پیراگراف نمبر5 خطوط غالب

                         03065976174           سبق:    خطوطِ غاؔلب              aufsurani.blogspot.com

                                                          پیراگراف نمبر5

                                                               اقتباس:

                                نہ کاغذ ہے، نہ ٹکٹ ہے ۔۔۔۔۔۔۔۔۔۔۔۔۔۔ یہ چند سطریں لکھیں۔

                                                           حوالۂ متن:

                                   سبق کا عنوان:                            خطوطِ غاؔلب

                                   مصنف کا نام:                             مرزا اسداللہ خاں غاؔلب

                                          صنف:                             مکتوب نگاری

                                             ماخذ:                            غاؔلب کے خطوط

                                    مرتب کردہ:                            ڈاکٹر خلیق انجم

                                                  خط کشیدہ الفاظ کے معانی: 

              لفافہ ۔۔۔۔۔  کاغذ کا غلاف جس میں خط لپیٹ کر رکھا جاتا ہے۔          بیرنگ ۔۔۔۔۔ بغیر ٹکٹ کے۔

          لپیٹ کر ۔۔۔۔۔ تہ کرکے، سمیٹ کر۔                                         غمگین ۔۔۔۔۔ پریشان، غم زردہ، افسردہ۔

              فتوح ۔۔۔۔۔ فتح کی جمع، غیرمتوقع آمدنی۔                                سہ شنبہ ۔۔۔۔۔ منگل کا دن۔

             سطریں ۔۔۔۔۔ لفظوں کی قطاریں۔                                            واسطے ۔۔۔۔۔ سبب، کےلیے۔

تشریح: 

            مرزااسداللہ خان غاؔلب اردو اور فارسی ادب کے بےتاج بادشاہ تھے۔وہ بلند پایہ شاعر ہونے کے ساتھ ساتھ صاحبِ طرز نثر نگار بھی تھے۔انھوں نے ہم عصروں اور اپنے دوستوں کو بےشمار خطوط لکھے۔مکتوب نگاری میں انھوں نے الگ راہ نکالی۔رسمی انداز ترک کرکے اپنے خطوط میں جدت کا رنگ بھرا۔وہ خود کہتے ہیں میں نے مراسلے کو مکالمہ بنا دیا۔

             تشریح طلب اقتباس مرزاغاؔلب کے اُس خط کا ابتدائیہ ہے جو انھوں نے اپنے ہردلعزیز شاگرد اور دوست میرمہدی حسین مجروح کے نام لکھا۔میرمہدی حسین مجروح دِلّی چھوڑ کر پانی پت چلے گئے تھے۔وہ غاؔلب کا اس قدر احترام کرتے تھے کہ ان کے کسی شعر کو غلط پڑھنا بھی گناہ سمجھتے تھے۔مرزاغاؔلب انھیں اپنے ذاتی احوال بیان کرتے ہوئے لکھتے ہیں کہ میرے پاس خط لکھنے کےلیے نہ کاغذ ہے اور نہ ہی ڈاک ٹکٹ موجود ہے۔ بچے ہوئے لفافوں میں ایک لفافہ پڑا ہوا ہے اور وہ بھی بغیر ٹکٹ والا ہے۔کتاب میں سے ایک کاغذ پھاڑ کر تمھیں خط لکھ رہا ہوں اور بغیر ٹکٹ والے لفافے میں بند کرکے بھیج رہا ہوں۔ اس بیرنگ خط کو دیکھ کر پریشان اور غم زدہ ہرگز نہ ہونا۔غاؔلب کسی مجبوری اور  تنگی ترشی کے باوجود بھی  دوسروں کے خطوط کا جواب دینا لازم سمجھتے تھے۔اس لیے انھوں نے میرمہدی حسین مجروح کو بیرنگ خط بھیج دیا۔ جیسا کہ غاؔلب خود کہتے ہیں:

                                " کل آپ کا خط پہنچا، آج جواب لکھتا ہوں، داد دینا کتنا شتاب لکھتا ہوں۔"

              غاؔلب  لکھتے ہیں کہ کل شام کو کہیں سے کچھ رقم مجھے مل گئی ہے۔آج کاغذ اور ٹکٹ منگوا لوں گا تاکہ آئندہ بیرنگ خط لکھنے سے بچا جاسکے ۔میرمہدی حسین مجروح سے مخاطب ہوکر مزید لکھتے ہیں کہ ایک دن پہلے تمھارا خط آیا تھا۔دل چاہ رہا تھا کہ اس خط کا جواب لکھوں۔ آج 08۔نومبر بروز منگل ہے اور صبح صادق کا وقت ہے۔ اس وقت کو عوام عموماً بڑی فجر کہتے ہیں۔مَیں نے خط کے جواب کے طور پر کچھ سطریں لکھ کر تمھیں بھیج دی ہیں۔ بقول غاؔلب:

                                                    خط لکھیں گے گرچہ مطلب کچھ نہ ہو

                                                    ہم   تو    عاشق ہیں تمھارے    نام    کے

--------------------------------------------------------------------------------------------------------------

                   محمدامیرعمرفاروق سہرانی                 03065976174                  aufsurani.blogspot.com