پیراگراف نمبر8
اقتباس:
حاکمِ اکبر کی آمد سن رہے ہیں ۔۔۔۔۔۔۔ کہیں ذکر ہے، نہ کسی کو خبر ہے۔
حوالۂ متن:
سبق کا عنوان: خطوطِ غاؔلب
مصنف کا نام: مرزا اسد اللہ خاں غاؔلب
صنف: مکتوب نگاری
ماخذ: غاؔلب کے خطوط
مرتب کردہ: ڈاکٹر خلیق انجم
خط کشیدہ الفاظ کے معانی:
حاکمِ اکبر ۔۔۔۔۔ بڑا حکمران مراد بہادرشاہ ظفر۔ آمد ۔۔۔۔۔ آنا، تشریف لانا۔
دربار کرنا ۔۔۔۔۔ شاہی محفل جمانا۔ گنہ گار ۔۔۔۔۔ خطاکار۔
خلعت ۔۔۔۔۔ شاہی لباس، شاہانہ لباس۔ پنسن ۔۔۔۔۔ مراد پنشن، ریٹائرمنٹ کے بعد ملنے والی رقم۔
خبر ۔۔۔۔۔ اطلاع، آگاہی۔
تشریح:
مرزااسداللہ خان غاؔلب اردو اور فارسی ادب کے بےتاج بادشاہ تھے۔وہ بلند پایہ شاعر ہونے کے ساتھ ساتھ صاحبِ طرز نثر نگار بھی تھے۔انھوں نے ہم عصروں اور اپنے دوستوں کو بےشمار خطوط لکھے۔مکتوب نگاری میں انھوں نے الگ راہ نکالی۔رسمی انداز ترک کرکے اپنے خطوط میں جدت کا رنگ بھرا۔وہ خود کہتے ہیں میں نے مراسلے کو مکالمہ بنا دیا۔
تشریح طلب اقتباس مرزاغالب کے اُس خط کا اختتامی حصہ ہے جو انھوں نے اپنے ہردلعزیز شاگرد اور دوست میرمہدی حیسن مجروح کے نام 08۔نومبر1859ء بروز منگل کو لکھا تھا۔میرمہدی حسین مجروح اپنے استاد کا اس قدر احترام کرتے تھے کہ ان کے کسی شعر کو غلط پڑھنا بھی گناہ سمجھتے تھے۔ اپنے خط کے اختتامی حصے میں غاؔلب میرمہدی حسین مجروح کو دِلیّ کے حالات کے متعلق آگاہی دیتے ہیں۔غدر کے بعد دِلیّ پر انگریزوں کے قبضے کے کچھ عرصہ بعد یہ افواہیں سرگرم تھیں کہ بہادرشاہ ظفر دوبارہ اقتدار سنبھال رہے ہیں۔
مرزا غاؔلب اسی حوالے سے لکھتے ہیں کہ حاکمِ اکبر یعنی بہادرشاہ ظفر کی دوبارہ آمد کی اطلاع گردش کر رہی ہے۔اب دیکھتے ہیں کہ وہ دوبارہ دِلیّ آکر تخت نشین ہوتے ہیں کہ نہیں۔اگر مسند نشین ہوتے ہیں تو حسب سابق معمول کے مطابق دربار لگاتے ہیں یا نہیں۔دربار لگانے کے بعد مجھ خطاکار اور بندۂ ناچیز کو یاد رکھتے ہیں کہ نہیں رکھتے۔اگر مجھے بلا لیا گیا تو دربار سے مجھےشاہی لباس بھی ملتا ہے کہ نہیں ملتا۔میرے لیے پریشان کن امر یہ بھی ہے کہ میری پنشن کا کہیں ذکر ہی نہیں ہے۔حکومت میری پنشن کب جاری کر رہی ہے اس بابت مجھے کچھ معلوم نہیں۔ بقول غاؔلب:
ہزاروں خواہشیں ایسی کہ ہر خواہش پہ دم نکلے
بہت نکلے مرے ارماں لیکن پھر بھی کم نکلے
------------------------------
