائیداد کے تنازع پر اسے اپنے مقدمات اور عدالتی معاملات کے علاوہ اور کسی چیز کی فکر نہیں ہوتی۔ فریقِ ثانی کو مقدمات میں گھسیٹتے ہوئے اگر میرا دوست مقدمہ جیت جاتا تو جج صاحب کی تعریف و ستائش میں زمین و آسمان کے قلابےملا دیتا اور مقدمہ ہار جانے کی صورت میں جج صاحب کی عیب جوئی شروع کر دیتا اور اس کے فیصلے کی مذمت اور مخالفت کرتے رہنے کے علاوہ اور کسی موضوع پر کوئی گفتگو کرتا ہی نہیں تھا۔ جیسا کہ کہاوت ہے

                                                  ✌"  میٹھا ہپ ہپ اور کڑوا تھو تھو "۔✌

        مصنف کہتا ہے کہ مختلف کردار اور سوچ کے حامل میرے اور بھی بہت سے دوست احباب ہیں لیکن ان سب سے زیادہ قابلِ ذکر دوست محمد شاکر خان صاحب ہیں اس لیے میں ان کا ذکر خاص طور پر کرنا چاہوں گا کیونکہ وہ میرے بہترین دوست ہیں۔ مجھ سے ہمیشہ شفقت اور مہربانی سے پیش آتے ہیں اور مجھ سے والہانہ لگاؤ بھی رکھتے ہیں۔ بقول ناصر کاظمی:

                                                   ؎          وہ کوئی دوست تھا اچھے دنوں کا

                                                            جو پچھلی رات سے یاد آ رہا ہے