پیراگراف نمبر9 مجھے میرے دوستوں سے بچاؤ

 

سبق: مجھے میرے دوستوں سے بچاؤ

پیراگراف نمبر9

اقتباس :

آخر تمھیں میں نے پکڑ لیا ۔۔۔۔۔۔۔۔ تمھاری خیریت دریافت کرنی تھی۔

حوالۂ متن: 

سبق کا عنوان: مجھے میرے دوستوں سے بچاؤ

مصنف کا نام: سجاد حیدر یلدرم

صنف: مضمون

ماخذ: خیالستان

خط کشیدہ الفاظ کے معانی:

حرج ۔۔۔۔ نقصان۔

طبیعت ۔۔۔۔ مزاج، حالت۔

واللہ ۔۔۔۔ اللہ کی قسم۔

مضمون نگار ۔۔۔۔ مضمون لکھنے والا۔

لقب ۔۔۔۔ صفاتی نام۔

خیریت ۔۔۔۔ سلامتی، بہتری۔

دریافت کرنا ۔۔۔۔ پوچھنا۔

خداحافظ ۔۔۔۔ اللہ نگہبان۔

سیاق و سباق: 

تشریح طلب اقتباس درسی سبق " مجھے میرے دوستوں سے بچاؤ " کے درمیان سے اخذ کیا گیا ہے۔ اس کا سیاق و سباق یہ ہے کہ مصنف کہتا ہے کہ میرا دوست احمد مرزا جب مجھ سے ملنے آتا ہے تو اودھم مچا کر آتا ہے۔ دروازہ اس زور سے کھولتا ہے جیسے آندھی آگئی ہو۔ جب جانے لگتا ہے تو مصافحہ کرتے وقت اس قدر زور سے میرے ہاتھ دباتا ہے کہ پھر وہ ہاتھ لکھنے کےلیے قلم بھی نہیں پکڑ سکتا۔

تشریح:

  سجاد حیدر یلدرم اردو ادب کے نامور مصنف اور افسانہ نگار تھے۔ان کے افسانوں میں رومانیت کا رنگ غالب ہوتا ہے اور یہ انشائے لطیف کا بھی عمدہ نمونہ ہیں۔ ایسا ہی ان کا افسانہ "مجھے میرے دوستوں سے بچاؤ" ہے جس میں وہ اپنے مخلص دوستوں سے عاجز نظر آتے ہیں اور انھیں ہر صورت چھوڑ دینے کے درپے ہیں۔

         تشریح طلب اقتباس میں مصنف اپنے شوخ مزاج دوست احمد مرزا کے بارے میں بتاتا ہے کہ وہ جب بھی مجھ سے ملنے کےلیے آتا ہے تو کمرے میں آندھی کی طرح آتا ہے اور نہایت پُر مسرت لہجے میں شور مچاتا ہے کہ میں نے بالآخر تمھیں تلاش کر ہی لیا ہے۔ اس دوران میں مضمون لکھ رہا ہوتا ہوں تو کہتا ہے کہ میری وجہ سے اپنا لکھنے کا کام مت بند کرنا بلکہ اپنا لکھنا جاری رکھو کیونکہ میں تمھارے لکھنے میں خلل ڈال کر تمھارا نقصان کرنے نہیں آیا۔ تم ہر وقت لکھتے ہی رہتے ہو اور اس قدر لکھتے ہو کہ اللہ ہی پناہ دے۔ تم لکھنے سے تو تھکتے بھی نہیں ہو۔

مصنف کہتا ہے کہ یہ سب کہنے کے بعد وہ میری خیریت پوچھتا ہے اور کہتا ہے کہ میری آمد کا مقصد ہی تمھاری طبیعت اور تمھاری خیریت کے بارے میں آگاہی چاہنا تھا۔ وہ اللہ تعالیٰ کی قسم کھا کر مجھ سے اپنی دوستی پر ناز کرتا ہے اور کہتا ہےکہ میں اس پر خوشی محسوس کرنے کے ساتھ ساتھ نازاں بھی ہوں کہ میرے دوستوں میں تم واحد ایسے دوست ہو جسے لوگ مضمون نگار کےطور پر جانتے ہیں۔ خوشی ہے کہ مجھے تم جیسا ادبی دوست ملا ہے۔ یہ سب کچھ کہنے کے بعد وہ فوراً جانے کو تیار ہو جاتا ہے اور کہتا ہے کہ میں یہاں بالکل بھی نہیں رکوں گا۔بس ایک منٹ کےلیے آیا تھا اور تمھاری خیریت معلوم کرنا مقصود تھا۔اس لیے اب چلتا ہوں۔ اللہ تمھارا حامی و ناصر ہو۔

بقول شاعر: 

   ہوئے تم دوست جس کے

دشمن اس کا آسماں کیوں ہو

یا

دشمنوں کی جفا کا خوف نہیں

دوستوں کی وفا سے ڈرتے ہیں

پیراگراف نمبر8 مجھے میرے دوستوں سے بچاؤ

 

                                            سبق:    مجھے میرے دوستوں سے بچاؤ

                        پیراگراف نمبر8

                                                    ✍    اقتباس : 

                             میرے دوست احمد مرزا ہیں ۔۔۔۔۔۔۔ بھونچال کے آنے سے کم نہیں ہے۔

                                                   ✍   حوالۂ متن:

                                       سبق کا عنوان:                    مجھے میرے دوستوں سے بچاؤ

                                       مصنف کا نام:                            سجاد حیدر یلدرم

                                             صنف :                                مضمون

                                               ماخذ:                                  خیالستان

                                                 ✍   خط کشیدہ الفاظ کے معانی:

               بھڑ بھڑیا ۔۔۔۔ باتونی، بےدھڑک بولنے والا۔                        نہایت ۔۔۔۔ بہت زیادہ۔

                 معقول ۔۔۔۔ مناسب، بہتر ۔                                        پرانی ۔۔۔۔ قدیم۔

              بےتکلفی ۔۔۔۔ بےباکی، آزاد مزاجی۔                                 خلقت ۔۔۔۔ فطرت، جبلت۔

          نچلا نہ بیٹھنا ۔۔۔۔ آرام سے نہ بیٹھنا۔                                الٹ پلٹ ۔۔۔۔ بے ترتیبی۔

              بھونچال ۔۔۔۔ زلزلہ،ہل چل۔

          ✍    سیاق و سباق: 

                                  تشریح طلب اقتباس درسی سبق  " مجھے میرے دوستوں سے بچاؤ" کے درمیان سے اخذ کیا گیا ہے۔ اس کا سیاق و سباق یہ ہے کہ مصنف دوستوں سے بیزاری اور اکتاہٹ ظاہر کرتے ہوئے کہتا ہے کہ میرے دوست اگرچہ اچھے ہیں اور مجھے فائدہ پہنچانے کی غرض سے میرے پاس آتے ہیں مگر مجھے ان سے فائدہ ملنے کی بجائے نقصان ملتا ہے۔اس لیے مجھے اگر باتوں میں عمر نہیں گزارنی اور کچھ کام کرنا ہےتو ان دوستوں کو ہر صورت چھوڑنا پڑے گا۔ چاہے مجھے کتنا ہی صدمہ ہو۔ میرا دوست احمد مرزا بھی ایسا ہی ہے جو آتا تو کچھ منٹ کےلیے ہے مگر میرے لکھنے کے دوران اس کی وجہ سے میرے سارے خیالات غائب ہو جاتے ہیں۔

               ✍     تشریح:

                                 سجاد حیدر یلدرم اردو ادب کے نامور مصنف اور افسانہ نگار تھے۔ان کے افسانوں میں رومانیت کا رنگ غالب ہوتا ہے اور یہ انشائے لطیف کا بھی عمدہ نمونہ ہیں۔ ایسا ہی ان کا افسانہ "مجھے میرے دوستوں سے بچاؤ" ہے جس میں وہ اپنے مخلص دوستوں سے عاجز نظر آتے ہیں اور انھیں ہر صورت چھوڑ دینے کے درپے ہیں۔

                    تشریح طلب اقتباس میں مصنف دوستوں سے بیزاری ظاہر کرتے ہوئے اور اپنے ایک دوست کا واقعہ بیان کرتے ہوئے کہتا ہے کہ احمد مرزا میرا اچھا دوست ہے۔ وہ بہت زیادہ باتونی ہے اور جو منھ میں آتا ہےکہ دیتا ہےاس لیے میں اسے بھڑ بھڑیا دوست کہتا ہوں۔ وہ آدمی بھی ایسا نہیں کہ اس سے نفرت کی جائے کیونکہ وہ انتہائی سمجھ دار، مناسب طبع ہونے کے ساتھ ساتھ شوخ مزاج بھی ہے۔ میری اس سے دوستی کافی پرانی ہے اور ہم ایک دوسرے کے ساتھ کسی قسم کا فرق روا نہیں رکھتے۔وہ آزاد طبیعت کا ہے اور جب بھی مجھ سے ملنے آتا ہے تو کبھی بھی آرام سے نہیں بیٹھتا اور نہ ہی آرام و سکون سے بیٹھنا اس کی فطرت میں ہے۔

                مصنف کہتا ہے کہ احمد مرزا جب بھی مجھ سے ملنے میرے گھرآتا ہے تو خوب شور و غل  مچاتے اور ہنگامہ کرتےہوئے آتا ہے اور اپنی شوخ مزاجی کی وجہ سے کمرے میں پڑے ہوئےسازوسامان کو بھی ادھر ادھر کر دیتا ہے۔ اس کے آتے ہی میرے کمرے میں پڑا سب کچھ بےہنگم اور بےترتیب  ہوجاتا ہے بلکہ اس کے آنے سے یوں لگتا ہے جیسے کوئی زلزلہ آگیا ہو یا کوئی اچانک ہل چل مچ گئی ہو۔ایسالگتا ہے جیسے میرا دوست نہیں آیا بلکہ اچانک قیامت در آئی ہو۔ بقول شاعر:

                                              ؎   دشمنوں کی    جفا   کا خوف نہیں 

                                                دوستوں کی وفا سے ڈرتے ہیں

پیراگراف نمبر7 مجھے میرے دوستوں سے بچاؤ

 

سبق: مجھے میرے دوستوں سے بچاؤ

پیراگراف نمبر7

اقتباس: 

چاہے مجھ پر نفرین کی جائے۔۔۔۔۔۔۔۔ میرے دل پر کیسا ہی صدمہ ہو۔

حوالۂ متن:

سبق کا عنوان: مجھے میرے دوستوں سے بچاؤ

مصنف کا نام: سجاد حیدر یلدرم

صنف: مضمون

ماخذ: خیالستان

خط کشیدہ الفاظ کے معانی:

نفرین ۔۔۔۔ کوسنا، برابھلا کہنا۔

احباب ۔۔۔۔ حبیب کی جمع، دوست۔

جمِ غفیر۔۔۔۔ ہجوم، بھیڑ۔

شناسائی ۔۔۔۔ واقفیت ، جان پہچان۔

وسیع ۔۔۔۔ پھیلا ہوا۔

بعض ۔۔۔۔ کچھ، چند۔

عزیز ۔۔۔۔ پیارے۔

صدمہ ۔۔۔۔ دکھ، غم۔

سیاق و سباق:

     تشریح طلب اقتباس درسی سبق " مجھے میرے دوستوں سے بچاؤ " کے درمیان سے اخذ کیا گیا ہے۔ اس کا سیاق و سباق یہ ہے کہ مصنف اپنے دوستوں سے بیزاری ظاہر کرتے ہوئے کہتا ہے کہ اگرچہ میرے دوست میرے خیرخواہ بن کر مجھے خوش کرنے کےلیے آتے ہیں اور مجھے فائدہ پہنچانا چاہتے ہیں مگر مجھے ان سے فائدہ ملنے کی بجائے نقصان پہنچ جاتا ہے۔ اس لیے میں اپنے دوستوں کو چھوڑ دوں گا۔ایسے دوستوں میں میرا ایک دوست احمد مرزا ہے جو جب بھی آتا ہے بھونچال مچا کر آتا ہے۔

تشریح: 

          سجاد حیدر یلدرم اردو ادب کے نامور مصنف اور افسانہ نگار تھے۔ان کے افسانوں میں رومانیت کا رنگ غالب ہوتا ہے اور یہ انشائے لطیف کا بھی عمدہ نمونہ ہیں۔ ایسا ہی ان کا افسانہ "مجھے میرے دوستوں سے بچاؤ" ہے جس میں وہ اپنے مخلص دوستوں سے عاجز نظر آتے ہیں اور انھیں ہر صورت چھوڑ دینے کے درپے ہیں۔

      تشریح طلب اقتباس میں مصنف اپنے دوستوں سے بیزاری ظاہر کرتے ہوئے کہتا ہے کہ لوگ چاہے مجھے برا بھلا کہیں اور میری بات کا حقارت سے انکار کریں اور اسے بالکل تسلیم نہ کریں پھر بھی میں اپنی بات اور اپنا مدعا  ضرور بیان کروں گا کہ میرے نزدیک  زیادہ دوست رکھنے کا کوئی فائدہ نہیں ہے۔ آج تک کوئی میرے سامنے میرے اس مؤقف کو غلط بھی ثابت نہیں کرسکا۔ کوئی شخص میرے سامنے  یہ بات ثابت نہیں کر سکا کہ بہت زیادہ دوست احباب بنانے اور اپنی واقفیت اور جان پہچان کے سلسلے کو زیادہ سے زیادہ لوگوں تک بڑھانے میں کوئی فائدہ ہے۔

              مصنف کہتا ہے کہ میرے نزدیک دوستی اور شناسائی کو زیادہ وسعت دینے کا کوئی فائدہ نہیں بلکہ یہ الٹا نقصان دہ ثابت ہوتا ہے کیونکہ ان دوستوں کی وجہ سے انسان اپنی عملی زندگی میں صرف دوستوں سے باتیں کرنے اور گپ شپ کرنے تک محدود رہ جاتا ہے۔ اس لیے میں یہ بات باور کراتا ہوں کہ اگر آپ دنیا میں اپنے لیے کچھ عملی اقدامات اٹھانا چاہتے ہیں اور اپنی زندگی کو بامقصد بنانا چاہتے ہیں اور چاہتے ہیں کہ آپ کی زندگی محض دوستوں سے باتیں کرنے اور دوستوں میں رہ کر وقت ضائع کرنے میں نہ گزرے تو آپ کو اپنے کچھ عزیز ترین دوستوں کو ہر صورت چھوڑنا پڑے گا کیونکہ اس کے بغیر عملی اور بامقصد زندگی گزارنا محض ایک خواب رہے گا۔اس لیے میں بھی اپنے ایسے پیارے اور عزیز دوستوں کو چھوڑ دوں گا جن کی وجہ سے میری زندگی بامقصد ہونے کی بجائے باتوں میں گزرے۔ ان دوستوں کو چھوڑنے پر مجھے جس قدر بھی دکھ اور صدمہ ہوگا میں اسے برداشت کر لوں گا مگر ان کو ضرور چھوڑ دوں گا کیونکہ ایسی دوستی میرے نزدیک عملی زندگی میں بےفائدہ ثابت ہوتی ہے۔ بقول شاعر: 

   دشمنوں کی جفا کا خوف نہیں 

    دوستوں کی وفا سے ڈرتے ہیں

پیراگراف نمبر6 سبق مجھے میرے دوستوں سے بچاؤ

سبق: مجھے میرے دوستوں سے بچاؤ

پیراگراف نمبر6

اقتباس :

یا اللہ کیا وہ اس پر بھی ۔۔۔۔۔۔۔۔۔ ہو جاتا ہے مجھے نقصان۔

حوالۂ متن:

سبق کا عنوان: مجھے میرے دوستوں سے بچاؤ

مصنف کا نام: سجاد حیدر یلدرم

صنف: مضمون

ماخذ: خیالستان

خط کشیدہ الفاظ کےمعانی:

نعمت ۔۔۔۔ انعام۔

بےہودہ ۔۔۔۔ فضول ، گھٹیا، نامقعول

دوبھر ۔۔۔۔ مشکل، کٹھن

خیر طلب ۔۔۔۔ عافیت چاہنے والے، بھلائی چاہنے والے۔

عملی نتیجہ ۔۔۔۔ انجام۔

احباب ۔۔۔۔ حبیب کی جمع، دوست۔

سیاق و سباق: 

         تشریح طلب اقتباس درسی سبق" مجھے میرے دوستوں سے بچاؤ " کے درمیان سے اخذ کیا گیا ہے۔ اس کا سیاق و سباق یہ ہے کہ مصنف دلی کے چاندنی چوک میں موجود فقیر کے حوالے سے بتاتا ہے کہ وہ کہتا ہے کہ اس کا کوئی دوست نہیں۔ کیا اس کا واقعی کوئی دوست نہیں؟ اور اسے اپنے دوستوں کے پاس نہیں جانا پڑتا اور اگر نہ جائے تو اسے کوئی شکایت نہیں کرتا۔ اگرایسا ہے تو وہ بہت خوش نصیب ہے کیونکہ میرے سامنے کوئی یہ ثابت نہیں کرسکا کہ احباب کا جم غفیر رکھنے کا کیا فائدہ ہے؟

تشریح: 

          سجاد حیدر یلدرم اردو ادب کے نامور مصنف اور افسانہ نگار تھے۔ان کے افسانوں میں رومانیت کا رنگ غالب ہوتا ہے اور یہ انشائے لطیف کا بھی عمدہ نمونہ ہیں۔ ایسا ہی ان کا افسانہ "مجھے میرے دوستوں سے بچاؤ" ہے جس میں وہ اپنے مخلص دوستوں سے عاجز نظر آتے ہیں اور انھیں ہر صورت چھوڑ دینے کے درپے ہیں۔

          تشریح طلب اقتباس میں مصنف چاندنی چوک میں اپنی مدد کےلیے آواز لگانے والے فقیر کے متعلق بتاتا ہے کہ اگر فقیر کا کوئی دوست نہیں ہے تو اسے اس پر افسوس کرنے کی بجائے اللہ تعالیٰ کا شکر ادا کرنا چاہیے کیونکہ دوستوں کے ساتھ رہ کر انسان کےلیے اپنی انفرادی زندگی اور زندگی کے لوازمات کو سرانجام دینامشکل ہو جاتا ہے اس لیے اس فقیر کا دوست نہ ہونا اس کےلیے ایک انعام سے کم نہیں ہے۔ وہ اللہ تعالیٰ سے اور کیا نعمت مانگتا ہے؟اللہ تعالیٰ نے اسے دوست سے نہ نواز کر  اس پر بڑا کرم کیا ہے۔

مصنف دوستوں سے بیزاری ظاہر کرتے ہوئے کہتا ہے کہ لوگ مجھ پر تنقید کرتے ہوئے کہیں گے کہ یہ آدمی دوستوں کے متعلق فضول اور نامعقول قسم کے خیالات رکھتا ہے۔ دوستوں کے بغیر تو انسان زندگی گزارنے کا تصور بھی نہیں کرسکتا کیونکہ زندگی کے بیشتر مسائل دوستوں کے تعاون سے ہی حل ہوتے ہیں جبکہ یہ شخص دوستوں سے دور بھاگتا ہے اور ان سے بیزاری ظاہر کرتا ہے۔لوگ مجھے کچھ بھی کہیں مگر میں اپنے دوستوں سے عاجز ہونے کی وجہ ضرور بتاؤں گا۔

میں دوستوں کو برابھلا کہتا ہوں اور نہ ہی مجھے اپنے دوستوں سے کوئی عداوت ہے۔وہ میرے پاس آتے ہیں تو میری خوشی اور دل لگی کےلیے آتے ہیں اور ان کے دل میں میرے لیے کوئی کھوٹ بھی نہیں ہوتابلکہ وہ میرے خیرخواہ ہیں مگر ان دوستوں سے عملی طور پر میں یہ نتیجہ اخذ کرتا ہوں کہ میرے دوست بظاہر تو مجھے فائدہ دینے اور میری خوشی کےلیے میرے پاس آتے ہیں مگر ان کے آنے سے مجھے اتنا فائدہ نہیں ملتا جتنا میرا نقصان ہو جاتا ہے۔ان کی آمد میرے لیے مفید ثابت ہونے کی بجائے نقصان دہ ثابت ہو جاتی ہے۔ بقول شاعر:

   ؎   دشمنوں کی جفا کا خوف نہیں

         دوستوں کی  وفا سے ڈرتے ہیں

پیراگراف نمبر5سبق مجھے میرے دوستوں ےے بچاؤ

 

سبق: مجھے میرے دوستوں سے بچاؤ

پیراگراف نمبر5

اقتباس: بھائی جان! دیکھو پرانی دوستی۔۔۔۔۔۔۔ میں نحیف و نزار ہوں۔

حوالہ متن: 

سبق کا عنوان: مجھے میرے دوستوں سے بچاؤ

مصنف کا نام: سجاد حیدر یلدرم

صنف: مضمون

ماخذ: خیالستان

خط کشیدہ الفاظ کے معانی:

واسطہ ۔۔۔۔ تعلق، دہائی دینا۔

احباب ۔۔۔۔ حبیب کی جمع، دوست۔

قرض ۔۔۔۔ ادھار۔

بےوقت ۔۔۔۔ بے موقع محل کے۔

جھونکے ۔۔۔۔ لہریں

نیند کے جھونکے ۔۔۔۔ خماری آنا، نیند آنا۔

قصہ ۔۔۔۔ کہانی، واقعہ۔

لطیفہ ۔۔۔۔ پُرمزاح بات۔

تصنیف ۔۔۔۔  کتاب لکھنا۔

خواہ مخواہ ۔۔۔۔ بغیر وجہ کے، فضول میں۔

ریویو ۔۔۔۔ تبصرہ، رائے دینا۔

ہوحق کرنا ۔۔۔۔ شورغل کرنا۔

شکایت ۔۔۔۔ گلہ شکوہ۔

تعجب ۔۔۔۔ حیرانی۔

ہٹاکٹا ۔۔۔۔ صحت مند۔

نحیف و نزار ۔۔۔۔ دبلا پتلا، کمزور و ناتواں۔

سیاق و سباق:

       تشریح طلب اقتباس درسی سبق " مجھے میرے دوستوں سے بچاؤ" کے تقریباً ابتدائی حصے سے اخذ کیا گیا ہے۔ اس کا سیاق و سباق یہ ہے کہ مصنف  دلی کے چاندنی چوک میں صدا لگاتے فقیر کے متعلق بیان کرتا ہے کہ اگر واقعی اس کا کوئی دوست نہیں تو یہ بہت خوش قسمت ہے اور یہیں وہ مجھ سے بڑھ گیا۔ کیا واقعی اس کا ایسا کوئی دوست نہیں جو اسے پانچ منٹ کی فرصت نہ دے۔ مجھے تو اپنے دوستوں کی وجہ سے اتنا بھی یقین نہیں آتا کہ تخلیے میں اپنے خیالات جمع کرکے اطمینان سے کچھ قلم بند کرسکوں گا یا نہیں۔ اگر اس کا سچ مچ کوئی دوست نہیں تو یہ اس کےلیے کسی نعمت سے کم نہیں اور اس پر اسے اللہ کا شکر ادا کرناچاہیے۔

تشریح:

          سجاد حیدر یلدرم اردو ادب کے نامور مصنف اور افسانہ نگار تھے۔ان کے افسانوں میں رومانیت کا رنگ غالب ہوتا ہے اور یہ انشائے لطیف کا بھی عمدہ نمونہ ہیں۔ ایسا ہی ان کا افسانہ "مجھے میرے دوستوں سے بچاؤ" ہے جس میں وہ اپنے مخلص دوستوں سے عاجز نظر آتے ہیں اور انھیں ہر صورت چھوڑ دینے کے درپے ہیں۔

      تشریح طلب اقتباس میں مصنف چاندنی چوک میں موجود فقیر کے دوست نہ ہونے کے دعوے کو اس کی خوش قسمتی گردانتے ہوئے کہتا ہے کہ کیا یہ فقیر دن دہاڑے اپنا روپیا پیسا اپنے دوستوں سے بچا کر لے جاسکتا ہے؟ کیا اس کا ایسا کوئی دوست نہیں جو اس سے رقم ادھار نہ مانگتے ہوئے یہ نہ کہے کہ بھائی تیری میری دوستی بہت پرانی ہے اور ہمارا باہم گہرا تعلق ہے تو میں اس دوستی اور تعلق کی بنیاد پر تم سے اپنی سخت ضرورت کے عوض کچھ رقم قرض کے طور پر مانگتا ہوں۔ گویا کہ:

" مال مفت دل بےرحم "۔

          ہمارے دوست جس طرح ہمیں بےموقع اور بےوقت کسی نہ کسی دعوت اور کسی تقریب میں زبردستی جانے پر مجبور کرتے ہیں کیا فقیر کو کوئی ایسے مجبور نہیں کرتا؟ کیا وہ ایسے دوستوں سے بچا ہوا ہے؟ اگر ایسا ہے تو یہ اس کےلیے غنیمت ہے۔ہمارے دوست تو ایسے ہیں جو سخت تھکاوٹ کے عالم اورنیند کی سخت طلب کے باوجود دوستوں کی محفل سے اٹھنے نہیں دیتے اور قصے، کہانیاں اور لطیفے سناتے رہتے ہیں مگر آرام کرنے کےلیے نہیں اٹھتے اور نہ کسی کے آرام کا خیال رکھتے ہیں۔ بقول شاعر:

؎ دوستوں سے ملاقات کی شام ہے

یہ سزا کاٹ کے اپنے گھر جاؤں گا

اگر فقیر کے ایسے کوئی دوست نہیں تو وہ اس سے بڑھ کر اور کیا چاہتا ہے؟ ہمیں اپنے دوستوں کو خط لکھنے پڑتے ہیں اور ان کے خطوط کا جواب بھی دینا پڑتا ہے۔ بعض اوقات اپنے کسی عزیز دوست کی لکھی ہوئی کتاب بھی طبیعت کے نہ چاہنے کے باوجود محض اس کی خواہش پر زبردستی پڑھنی پڑتی ہے اور اس پر تنقیدی جائزہ بھی اس کی تاکید کی وجہ سے لکھنا پڑتا ہے۔ ہمیں دوستوں کی محفل میں بلاوجہ اور صرف تفریح کےلیے شورغل بھی کرنا پڑتا ہے۔ اپنی مصروفیت سے وقت نکال کر دوستوں سے ملنے جانا ہماری مجبوری ہوتا ہے کیونکہ نہ جانے کی صورت میں ان کی طرف سے گلے شکوے ہوتے ہیں اور ان کی ناراضی مول لینی پڑتی ہے۔

            اگر فقیر ان تمام باتوں سے آزاد ہے تو وہ اس سے بڑھ کر اپنے لیے اور کون سی نعمت چاہتا ہے؟ اللہ تعالیٰ نے اسے دوستوں کی جھنجھٹ سے آزاد کیا ہوا ہے اور قابلِ رشک صحت بھی عطا کی ہوئی ہے۔وہ جسمانی طور پر مضبوط اور توانا بھی ہے جبکہ میں کمزور اور ناتواں ہوں اور مجھے دوستوں کی وجہ سے مشکلات بھی درپیش ہیں جس سے فقیر یکسر آزاد ہے تو وہ اس سے بڑھ کر اور کیا  چاہتا ہے؟ اسے تو اس پر اللہ تعالیٰ کا شکرگزار ہونا چاہیے۔ بقول شاعر:

 ؎ دل ابھی پوری طرح ٹوٹا نہیں

      دوستوں کی مہربانی چاہیے

پیراگراف نمبر4 سبق مجھے میرے دوستوں سے بچاؤ

 

سبق: مجھے میرے دوستوں سے بچاؤ

پیراگراف نمبر4

اقتباس:

اس کی صحت

پر مجھے رشک۔۔۔۔۔۔۔۔۔۔ وہی اس کے حق میں نعمت ہے۔

حوالہ متن:

سبق کا عنوان: مجھے میرے دوستوں سے بچاؤ

مصنف کا نام: سجاد حیدر یلدرم

صنف: مضمون

ماخذ: خیالستان

خط کشیدہ الفاظ کے معانی:

رشک ۔۔۔۔ کسی اور جیسابننے کی خواہش۔

فکر ۔۔۔۔پریشانی، سوچ

اطمینان ۔۔۔۔ سکون،آرام

بسورنا ۔۔۔۔ روہانسا ہونا۔

بشاشت ۔۔۔۔ تروتازگی

قابل رشک ۔۔۔۔ رشک کے لائق۔

بظاہر ۔۔۔۔ ظاہری طور پر، دیکھنے میں۔

مصیبت ۔۔۔۔ تکلیف۔

نعمت ۔۔۔۔ انعام۔

حسرت ۔۔۔۔ ناامیدی، یاس۔

سیاق و سباق:

تشریح طلب اقتباس درسی سبق"مجھے میرے دوستوں سے بچاؤ"کے ابتدائی حصے سے اخذ کیا گیا ہے۔ اس کا سیاق و سباق یہ ہے کہ مصنف دلی کے چاندنی چوک میں صدا لگاتے ہوئےفقیر سے اپنا موازنہ کرتے ہوئے کہتا ہے کہ اگرچہ میں نے تعلیم پائی ہے، وہ جاہل ہے۔میں اچھے لباس میں ہوتا ہوں اور وہ پھٹے کپڑے پہنتا ہے۔یہاں تک تو میں اس سے بہتر ہوں مگر جب وہ یہ کہتا ہے کہ اس کا کوئی دوست نہیں تو میں حسرت سے کہتا ہوں کہ میرے اتنے دوست ہیں۔اگر اس کا واقعی کوئی دوست نہیں تو وہ خوش نصیب ہے اور یہیں سے وہ مجھ سے بڑھ گیا ہے۔

تشریح:

          سجاد حیدر یلدرم اردو ادب کے نامور مصنف اور افسانہ نگار تھے۔ان کے افسانوں میں رومانیت کا رنگ غالب ہوتا ہے اور یہ انشائے لطیف کا بھی عمدہ نمونہ ہیں۔ ایسا ہی ان کا افسانہ "مجھے میرے دوستوں سے بچاؤ" ہے جس میں وہ اپنے مخلص دوستوں سے عاجز نظر آتے ہیں اور انھیں ہر صورت چھوڑ دینے کے درپے ہیں۔

         تشریح طلب اقتباس میں مصنف دلی کے چاندنی چوک میں صدا لگاتے ہوئے فقیر سے اپنا موازنہ کرتے ہوئے کہتا ہے کہ وہ فقیر بہت صحت مند اور ہٹاکٹا تھا جبکہ میں نحیف اور کمزور، اس وجہ سے مجھے اس کی صحت پر رشک آتا تھا۔مجھے اپنی بسر اوقات  کےلیے کام کاج اور دیگر مسائل کی فکرمندی رہتی ہے کیونکہ اپنے ہاتھ سے کمانے والے کو ایسی فکرمندی کا ہر صورت سامنا کرنا پڑتا ہے جبکہ وہ فقیر اس طرح کی کسی فکرمندی سے بےنیاز ہوکر اطمینان اور سکون سے اپنی زندگی بسر کرنے میں مصروف تھا کیونکہ اسے کمانے کے حوالے سے کسی قسم کی فکر لاحق نہ تھی۔ وہ دوسروں کی مدد کے سہارے زندگی گزار رہا تھا تو اسے کوئی فکر کیونکر لاحق ہوتی۔ جیساکہ کہا جاتا ہے:

"  محنت کرے مرغی اور انڈا کھائے فقیر"۔

اس فقیر کا چہرہ پُررونق اور تروتازہ تھا۔ اس میں اگر کچھ خامی تھی تو یہ تھی کہ اس نے بھیک مانگنے کےلیے اپنی شکل بھی رونے دھونے والی بنا رکھی تھی کیونکہ اگر وہ ایسا نہ کرتا تو کوئی بھیک دینے کو تیار نہ ہوتا۔ جیسا کہ کہاوت ہے:

" فقیرکی صورت سوال ہوتی ہے"۔

       مصنف کہتا ہے کہ میں یہ جانچنے کی کوشش کرتا رہا کہ آخر اس کی بہترین صحت اور چہرے کی تروتازگی کے پیچھے کون سا راز ہے؟ تو میں اس عجیب و غریب نتیجے پر پہنچا کہ اس کا دوست نہ ہونا ہی اس کی بنیادی وجہ تھی۔ وہ دوست نہ ہونے کو خود کےلیے مصیبت تصور کرتا حالانکہ میرے نزدیک اس کا دوست نہ ہونا اس کےلیے کسی انعام اور نعمت سے کم نہیں بلکہ دوست نہ ہونا اس کے حق میں بہتر ہے کیونکہ دوست ہی ہوتے ہیں جو ہمارے لیے مشکلات پیدا کرتے ہیں ۔اس کا کوئی دوست نہیں اس لیے وہ ہر طرح کی مشکل اور مصیبت سے بےنیاز تھا ۔ بقول شاعر

؎ دشمنوں کی جفا کا خوف نہیں

     دوستوں کی وفا سے ڈرتے ہیں

پیراگراف نمبر3 تشریح نہم سبق آرام و سکون

                                             سبق: آرام و سکون

                                           پیراگراف نمبر3

                                                                            اقتباس:

                                     گھر میں بہرے بستے ہیں جو کم بخت۔۔۔۔۔۔۔۔۔۔۔۔۔ کانوں پر جوں نہیں رینگتی۔

                                                                         حوالہ متن:

                                                      سبق کا عنوان:                  آرام و سکون

                                                       مصنف کا نام:                سید امتیاز علی تاج

                                                              صنف:                    ڈرامہ نگاری

                                                                 خط کشيدہ الفاظ کے معانی:

                    بہرے ۔۔۔۔۔ قوت سماعت سے محروم۔                                  کم بخت ۔۔۔۔۔ نامراد، بدنصیب۔

                    کھٹکھٹانا ۔۔۔۔۔ دستک دینا۔                                                    تاکید ۔۔۔۔۔ اصرار کرنا، کسی بات پر زور دینا۔

                 اللہ ماروں ۔۔۔۔۔ نگوڑوں، بدبختوں۔                                          شورغل ۔۔۔۔۔ شورشرابہ۔

                     نامراد ۔۔۔۔۔ بدبخت۔                                                بیسیوں مرتبہ ۔۔۔۔۔ متعدد بار، کئی بار۔

  کانوں پر جوں نہ رینگنا ۔۔۔۔۔ بالکل اثر نہ ہونا، رتی برابر اثر نہ ہونا۔

                       سیاق و سباق:

                                       تشریح طلب اقتباس درسی سبق " آرام و سکون" کے درمیان سے اخذ کیا گیا ہے۔ اس کا سیاق و سباق یہ ہے کہ ڈاکٹر صاحب، اشفاق میاں کو تکان اور حرارت کی وجہ سے آرام و سکون کا مشورہ دیتا ہے اور کہتا ہے کہ ان کے کمرے میں شور بالکل نہ ہو۔ ڈاکٹر کے جانے کے بعد اشفاق میاں کی بیوی جب گھنٹی ڈھونڈ رہی ہوتی ہے تو باہر سے سقا دروازہ کھٹکھٹاتا ہے۔ اس پر اشفاق میاں کی بیوی سقے کو آڑے ہاتھوں لیتی ہے جبکہ اشفاق میاں اپنی بیگم سے کہتے ہیں کہ اب اس بے چارے کو بخش دو۔

                            تشریح:

                                      سید امتیاز علی تاج کا شمار اردو ادب کے نامور ڈرامہ نویسوں میں ہوتا ہے۔ ان کی تحریر سادہ اور بےتکلف ہوتی ہے اور ان کے ڈراموں کے کردار جاندار اور متحرک ہوتے ہیں۔ چستی،برجستگی اور بےساختگی ان کے ڈراموں کا خاصا ہے۔" آرام و سکون" بھی ان کا تحریر کردہ ایسا ڈرامہ ہے جس میں وہ اجاگر کرتے ہیں کہ آرام و سکون انسان کی زندگی میں بہت ضروری ہے۔

                           تشریح طلب اقتباس میں مصنف، اشفاق میاں کے گھر کے اندر کا منظر بیان کرتے ہوئے کہتا ہے کہ جب اشفاق میاں کے گھر پانی پہنچانے کی غرض سے سقا زور سے  دروازے پر دستک دیتا ہے تو اشفاق میاں کی بیوی اس کے اس طرز عمل پر خفا ہو جاتی ہے اور سقے کو آڑے ہاتھوں لینا شروع کر دیتی ہے۔ وہ سقے کو اونچی آواز میں باور کرانا شروع کر دیتی ہے کہ گھر میں کوئی بہرے نہیں رہتے جو اس قدر زور سے دروازے کی کنڈی کھٹکھٹاتا ہے۔ اس نامراد کو اتنا بھی احساس نہیں ہے کہ آرام سے دستک دے کہ گھر میں کوئی بیمار پڑا ہوا ہے اور ڈاکٹر نے شور شرابہ کرنے سے سختی سے منع کیا ہے۔ اسے اور کسی کا نہیں تو ایک بیمار کا ہی احساس کر لینا چاہیے۔ جیسا کہ قول ہے:

                                            " اگر تم کسی کو خوشی نہیں دے سکتے تو اُسے تکلیف بھی نہ دو"۔ 

                         اشفاق میاں کی بیوی سقے کو جلی کٹی سنانے کے بعد اپنے ملازم للو سے مخاطب ہو کر اسے آواز لگاتی ہے کہ سقے سے کہو کہ پانی لانے کا یہ کوئی وقت نہیں ہے۔ اب دوپہر کا وقت قریب آ چکا ہے اور یہ اب پانی لے کر آیا ہے۔ آئندہ اگر اس کی یہی روش رہی اور  اس نے اسی طرح غیر ذمہ داری کا مظاہرہ جاری رکھا اور اسی طرح بےوقت پانی پہنچانے آیا تو یہ اپنی نوکری سے ہاتھ دھو بیٹھے گا کیونکہ ہم اسے نوکری سے نکال دیں گے۔ اسے متعدد بار باور کرایا جا چکا ہے کہ پانی وقت پر صبح سویرے دے جایا کرے مگر یہ  نہ تو کچھ سننے سمجھنے کو تیار ہے اور نہ ہی اس پر ہماری بات کا کوئی اثر ہوتا ہے۔