جماعت نہم اردو سبق ” شاعروں کےلطیفے“ تشریح پیراگراف نمبر 3

سبق : شاعروں کے لطیفے

پیراگراف نمبر 3

اقتباس:

ایک مشاعرے میں شیخ امام بخش ناسخ۔۔۔۔۔۔۔۔۔۔۔۔۔۔۔۔۔اشتیاق رہا۔

حوالہ متن:

سبق کا عنوان:  شاعروں کے لطیفے

مصنف کا نام:  مولانا محمد حسین آزاد

صنف:  تذکرہ نگاری

ماخذ:   آب حیات

خط کشیدہ الفاظ کے معانی۔

شعرا۔۔۔۔۔۔۔۔شاعر کی جمع، شعروشاعری کرنے والے۔

تعظیم۔۔۔۔۔۔۔ ادب و احترام۔

تعظیم رسمی۔۔۔۔۔۔۔۔ رواج کے مطابق سلام دعا کرنا۔

مزاج پرسی۔۔۔۔۔۔۔ خیریت معلوم کرنا، طبیعت کا پوچھنا۔

اشتیاق۔۔۔۔۔۔۔شوق و ذوق

مطلع۔۔۔۔۔۔۔۔ غزل کا پہلا شعر جس کے دونوں مصرعوں میں قافیہ اور ردیف موجود ہو۔

شریک۔۔۔۔۔۔۔ شامل ہونا۔

گروہٕ عام۔۔۔۔۔۔ عام افراد کاطبقہ۔

شمار۔۔۔۔۔۔ گنتی

دانہٕ تسبیح ۔۔۔۔۔۔۔۔۔۔ تسبیح کا دانہ

سیاق و سباق:

تشریح طلب اقتباس درسی سبق ” شاعروں کے لطیفے “ سے اخذ کیا گیا ہےجس میں مصنف مختلف نامور  شعرا کرام کی پرمزاح طبیعت کو عیاں کرتے ہیں۔ اس اقتباس میں بھی ایک مجلس میں امام بخش ناسخ کی حاضر دماغی اور ان کی پرمزاح طبیعت کو اجاگر کیاگیا ہے۔

تشریح:

مولانا محمد حسین آزاد اردو ادب کے صاحب طرز نثر نگار ہیں۔ان کا اسلوب بیان تمثیلی ہوتا ہے۔ وہ اپنے اسلوب کے موجد بھی ہیں اور خاتم بھی۔نفسیاتی حقیقت آراٸی اور مبالغہ آراٸی ان کے اسلوب کی نمایاں خصوصیات ہیں۔  سبق ”ںشاعروں کے لطیفے“ میں وہ نامور شعرا کرام  کی زندگی میں  پیش آنے والے مزاح کی چاشنی کو اجاگر کرتے ہیں۔

       تشریح طلب اقتباس میں مصنف ، مشہور شاعر شیخ امام بخش ناسخ کے بارے میں بتاتے ہیں کہ ایک بار وہ ایک جلسے میں مدعو تھے مگر وہ بروقت جلسے میں نہ پہنچ سکے بلکہ اس وقت جلسہ گاہ میں پہنچے جب جلسہ ختم ہو چکا تھا مگر اردو کے نامور شاعر خواجہ حیدر علی آتش  اور چند دیگر شعرا  ابھی جلسہ گاہ میں موجود تھے۔ 

         شیخ امام بخش ناسخ بھی وہاں جاکر بیٹھ گٸے اور سب سے سلام دعاکرنے اور ان کی خیریت معلوم کرنے کے بعد پوچھا کہ کیا مشاعرہ ختم ہوچکا ہے؟ اس پر جلسہ میں موجود شعرا نے جواب دیا کہ سب لوگوں کو آپ کے آنے کا انتظار رہا اور سب آپ کے اشعار سننے کے مشتاق رہے لیکن آپ نے آنے میں دیر کردی جس پر امام بخش ناسخ نے حاضر جوابی سے ایک شعر پڑھا جس کا مطلب یہ تھا کہ جس طرح تسبیح کے دانوں میں امام کا شمار نہیں ہوتا ویسے خاص لوگ بھی عام لوگوں کی محفل میں نہیں بیٹھتے۔ بقول شاعر

میری محبت بھی خاص ہے کیونکہ خاص ہوں میں

سو عام لوگوں میں ذکر اس کا نہیں کروں گا۔