سبق: مجھے میرے دوستوں سے بچاؤ
پیراگراف نمبر17
✍ اقتباس:
میں جلدی سے اٹھ کر ۔۔۔۔۔۔۔۔۔۔ وہ موجود نہیں۔
✍ حوالۂ متن:
سبق کا عنوان: مجھے میرے دوستوں سے بچاؤ
مصنف کا نام: سجاد حیدر یلدرم
صنف: افسانہ
ماخذ: خیالستان
✍ خط کشیدہ الفاظ کے معانی:
قیمتی ۔۔۔۔ انمول،نایاب۔ کام دار ۔۔۔۔ جس پر کام کیا گیا ہو، نقش و نگار والا۔
گناہ کبیرہ ۔۔۔۔ بہت بڑا گناہ۔ دوات ۔۔۔۔ سیاہی رکھنے کا ظرف۔
سیاہی ۔۔۔۔ روشنائی۔ نایاب ۔۔۔۔ قیمتی، انمول۔
ندارد ۔۔۔۔ غائب، غیرموجود۔ جاذب ۔۔۔۔ پُرکشش، جذب کرنے والا۔
مخملی ۔۔۔۔ مخمل یا ریشم سے بنا ہوا، نرم و ملائم۔ اعلیٰ درجہ ۔۔۔۔ بہت عمدہ
بیش قیمت ۔۔۔۔ زیادہ قیمت والا، گراں قیمت۔
✍ سیاق و سباق:
تشریح طلب اقتباس درسی سبق " مجھے میرے دوستوں سے بچاؤ" کے درمیان سے اخذ کیا گیا ہے۔اس کا سیاق و سباق یہ ہے کہ مصنف کہتا ہے کہ شاکر خان کے ہاں رہتے ہوئے مجھے جلد معلوم ہوگیا کہ جس یک سوئی کی تلاش میں تھا وہ یہاں بھی نہیں ملے گی۔ میں نے وہاں کمرے میں پڑی میز پر موجود لکھنے کا سامان دیکھا جو بہت قیمتی تھا مگر کوئی میرے لکھنے کےلیے کارگر ثابت نہ ہوا۔ آخر کار مجھے اپنے پرانے قلم دوات سے ہی لکھنا پڑا۔
✍ تشریح:
سجاد حیدر یلدرم اردو ادب کے نامور مصنف اور افسانہ نگار تھے۔ان کے افسانوں میں رومانیت کا رنگ غالب ہوتا ہے اور یہ انشائے لطیف کا بھی عمدہ نمونہ ہیں۔ ایسا ہی ان کا افسانہ "مجھے میرے دوستوں سے بچاؤ" ہے جس میں وہ اپنے مخلص دوستوں سے عاجز نظر آتے ہیں اور انھیں ہر صورت چھوڑ دینے کے درپے ہیں۔
تشریح طلب اقتباس میں مصنف اپنے دوست شاکر خان کے ہاں قیام کے دوران لکھنے کےلیے فراہم کردہ چیزوں کے متعلق بیان کرتا ہے کہ میں جب اپنے دوست کے پاس سے اٹھ کر اپنے کمرے میں آیا اور وہاں میز پر پڑے اس سازوسامان کا جائزہ لینا شروع کر دیا جو شاکرخان نے میرے لکھنے کےلیے تیار کرکے رکھا ہوا تھا۔ میز پر بہت ہی نفیس اور قیمتی کپڑا بچھایا گیا تھا جس پر کڑھائی کرکےخوب صورت نقش و نگار بنائے گئے تھے۔اس پر روشنائی کا ایک قطرہ بھولے سے بھی گرانا دل پر گراں گزرتا بلکہ بہت بڑے گناہ سے کم نہ ہوتا۔ وہاں رکھی گئی دوات چاندی کی بنی ہوئی تھی مگر اس کے اندر لکھنے کےلیے موجود روشنائی مکمل خشک ہوگئی تھی اور وہ دوات لکھنے میں کسی طور پر بھی مددگار ثابت نہیں ہو رہی تھی۔ میز پر پڑے ہوئے قلم بھی ملکی ساخت کے نہیں تھے بلکہ انتہائی قیمتی، انمول اور انگریزی ساخت کے تھے۔ان انگریزی قلموں میں اکثر کی نب ہی نہیں تھی۔ نب کے بغیر انگریزی قلم اور روشنائی کے بغیر چاندی کی دوات اگرچہ انمول تھے مگر میرے لیے بےوقعت اور بےقدروقیمت تھے کیونکہ ان سے میرا لکھنے کا اصل مدعا پورا نہیں ہوتا تھا۔ جیسا کہ مشہور کہاوت ہے:
✌ " ہر چمکتی چیز سونا نہیں ہوتی"۔ ✌
مصنف کہتا ہے کہ لکھنے کےلیے مجھے میسر تمام سازوسامان میں ایک نرم و ملائم مخمل کی جلد سے مزین کتاب بھی موجود تھی جس کے کاغذ انتہائی اعلیٰ، خوب صورت اور پُرکشش تھے اور یہ کاغذ ایسے نہیں تھے کہ ان پر کچھ لکھا جاسکے۔ لکھنے میں مدد دینے والے کاغذ وہاں موجود ہی نہیں تھے۔غرض کمرے میں رکھا گیا سارا سامان بہت قیمتی اور نفیس تھا مگر ان میں سے ایک بھی میرے لیے فائدہ مند نہیں تھا کیونکہ ان قیمتی چیزوں میں سے کسی چیز نے بھی میری لکھنے کے حوالے سے کوئی ضرورت پوری نہیں کی اور جو چیز میری لکھنے کی ضرورت پوری کرتی وہ وہاں موجود ہی نہیں تھی۔ جیسا کہ کہاوت ہے:
✌ " اونچی دکان پر پھیکے پکوان ہوتے ہیں"۔ ✌
No comments:
Post a Comment