سبق: مرزا محمد سعید
پیراگراف نمبر12
اقتباس:
ریڈیو پاکستان کراچی سے ۔۔۔۔۔۔۔۔۔۔۔۔۔۔۔۔۔۔۔۔ جو کہ دیتے اس سے نہ پھرتے۔
حوالہ متن:
سبق کا عنوان: مرزا محمد سعید
مصنف کا نام: شاہد احمد دہلوی
صنف: خاکہ نگاری
ماخذ: گنجینۂ گوہر
خط کشیدہ الفاظ کے معانی؛
دانش کدہ ۔۔۔۔۔ علم و حکمت کا گھر۔ دانش ور ۔۔۔۔۔ علم و حکمت والا۔
فی البدیہ ۔۔۔۔۔ فوراً ، بغیر توقف کیے۔ میرِ سوالات ۔۔۔۔۔ سوالات کرنے والا، پروگرام کا میزبان۔
چار چاند لگنا ۔۔۔۔۔ عزت بڑھ جانا۔ مدعا ۔۔۔۔۔ مقصد، مطلب۔
عرض مدعا ۔۔۔۔۔ کہنے کا مقصد۔ منظور کرنا ۔۔۔۔۔ تسلیم کرنا، قبول کرنا۔
قدری کرنا ۔۔۔۔۔ کوشش کرنا، زور دینا۔ ٹس سے مس نہ ہونا ۔۔۔۔۔ کوئی اثر نہ ہونا، اپنی بات پر اڑے رہنا۔
قرینہ ۔۔۔۔۔ سلیقہ، طور طریقہ، ڈھنگ۔ پھرنا ۔۔۔۔۔ مکر جانا۔ انکار کرنا۔
سیاق و سباق:
تشریح طلب اقتباس درسی سبق " مرزا محمد سعید کے تقریباً آخری حصے سے اخذ کیا گیا ہے۔ اس کا سیاق و سباق یہ ہے کہ مرزا محمد سعید بہت سادہ زندگی گزارتے تھے اس لیے قلب مطمٔنہ کی دولت سے مالامال تھے۔ وہ قاعدے قرینے کے آدمی تھے اور اپنے اصولوں کے پکے تھے۔ قیامِ پاکستان سے پہلے مسلم لیگ کے پلیٹ فارم سے سیاست میں حصہ بھی لے چکے تھے اور صوبائی مسلم لیگ کے صدر منتخب ہوئے تھے۔
تشریح:
شاہد احمد دہلوی اردو ادب کے نامور مصنف تھے۔ وہ زبان و بیان پر مکمل عبور رکھتے تھے۔وہ موسیقار ہونے کے ساتھ ساتھ خاکہ نگار بھی تھے۔ مرزا محمد سعید کا شمار ان کے اساتذہ میں ہوتا ہے۔ اپنے استاد محترم کی زندگی کا خاکہ انھوں نے درسی سبق " مرزا محمد سعید" میں بیان کیا جو کہ ان کی کتاب گنجینۂ گوہر سے اخذ کیا گیا ہے۔اس سبق میں وہ مرزا محمد سعید کی شخصیت اور ان کے علمی مرتبے کو نہایت عمدگی سے بیان کرتے ہیں۔
تشریح طلب اقتباس میں مصنف مرزا محمد سعید کی زندگی کے اصول بیان کرنے کے دوران ، خود سے منسلک ان کا ایک واقعہ بیان کرتے ہوئے کہتا ہے کہ بارہ سال پہلے جب میں کراچی میں رہتا تھا تو اس وقت ریڈیو پاکستان کراچی مرکز سے ایک پروگرام " دانش کدہ " شروع کیا گیا جس کا مطلب ہے علم و حکمت سے معمور گھر۔ اس پروگرام میں علم و ادب اور حکمت کے حوالے سے چار نامور اہلِ علم حضرات کو بلایا جاتا جو علمی گفتگو کرتے تھے اور اپنے سننے والوں کے سوالوں کے جوابات فوراً اور موقع پر دیا کرتے تھے۔
مصنف کہتا ہے کہ میں اس پروگرام میں بطور میزبان ان دانش وروں کے آگے وہ سوالات رکھتا تھا جو لوگ پوچھا کرتے تھے یا جن کے جوابات معلوم کرنا ضروری ہوتا تھا اور پروگرام میں شریک دانش ور ان کے جوابات اسی وقت دیتے تھے۔ میں نے سوچا کہ اگر مرزا صاحب جیسی علمی شخصیت بھی اس پروگرام میں شرکت کرنے کی دعوت قبول کر لے تو پروگرام کی قدر و قیمت اور اس کی چاہت میں مزید اضافہ ہو جائے گا اور اس کی رونق بڑھ جائے گی۔
مصنف کہتا ہے کہ میں اس مقصد کی غرض سے مرزا صاحب کے پاس گیا اور اپنے آنے کا مقصد بھی ان کے سامنے رکھا جسے سن کر مرزا صاحب قدرے مسکرائے اور کہا کہ انسان کوئی بھی کام کرتا ہے تو اس کے پیچھے اس کے دو بنیادی مقاصد ہوتے ہیں۔ وہ یا تو شہرت کےلیے کام کرتا ہے یا دولت کے حصول کےلیے۔ مجھے ان دونوں چیزوں کی معمولی سی بھی طلب نہیں ہے اس لیے میں اس پروگرام میں شمولیت اختیار نہیں کرسکتا۔ بقول شاعر؛
؎ حرصِ دولت کی نہ عز و جاہ کی
بس تمنا ہے دلِ آگاہ کی
مصنف کہتا ہے کہ میں نے بہت کوشش کی کہ مرزا صاحب پروگرام میں شریک ہونے کےلیے راضی ہو جائیں لیکن ان پر میری منت سماجت اور کوشش کا ذرا بھی اثر نہ ہوا کیونکہ وہ بااصول آدمی تھے اور جو بات ایک بار اپنی زبان سے کہ دیتے تھے اس پر ہر صورت میں کاربند رہتے تھے۔ بقول شاعر؛
؎ جو رکے تو کوہ گراں تھے ہم
جو چلے تو جاں سے گزر گئے
No comments:
Post a Comment