سبق: مجھے میرے دوستوں سے بچاؤ
پیراگراف نمبر20
✍ اقتباس:
گویا میں بھی مثل ۔۔۔۔۔۔۔۔۔۔۔۔۔۔ اور میں لکھ رہا تھا۔
✍ حوالۂ متن:
سبق کا عنوان: مجھے میرے دوستوں سے بچاؤ
مصنف کا نام: سجاد حیدر یلدرم
صنف: افسانہ
ماخذ: خیالستان
✍ خط کشیدہ الفاظ کے معانی:
گویا ۔۔۔۔ جیسا کہ ،تسلیم ہے۔ مثل ۔۔۔۔ کی مانند، کی طرح۔
میزبان ۔۔۔۔ مہمان نوازی کرنے والا۔ اصطبل ۔۔۔۔ گھوڑے باندھنے کی جگہ۔
نجات ۔۔۔۔ چھٹکارا۔ خیالات ۔۔۔۔ خیال کی جمع، تصورات۔
غائب ہونا ۔۔۔۔ نہ ملنا، عنقا ہونا۔ ازسرنو ۔۔۔۔ نئے سرے سے۔
طبیعت ۔۔۔۔ مزاج۔ اچاٹ ہونا ۔۔۔۔ دل نہ لگنا، پریشان ہونا۔
طبیعت اچاٹ ہونا ۔۔۔۔ جی نہ لگنا، طبیعت کا پریشان ہونا۔ بہ ہزار دقت ۔۔۔۔ بڑی مشکل سے۔
خوش قسمتی ۔۔۔۔ خوش نصیبی۔
✍ سیاق و سباق:
تشریح طلب اقتباس درسی سبق " مجھے میرے دوستوں سے بچاؤ " کے درمیان سے اخذ کیا گیا ہے۔ اس کا سیاق و سباق یہ یے کہ مصنف کہتا ہے کہ شاکر صاحب کے ہاں قیام کے دوران جب میں اپنے کمرے میں لکھنے بیٹھا تو مجھے شاکر خان نے اپنے دوست سے ملوانے کی غرض سے نیچے بلوا لیا۔ اس کے دوست سے ملنے اور اس کے چلے جانے کے بعد جب میں نے دوبارہ لکھنا شروع کیا اور ایک نامکمل جملہ ہی لکھ پایا تھا کہ دوبارہ دروازے پر دستک ہوگئی اور مجھے کھانے پر بلا لیا گیا۔
✍ تشریح:
سجاد حیدر یلدرم اردو ادب کے نامور مصنف اور افسانہ نگار تھے۔ان کے افسانوں میں رومانیت کا رنگ غالب ہوتا ہے اور یہ انشائے لطیف کا بھی عمدہ نمونہ ہیں۔ ایسا ہی ان کا افسانہ "مجھے میرے دوستوں سے بچاؤ" ہے جس میں وہ اپنے مخلص دوستوں سے عاجز نظر آتے ہیں اور انھیں ہر صورت چھوڑ دینے کے درپے ہیں۔
تشریح طلب اقتباس میں مصنف اپنے دوست شاکر خان کے ہاں قیام کے دوران کے حالات بیان کرتے ہوئے کہتا ہے کہ جب مجھے معلوم ہوا کہ شاکر صاحب مجھے اپنے دوست سے ملوانا چاہتے ہیں تو میرے دل میں یہ احساس پیدا ہوگیا کہ وہاں میری حیثیت شاکر صاحب کے اس عربی نسل کے گھوڑے جیسی ہوگئی تھی جسے شاکر خان نے کچھ دنوں پہلے خریدا تھا اور اسے اصطبل سے نکال کر اپنے ہر اس دوست کو دکھاتا جو شاکر صاحب سے ملنے آتا تھا۔ اپنے گھوڑے کی طرح اس نے مجھے بھی اپنے ہر دوست سے ملوانا ضروری سمجھ رکھا تھا۔ بقول شاعر:
؎ دل ابھی پوری طرح ٹوٹا نہیں
دوستوں کی مہربانی چاہیے
چناں چہ شاکر صاحب کے دوست راجا طالب علی سے متعارف ہونے کے بعد مجھے جب اس سے چھٹکارا ملا تو میں بھاگ کر دوبارہ اپنے کمرے میں آیا تاکہ اپنے مضمون کے سلسلے میں کچھ لکھ سکوں مگر اس وقت میرے سارے جمع شدہ خیالات اور تصورات جنھیں میں قلم بند کرنا چاہتا تھا دماغ سے غائب ہوگئے۔ ایسی صورت حال میں مجھے نئے سرے سے فقرہ بندی کرنی پڑی جس کی وجہ سے اب میرا لکھنے میں جی نہ لگا اور مجھے بیزاری اور تھکاوٹ ہونے لگی۔ بقول شاعر:
؎ کچھ جہدِ مسلسل سے تھکاوٹ نہیں لازم
انسان کو تھکا دیتا ہے سوچوں کا سفر بھی
میں نے بڑی مشکل سے خود کو دوبارہ لکھنے پر آمادہ کرلیا اور لکھنا شروع بھی کر دیا۔ اس بار میری خوش نصیبی یہ تھی کہ مجھے نصف گھنٹا لکھنے کےلیے ایسا مل گیا کہ اس دوران کسی نے مداخلت نہ کی جس کی وجہ سے میرے لکھنے میں کوئی خلل نہ آیا ۔ میرے قلم نے روانی سے لکھنا شروع کردیا اور میں اپنی نامکمل تحریر کو مکمل کرنے میں مصروف ہوگیا۔
No comments:
Post a Comment