سبق: مرزا محمد سعید
پیراگراف نمبر6
اقتباس:
پنجاب کے بیشتر اعلیٰ عہدے دار۔۔۔۔۔۔۔۔۔۔۔۔۔۔ یہاں تک کہ وائسرائے ہند کا بھی۔
حوالہ متن:
سبق کا عنوان: مرزا محمد سعید
مصنف کا نام: شاہد احمد دہلوی
صنف: خاکہ نگاری
ماخذ: گنجینۂ گوہر
خط کشیدہ الفاظ کے معانی:
بیشتر ۔۔۔۔۔۔۔ زیادہ تر۔
عہدے دار۔۔۔۔۔۔ عہدے پر فائز، عہدہ رکھنے والے۔
اکتساب ۔۔۔۔۔۔۔ حاصل کرنا۔
اکتسابِ علم۔۔۔۔۔۔ علم حاصل کرنا۔
غیر معمولی۔۔۔۔۔۔۔ بہت زیادہ۔
قابلیت ۔۔۔۔۔۔۔۔۔۔ لیاقت۔
ہیچ۔۔۔۔۔ کم تر ، حقیر۔
بارہا۔۔۔۔۔۔ کئی بار ، متعددبار
ادب و احترام ۔۔۔۔۔۔۔ عزت و قدر۔
وائسرائے۔۔۔۔۔۔ لاٹ صاحب، بادشاہ کا نائب۔
سیاق و سباق:
تشریح طلب اقتباس درسی سبق " مرزا محمد سعید" کے درمیان میں سے اخذ کیا گیا ہے۔ مصنف، مرزا صاحب کے متعلق کہتے ہیں کہ انھوں نے اس زمانے میں اعلیٰ تعلیم حاصل کرکے علمی حلقوں میں نمود حاصل کی جب مسلمانوں میں انگریزی تعلیم کا حصول معیوب سمجھا جاتا تھا۔علامہ اقبال ان کے استادوں میں شمار ہوتے تھے اور ان سے ان کے مخلصانہ تعلقات تھے۔ مرزا صاحب گورنمنٹ کالج لاہور میں انگریزی کے پروفیسر بھی رہے۔ پطرس بخاری ان کے شاگرد تھے۔ جب وہ آل انڈیا ریڈیو کے ڈائریکٹر جنرل مقرر ہوگئے تو انھوں نے مرزا صاحب کو ریڈیو پر تقریر نشر کرنے کےلیے آمادہ کرلیا۔
تشریح:
شاہد احمد دہلوی اردو ادب کے نامور مصنف تھے۔ وہ زبان و بیان پر مکمل عبور رکھتے تھے۔وہ موسیقار کے ساتھ ساتھ خاکہ نگار بھی تھے۔ مرزا محمد سعید کا شمار ان کے اساتذہ میں ہوتا ہے۔ اپنے استاد محترم کی زندگی کا خاکہ انھوں نے درسی سبق " مرزا محمد سعید" میں بیان کیا جو کہ ان کی کتاب گنجینۂ گوہر سے اخذ کیا گیا ہے۔اس سبق میں وہ مرزا محمد سعید کی شخصیت اور ان کے علمی مرتبے کو نہایت عمدگی سے بیان کرتے ہیں۔
تشریح طلب اقتباس میں مصنف شاہد احمد دہلوی اپنے استاد محترم مرزا محمد سعید کی علمی قابلیت کے متعلق آگاہ کرتے ہیں کہ مرزا صاحب اعلیٰ تعلیم حاصل کرنے کے بعد گورنمنٹ کالج لاہور میں انگریزی کے پروفیسر مقرر ہوگئے۔پنجاب بھر کے اندر مختلف عہدوں پر فائز لوگوں میں سے اکثر مرزا صاحب کے شاگرد تھے۔ اردو کے معروف ، بلند پایہ مزاح نگار اور انگریزی ادبیات کے ماہر پطرس بخاری اور نامور ادیب اور ڈرامہ نویس سید امتیاز علی تاج بھی مرزا صاحب کے شاگرد رہے اور ان سے علم حاصل کرتے رہے۔مرزا صاحب سے حصولِ علم کے بعد پطرس بخاری خود بھی انگریزی کے پروفیسر بن گئے تھے۔
پطرس بخاری بلا کے ذہین اور کمال علمیت کے حامل ہونے کے باوجود احترامِ استاد میں خود کو مرزا صاحب کے علم اور ان کی لیاقت و قابلیت کے سامنے بہت ہی کم تر سمجھتے تھے۔ بقول شاعر:
؎ ادب تعلیم کا جوہر ہے ، زیور ہے جوانی کا
وہی شاگرد ہیں جو خدمتِ استاد کرتے ہیں
پطرس بخاری سرکاری عہدے پر فائز ہونے اور مصروفیت کے باوجود بھی مرزا صاحب کو کبھی نہ بھولے بلکہ ان کی خدمت میں ہمیشہ حاضری دیتے رہتے تھےاور ان کا بےحد احترام کرتے تھے۔ وہ جتنی عزت و مقام اپنے استاد محترم مرزا محمد سعید کو دیتے تھے اس قدر کسی اور کو نہ دیتے تھے حتیٰ کہ ان کے مقابلے میں وہ وائسرے ہند کو بھی وہ عزت اور مقام نہ دیتے جو تاجِ برطانیہ کے نمائندے کے طور پر لوگوں میں اسے حاصل تھا اور ان کی حکمرانی کا سکہ چلتا تھا۔
بقول شاعر:
؎ وہی شاگرد پھر ہو جاتے ہیں استاد اے جوہؔر
جو اپنے دل و جان سے خدمتِ استاد کرتے ہیں
No comments:
Post a Comment