پیراگراف نمبر14 مجھے میرے دوستوں سے بچاؤ

 

                                                     سبق:    مجھے میرے دوستوں سے بچاؤ

                             پیراگراف نمبر14

                                                               ✍     اقتباس:

                               شہر میں رات دن شوروشغب رہتا ہے ۔۔۔۔۔۔۔۔۔۔ دیکھو میری خوشی کرو۔

                                                             ✍   حوالۂ متن: 

                                               سبق کا عنوان:                   مجھے میرے دوستوں سے بچاؤ

                                                مصنف کانام:                        سجاد حیدر یلدرم

                                                      صنف:                                افسانہ

                                                         ماخذ:                               خیالستان

                                                         ✍     خط کشیدہ الفاظ کےمعانی:

                      شوروشغب ۔۔۔۔ شور شرابہ، شوروغل۔                             دیہات ۔۔۔۔ گاؤں۔

                      آب و ہوا ۔۔۔۔ موسمی کیفیت۔                          تبدیلیٔ آب و ہوا ۔۔۔۔ موسمی کیفیت کا بدلنا۔

                   مضمون نگاری ۔۔۔۔ مضمون لکھنا۔                                       اطمینان ۔۔۔۔ سکون، تسلی۔

                           واسطے ۔۔۔۔ کےلیے۔                                        آراستہ کرنا ۔۔۔۔ سجانا، مزین کرنا۔

                        مہیا ہونا ۔۔۔۔ فراہم ہونا، دستیاب ہونا، میسر ہونا۔

            ✍     سیاق و سباق:

                                     تشریح طلب اقتباس درسی سبق " مجھے میرے دوستوں سے بچاؤ " کے درمیان سے اخذ کیا گیا ہے۔ اس کا سیاق و سباق یہ ہے کہ مصنف کہتا ہے کہ میرا ایک دوست شاکر خان ادبی لوگوں سے میل ملاپ رکھتا ہے اور کہتا ہے کہ اہلِ علم کی قدر کرنا امرا کے شایان شان ہوتا ہے۔ وہ مجھے  اپنے علاقے سلیم پور لے جانا چاہتا تھا اور میں اس کے محبت آمیز اصرار پر انکار نہ کرسکا اور مختصر سامان لے کر اس کے ساتھ ہولیا۔

              ✍       تشریح:   

                                    سجاد حیدر یلدرم اردو ادب کے نامور مصنف اور افسانہ نگار تھے۔ان کے افسانوں میں رومانیت کا رنگ غالب ہوتا ہے اور یہ انشائے لطیف کا بھی عمدہ نمونہ ہیں۔ ایسا ہی ان کا افسانہ "مجھے میرے دوستوں سے بچاؤ" ہے جس میں وہ اپنے مخلص دوستوں سے عاجز نظر آتے ہیں اور انھیں ہر صورت چھوڑ دینے کے درپے ہیں۔

                     تشریح طلب اقتباس میں مصنف اپنے دوست شاکر خان کے حوالے سے لکھتا ہے کہ وہ مجھے بےحد اصرار سے یہ کہتے ہوئے اپنے علاقے سلیم پور لے گیا کہ آپ مضمون نگاری کرتے ہیں مگر یہاں شہر میں رات دن شوروغل ہوتا ہے جس سے انسان کو لکھنے کےلیے یک سوئی میسر نہیں آتی۔ آپ میرے ساتھ موضع سلیم پور چلیں۔ دیہات کی آب و ہوا اور موسم بھی شہر کے مقابلے میں خوش گوار ہوتا ہے جبکہ فضا بھی کھلی اور شفاف ہوتی ہے۔ وہاں نہ تو شورشرابہ ہوتا ہے اور نہ شہر جیسے ہنگامے ہوتے ہیں۔ آپ کو وہاں مکمل آرام و سکون میسر ہوگا اور آپ مکمل یک سوئی اور دل جمعی سے اپنا مضمون لکھنے کا کام کرسکو گے۔ بقول شاعر:

                                                  ؎    واہ رے دیہات کے    سادہ تمدن    کی بہار

                                                      سادگی میں بھی ہے کیا کیا تیرا دامن زرنگار

                  مصنف کہتا ہے کہ شاکر خان  مجھے اپنے علاقے سلیم پور لے جانے کے اصرار کو مزید بڑھاتے ہوئے کہنے لگا کہ میں نے آپ کےلیے آپ کی ضرورتوں کے عین مطابق ایک الگ  کمرہ  مختص کر دیا ہے اور اس کمرے میں آپ کو کسی طرح کی کمی میسر نہ ہوگی۔ آپ کو مضمون لکھنے کے حوالے سے بھی کسی قسم کی تنگی کا سامنا نہیں کرنا پڑے گا کیونکہ میں نے اس کمرے میں آپ کے لکھنے کےلیے تمام سازوسامان رکھوا دیا ہے۔ میں آپ کو زیادہ دن قیام کرنے پر مجبور بھی نہیں کروں گا۔ آپ چند دن قیام کے بعد واپس چلے آنا مگر میرے ساتھ جانے سے انکار مت کرنا۔ آپ کا میرے گھر آنا میرے لیے باعثِ مسرت ہوگا اس لیے میری خوشی کےلیے  میرے ساتھ چلنے پر آمادگی ظاہر کردیں۔ بقول شاعر: 

                                                  ؎    وہ  آئے  گھر   میں  ہمارے  خدا  کی  قدرت ہے

                                                      کبھی ہم    ان کو کبھی اپنے گھر کو دیکھتے ہیں