جماعت نہم اردو سبق ” شاعروں کے لطیفے“ تشریح پیراگراف نمبر 6

سبق : شاعروں کے لطیفے

پیراگراف نمبر6

اقتباس: 

مرزا غالب کی قاطع برہان۔۔۔۔۔۔۔۔۔۔۔۔۔۔۔تم اس کا کیا جواب دو گے۔

حوالہ متن:

سبق کا عنوان: شاعروں کے لطیفے

مصنف کا نام: مولانا محمد حسین آزاد

صنف : تذکرہ نگاری

ماخذ: آب حیات

خط کشیدہ الفاظ کے معانی۔

قاطع برہان۔۔۔۔۔۔ قطعی دلیل، واضح دلیل۔

زبان درازیاں۔۔۔۔۔۔۔۔۔ گستاخیاں، بدزبانیاں

فلاں۔۔۔۔۔۔۔۔۔ کوٸی ایک

لات ۔۔۔۔۔۔۔۔پاٶں، دولتی

سیاق و سباق:

تشریح طلب اقتباس درسی سبق ” شاعروں کے لطیفے“ کا آخری اقتباس ہے اس کا سیاق و سباق یہ ہے کہ مرزا غالب کی کتاب قاطع برہان پر غیر اخلاقی  تنقید کی گٸی جس کا کوٸی جواب نہ دے کر مرزا صاحب نے اعلی ظرفی کا مظاہرہ کیا۔

تشریح:

مولانا محمد حسین آزاد اردو ادب کے صاحب طرز نثر نگار ہیں۔ ان کا اسلوب بیان تمثیلی ہوتا ہے۔ وہ اپنے اسلوب کے موجد بھی ہیں اور خاتم بھی۔سبق ” شاعروں کے لطیفے“ ان کی ایسی تحریر ہے جس میں وہ نامور شعرا کرام کی زندگی میں پیش آنے والے واقعات اور ان کی حاضر دماغی کو اجاگر کرتے ہیں۔

             تشریح طلب اقتباس میں مصنف مرزا غالب کی حاضر جوابی اور ان کی اعلی ظرفی کو واضح کرتے ہوٸے کہتا ہے کہ مرزا غالب نے فارسی ادب کے حوالے سے ” قاطع برہان“ کے نام سے ایک بلند پایہ کتاب تحریر کی جس پر نام نہاد نقادوں نے بےجا تنقید کی اور اس کے جواب میں خامہ فرساٸی کی۔

                کسی بھی کتاب پر اگر مثبت تنقید کی جاٸے تو وہ بہت فاٸدہ مند ہوتی ہے کیونکہ اس سے اصلاح ہوتی ہے۔ مگر مرزا غالب کی کتاب ”قاطع برہان “کے جواب میں مثبت تنقید کی بجاٸے مرزا کی گستاخیاں اور ان کے خلاف بدزبانی شروع کر دی گٸی۔ کم ظرفی اور براٸی کا جواب براٸی سے نہیں دیا جاتا اور نہ کسی کی بداخلاقی پر اپنے اخلاق حسنہ کو ترک کیا جاتا ہے کیونکہ حدیث مبارکہ ہے:

” تم میں سے سب سے اچھا وہ ہے جس کے اخلاق سب سے اچھے ہوں“۔

                      مرزا غالب نے اسی بات کو مدنظر رکھتے ہوٸے ان گستاخوں اور بدزبانی کرنے والوں کو کوٸی جواب نہ دیا اور جب کسی شخص نے ان سے کہا کہ آپ بدکلامی اور بدزبانی کرنے والے شخص کی کتاب کا جواب ضرور دیں تو انھوں نے برملا اور  واضح فرمایا کہ اگر گدھا آپ کو لات مار دے تو آپ اس کا کیا جواب دیں گے۔مطلب یہ کہ کسی کم ظرف کی بات کا جواب  کم ظرفی سے نہیں دیا جاسکتا بلکہ اس کےلیے ہماری خاموشی ہی بہترین جواب ہوتی ہے۔ بقول غالب

غیر کو یارب وہ کیوں کر منع گستاخی کرے 

گر حیا بھی اس کو آتی ہے تو شرما جاٸے ہے