پیراگراف نمبر 14 تشریح سبق مرزا محمد سعید

 سبق: مرزا محمد سعید
پیراگراف نمبر14
اقتباس: 
     موت برحق ہے۔ مرنا سب کو ہے۔۔۔۔۔۔۔۔۔۔۔۔۔۔۔ ہمیں جتنا بھی غم ہو کم ہے۔
حوالہ متن:
 سبق کا عنوان: مرزا محمد سعید
مصنف کانام:  شاہد احمد دہلوی
         صنف:    خاکہ نگاری
         ماخذ:      گنجینۂ گوہر
 خط کشیدہ الفاظ کے معانی؛
برحق ۔۔۔۔۔ سچ، حقیقت۔
صدمہ ۔۔۔۔۔ دکھ ، تکلیف۔
وضع دار ۔۔۔۔۔۔ رکھ رکھاؤ والا، لحاظ رکھنے والا۔
جامع العلوم ۔۔۔۔۔ بہت سے علوم میں مہارت رکھنے والا۔
خاصی عمر ۔۔۔۔۔ زیادہ عمر۔
قابل ۔۔۔۔۔۔ لائق، ذہین۔
ہستی ۔۔۔۔۔۔ شخصیت۔
آرزوئیں ۔۔۔۔۔۔ آرزو کی جمع، خواہشیں۔
محروم ہونا ۔۔۔۔۔ کھو دینا، چھن جانا۔
طبیعت ۔۔۔۔۔۔ مزاج۔
سیاق و سباق:
                      تشریح طلب اقتباس درسی سبق " مرزا محمد سعید " کا آخری پیراگراف ہے۔اس کا سباق یہ ہے کہ مرزا صاحب خوش اخلاق اور خوش مزاج تھے۔ وہ زیادہ دوست بنانے کے قائل نہیں تھے۔ آخری ایام میں دونوں ہاتھوں میں رعشہ آگیا اس لیے انھیں لکھنے میں زحمت ہوتی تھی۔
       
تشریح:
                شاہد احمد دہلوی اردو ادب کے نامور مصنف تھے۔ وہ زبان و بیان پر مکمل عبور رکھتے تھے۔وہ موسیقار کے ساتھ ساتھ خاکہ نگار بھی تھے۔ مرزا محمد سعید کا شمار ان کے اساتذہ میں ہوتا ہے۔ اپنے استاد محترم کی زندگی کا خاکہ انھوں نے درسی سبق " مرزا محمد سعید" میں بیان کیا جو کہ ان کی کتاب  گنجینۂ گوہر سے اخذ کیا گیا ہے۔اس سبق میں وہ مرزا محمد سعید کی شخصیت اور ان کے علمی مرتبے کو نہایت عمدگی سے بیان کرتے ہیں۔
                            تشریح طلب اقتباس میں مصنف موت کی حقیقت اور مرزا محمد سعید کے اس دنیا سے رخصت ہو جانے سے ملنے والے صدمے کے متعلق بیان کرتا ہے کہ موت ایک ایسی  تلخ حقیقت ہے جس سے بچاؤ ممکن نہیں اور اس نے سب کو آکر اپنی لپیٹ میں لے لینا ہے کیونکہ اس سے کسی  بھی انسان کےلیے انکار ممکن ہے اور نہ فرار۔  جیسا کہ قرآن مجید میں ہے؛
 " ہر ذی روح نے موت کا مزہ چکھنا ہے"۔( آل عمران)۔
اور بقول شاعر؛
     آدمی   بلبلہ  ہے   پانی  کا
     کیا بھروسا ہے زندگانی کا
                     یا
موت سے کس کو رستگاری ہے
 آج  وہ  کل   ہماری   باری  ہے
   چناں چہ سب نے ایک نہ ایک دن موت کی آغوش میں آکر اس دنیا سے رخصت ہو جانا ہے لیکن ایک عام آدمی اور ایک عالم کی موت میں زمین آسمان کا فرق ہوتا ہے۔ جیسا کہ حدیث مبارکہ ہے؛
" ایک عالم کی موت ایک مصیبت ہے جس کی تلافی ممکن نہیں، ایک ایسا نقصان ہے جو پورا نہیں ہوسکتا اور ایسا ستارہ ہے جو موت کی وجہ سے بےنور ہوگیا"۔
                      مصنف کہتا ہے کہ مرزا صاحب نے طویل عمر پائی مگر ان کی وفات کا دکھ اس لیے بھی زیادہ ہے کہ ایسے شریف النفس، خوش رو، رکھ رکھاؤ اور مروت رکھنے والے اور اصولوں پر کاربند رہنے والے انسان روز بروز پیدا نہیں  ہوتے اور شاید آئندہ زمانے میں بھی پیدا نہ ہوں۔ ایسی صاحبِ علم شخصیت کے دنیا سے چلے جانے سے ایک ایسا خلا پیدا ہو جاتا ہے جسے برسوں پر نہیں کیا جاسکتا کیونکہ بقول میرتقی میر؛
    مت سہل ہمیں جانو پھرتا ہے فلک برسوں
    تب خاک کے پردے  سے انسان نکلتے ہیں
                دکھ اور افسوس کی بات یہ ہے کہ مرزا صاحب اب ہم میں موجود نہیں ہیں بلکہ وہ وہاں پہنچ چکے ہیں جہاں صرف ہماری نیک تمنائیں اور آرزوئیں ہی پہنچ سکتی ہیں اور ہم ان کےلیے دعا ہی کرسکتے ہیں ۔ ہم علم کے بہت بڑے سمندر اور عظیم انسان سے محروم ہوگئے۔ اتنی بڑی علمی شخصیت کی محرومی پر جتنا بھی غم اور دکھ کا اظہار کیا جائے وہ کم ہے کیونکہ اب مرزا صاحب جیسے مزاج کے لوگ ہمیں دوبارہ نہیں ملیں گے کیونکہ جو چلا جاتا ہے اس کا کوئی متبادل نہیں ہوتا۔ بقول شاعر؛
    موت اس کی ہے جس کا زمانہ کرے افسوس
     یوں تو آئے ہیں دنیا میں سبھی مرنے کےلیے
                                 یا
     زندگی جن کے تصور سے جلا پاتی تھی
   ہائے، کیا لوگ تھے جو دامِ اجل میں آئے