پیراگراف نمبر19 مجھے میرے دوستوں سے بچاؤ

 

                                                     سبق: مجھے میرے دوستوں سے بچاؤ

                                 پیراگراف نمبر19

                                                          ✍      اقتباس:

                                         بادلِ نخواستہ میں اٹھا ۔۔۔۔۔۔۔۔۔۔ دکھایا جاؤں گا۔

                                                         ✍     حوالۂ متن:

                                              سبق کا عنوان:                  مجھے میرے دوستوں سے بچاؤ

                                               مصنف کا نام:                  سجاد حیدر یلدرم

                                                      صنف:                   افسانہ 

                                                         ماخذ:                  خیالستان

                                                    ✍  خط کشیدہ الفاظ کے معانی:

                   بادلِ نخواستہ ۔۔۔۔ نہ چاہتے ہوئے۔                              تعارف ۔۔۔۔ جان پہچان، واقفیت۔

             تشریف لے جانا ۔۔۔۔ چلے جانا، رخصت ہونا۔                         فرصت ۔۔۔۔ فراغت۔

                     یک سُو ۔۔۔۔ مکمل توجہ سے، انہماک اور دل جمعی سے۔      کھٹکھٹایا ۔۔۔۔ دستک دی۔

                     میزبان ۔۔۔۔ مہمان نوازی کرنے والا۔

            ✍     سیاق و سباق: 

                                    تشریح طلب اقتباس درسی سبق "مجھے میرے دوستوں سے بچاؤ" کے درمیان سے اخذ کیا گیا ہے۔ اس کا سیاق و سباق یہ ہے کہ مصنف کہتا ہے کہ شاکر خان کے ہاں قیام کے دوران جب میں لکھنے میں مصروف تھا تو شاکر کے نوکر شبن نے آکر کہا کہ نیچے شاکر صاحب آپ کو بلا رہے ہیں۔ وہ کسی صاحب سے آپ کو ملوانا چاہتے ہیں۔ گویا میں ان کے نزدیک اس عربی گھوڑے کی طرح تھا جسے میرے میزبان دوست نے خرید رکھا تھا اور اپنے ہر دوست کو وہ گھوڑا ضرور دکھاتا تھا۔

                 ✍    تشریح : 

                                    سجاد حیدر یلدرم اردو ادب کے نامور مصنف اور افسانہ نگار تھے۔ان کے افسانوں میں رومانیت کا رنگ غالب ہوتا ہے اور یہ انشائے لطیف کا بھی عمدہ نمونہ ہیں۔ ایسا ہی ان کا افسانہ "مجھے میرے دوستوں سے بچاؤ" ہے جس میں وہ اپنے مخلص دوستوں سے عاجز نظر آتے ہیں اور انھیں ہر صورت چھوڑ دینے کے درپے ہیں۔

                        تشریح طلب اقتباس میں مصنف کہتا ہے کہ جب مجھے معلوم ہوا کہ شاکر خان مجھے کسی صاحب سے ملوانا چاہتے ہیں تو میں نہیں چاہتا تھا کہ اپنا لکھنے کا کام چھوڑ کر اپنے کمرے سے نکل کر نیچے جاؤں مگر مجبوری تھی اس لیے نہ چاہتے ہوئے بھی نیچے چلا گیا۔جب میں نیچے پہنچا تو دیکھا کہ شاکر صاحب کے دوست راجا طالب علی آئے ہوئے تھے جوکہ احمد نگر کے رئیس تھے۔ شاکر صاحب مجھے ان سے ملوانا چاہتے تھے۔ شاکر خان نے میرا ان سے تعارف کرایا جس سے ہماری ایک دوسرے سے اچھی جان پہچان اور واقفیت ہوگئی۔

                        راجا طالب علی جب تھوڑی دیر قیام کرنے کے بعد چلے گئے اور مجھے بھی فراغت مل گئی تو میں اپنے کمرے میں آکر دوبارہ دل جمعی اور انہماک سے لکھنا شروع کر دیا۔مجھے لکھتے ہوئے کچھ ہی لمحے گزرے ہوں گے کہ دوبارہ شاکر خان کے نوکر شبن نے دروازے پر دستک دی۔ ایک بار پھر مجھے بتایا گیا کہ ہمارے میزبان شاکر صاحب کے کوئی اور دوست ان سے ملنے آئے ہوئے ہیں تو شاکر صاحب مجھے ان سے بھی متعارف کرانا چاہتے ہیں۔ بقول شاعر:

                                            ؎        دوستوں سے ملاقات کی شام ہے

                                                     یہ سزا کاٹ کر اپنے گھر جاؤں گا