پیراگراف نمبر15 مجھے میرے دوستوں سے بچاؤ

                                                            سبق: مجھے میرے دوستوں سے بچاؤ

                                     پیراگراف نمبر15

                                                                    ✍    اقتباس:

                                             میں ایسے محبت آمیز اصرار ۔۔۔۔۔ میری آنکھوں کے سامنے ہوتا تھا۔

                                                                   ✍   حوالۂ متن:

                                                     سبق کا عنوان:                    مجھے میرے دوستوں سے بچاؤ

                                                     مصنف کا نام:                      سجاد حیدر یلدرم

                                                            صنف:                       افسانہ

                                                              ماخذ:                      خیالستان

                                                           ✍   خط کشیدہ الفاظ کے معانی:

                            محبت آمیز ۔۔۔۔ محبت بھرا، پیار بھرا۔                         اصرار ۔۔۔۔ ضد کرنا، زور دینا۔

                              انکار کرنا ۔۔۔۔ آمادگی ظاہر نہ کرنا۔ منع کرنا۔               مختصر ۔۔۔۔ تھوڑا سا۔

                                  ایڈیٹر ۔۔۔۔ مدیر۔                                       وعدہ ۔۔۔۔ عہد 

                                 عرصہ ۔۔۔۔ مدت۔                                 پائیں باغ ۔۔۔۔ مکان کے سامنے کا باغ، گھر کے اندر کا باغ۔

                            دل فریب ۔۔۔۔ دل کش، خوب صورت۔               نیچرل ۔۔۔۔ قدرتی۔

                  ✍   سیاق و سباق:

                                        تشریح طلب اقتباس درسی سبق " مجھے میرے دوستوں سے بچاؤ " کے درمیان سے اخذ کیا گیا ہے۔ اس کا سیاق و سباق یہ ہے کہ مصنف اپنے دوست شاکر خان کے حوالے سے کہتا ہے کہ اس نے مجھے اپنے موضع سلیم پور  لے جانے کی خواہش کا اظہار کیا اور کہا کہ میں نے وہاں آپ کےلیے ایک کمرہ بھی مختص کر دیا ہے۔ میں اس کے اس پُرخلوص اصرار پر انکار نہ کرسکا اور وہاں چلا گیا۔ سلیم پور پہنچ کر مجھے کہا گیا کہ پہلے ہی دن سے لکھنے کا کام شروع مت کرنا۔ ابھی آرام کرو اس کے بعد ہم آپ کو گاؤں کی سیر کرائیں گے۔

                 ✍      تشریح:   

                                    سجاد حیدر یلدرم اردو ادب کے نامور مصنف اور افسانہ نگار تھے۔ان کے افسانوں میں رومانیت کا رنگ غالب ہوتا ہے اور یہ انشائے لطیف کا بھی عمدہ نمونہ ہیں۔ ایسا ہی ان کا افسانہ "مجھے میرے دوستوں سے بچاؤ" ہے جس میں وہ اپنے مخلص دوستوں سے عاجز نظر آتے ہیں اور انھیں ہر صورت چھوڑ دینے کے درپے ہیں۔

                     تشریح طلب اقتباس میں مصنف اپنے دوست شاکر خان کے متعلق بیان کرتا ہے کہ جب اس نے  خلوص اور چاہت سے مجھے اپنے ہاں موضع سلیم پور لے جانے کا اصرار کیا تو میں اس کی چاہت اور محبت بھرے اصرار پر اسے انکار نہ کرسکا۔ اس لیے میں اپنا لکھنے کا تھوڑا بہت سامان اپنے ساتھ لے کر اس کے ہمراہ اس کے علاقے چل پڑا۔

                    مصنف کہتا ہے کہ میں نے "معارف" نامی رسالہ کے مدیر سے اس بات کا عہد کیا ہوا تھا کہ میں انھیں ایک مخصوص عرصے کے اندر اندر ان کے رسالے میں شائع کرنے کی غرض سے مضمون لکھ کر بھیجوں گا۔ اس لیے میں شاکر خان کے ہمراہ اس کے علاقے سلیم پور چل پڑا تاکہ وہاں پُرسکون ماحول میں یہ کام اچھے طریقے سے کرسکوں۔ شاکر خان کے امیروں کی کوٹھی نما گھر پہنچ کر میں نے اس کمرے کا جائزہ لیا جو میرے لیے تیار کیا گیا تھا۔ اس کمرے کی کھڑکی نیچے موجود باغ کی طرف کھلتی تھی۔ وہ باغ انتہائی خوب صورت تھا اور کمرے کی کھڑکی سے باغ کی دل کشی، خوب صورتی دیکھنے کو ملتی اور میری آنکھیں باغ کے قدرتی اور حسین مناظر سے خوب لطف اٹھاتیں۔ بقول شاعر:

                                                ؎    واہ  رے  دیہات  کے    سادہ  تمدن    کی  بہار

                                                    سادگی میں بھی ہے کیا کیا تیرا دامن زرنگار