پیراگراف نمبر16 مجھے میرے دوستوں سے بچاؤ

 

                                                          سبق: مجھے میرے دوستوں سے بچاؤ

                                       پیراگراف نمبر16

                                                                   ✍    اقتباس:

                                                    میرا ماتھا وہیں ٹھنکا ۔۔۔۔۔۔۔۔ مجھے یہاں بھی نہ ملے گی۔

                                                                   ✍  حوالۂ متن: 

                                                      سبق کا عنوان:                   مجھے میرے دوستوں سے بچاؤ

                                                       مصنف کا نام:                  سجاد حیدر یلدرم

                                                              صنف:                   افسانہ

                                                                ماخذ:                  خیالستان

                                                         ✍    خط کشیدہ الفاظ کے معانی:

                    ماتھا ٹھنکا ۔۔۔۔ بُرا خیال آیا، فکرلاحق ہوئی۔                          فرصت معلوم ۔۔۔۔ فراغت میسر آنا۔

                      میزبان ۔۔۔۔ ضیافت کرنے والا، مہمان نوازی کرنے والا۔             حیلےحوالے ۔۔۔۔ بہانے، عذر

                        عنقا ۔۔۔۔ غائب ، نایاب۔                                            یک سوئی ۔۔۔۔ دل جمعی، انہماک۔

                   سرگرداں ۔۔۔۔ حیران و پریشان پھرنا۔ مارا مارا پھرنا، مضطرب ہونا۔

              ✍     سیاق و سباق:  

                                      تشریح طلب اقتباس درسی سبق " مجھے میرے دوستوں سے بچاؤ "کے درمیان سے اخذ کیا گیا ہے۔ اس کا سیاق و سباق یہ ہے کہ مصنف کہتا ہے کہ میرا دوست شاکر خان مجھے اپنے ساتھ موضع سلیم پور لے گیا۔ مجھے خدشہ محسوس ہوا کہ یہاں  بھی مجھے لکھنے کا موقع میسر نہیں آئے گا۔جب میں نے اپنے لکھنے کے حوالے سے کمرے کا جائزہ لیا تو اس کمرے میں کوئی چیز بھی میرے لکھنے میں مددگار ثابت نہ ہوئی۔کمرے میں موجود چاندی کی دوات میں سیاہی سوکھی ہوئی تھی جبکہ وہاں رکھے گئے قیمتی قلم نب سے محروم تھے۔

                ✍      تشریح:                    

                                      سجاد حیدر یلدرم اردو ادب کے نامور مصنف اور افسانہ نگار تھے۔ان کے افسانوں میں رومانیت کا رنگ غالب ہوتا ہے اور یہ انشائے لطیف کا بھی عمدہ نمونہ ہیں۔ ایسا ہی ان کا افسانہ "مجھے میرے دوستوں سے بچاؤ" ہے جس میں وہ اپنے مخلص دوستوں سے عاجز نظر آتے ہیں اور انھیں ہر صورت چھوڑ دینے کے درپے ہیں۔

                    تشریح طلب اقتباس میں مصنف اپنے دوست شاکر خان کی دعوت پر اس کے گھر قیام کرنے کے دوران کے حالات بیان کرتا ہے کہ جب شاکر خان نے احمد نگر جانے اور وہاں کے رئیس راجا طالب علی صاحب سے ملاقات کرنے کی بات کی تو مجھے فکر لاحق ہوگئی کہ پُرسکون ماحول میں بیٹھ کر لکھنے کے جس مقصد کےلیے یہاں آیا تھا وہ مقصد پورا ہونا بہت مشکل ہوگا۔ مجھے فراغت سے بیٹھ کر لکھنے کا موقع ملنا بہت مشکل دکھائی دے رہا تھا۔ اس لیے میں نے احمد نگر کے رئیس راجا طالب علی کے ہاں جانے سے بچنے کےلیے بہانے سازی شروع کر دی اور اس میں کامیاب رہا۔ میرے میزبان دوست پر میرے بہانوں کا اثر ہوگیا اور میرے انکار پر اس نے بھی احمد نگر جانے کا ارادہ ترک کردیا۔جیسا کہ قول ہے: 

                            ✌  " انسان کو اُن کاموں سے دور رہنا چاہیے جو انھیں ان کے مقصد سے دور لے جائیں"۔✌

                     مصنف کہتا ہے کہ میرے دوست کے ارادوں اور سیروتفریح کےلیے بنائے گئے منصوبوں سے ہی یہ بات مجھ پر عیاں ہوگئی تھی کہ تخلیے اور مکمل تنہائی میں توجہ، انہماک اور دل جمعی سے مضمون لکھنے اور جو یک سوئی پانے کےلیے مَیں مارا مارا پھر رہا تھا وہ بہت نایاب ہوچکی تھی اور مجھے کہیں بھی میسر نہیں آ رہی تھی۔ بقول شاعر: 

                                               ؎       وہ اندھیرا ہی بھلا تھا    کہ قدم راہ    پر تھے

                                                    روشنی لے گئی ہے منزل سے بہت دُور ہمیں