aufsurani.blogspot.com aufsurani.blogspot.com
سبق: نام دیو مالی
پیراگراف نمبر9
اقتباس:
ایک سال بارش بہت کم ہوئی ۔۔۔۔۔۔۔ اٹھا کر لاتا اور پودوں کو سینچتا۔
حوالۂ متن:
سبق کا عنوان: نام دیو مالی
مصنف کا نام: مولوی عبدالحق
صنف: خاکہ نگاری
ماخذ: چند ہم عصر
خط کشیدہ الفاظ کے معانی:
باؤلی ۔۔۔۔ وہ کنواں جس میں سیڑھیاں اتاری گئی ہوں۔ برائے نام ۔۔۔۔ نہ ہونے کے برابر۔
آفت ٹوٹ پڑنا ۔۔۔۔ مصیبت آ جانا۔ پیڑ ۔۔۔۔ درخت۔
تلف ہونا ۔۔۔۔ ضائع ہونا۔ نڈھال ۔۔۔۔ کمزور، ناتواں، بدحال۔
دق ۔۔۔۔ تپ محرقہ۔ ہرابھرا ۔۔۔۔ سرسبزوشاداب۔
سینچنا ۔۔۔۔ پانی دینا۔
سیاق و سباق:
تشریح طلب اقتباس درسی سبق " نام دیومالی"کے درمیان سےاخذ کیا گیا ہے۔ اس کا سیاق و سباق یہ ہے کہ مقبرہ رابعہ دورانی اورنگ آباد کے باغ میں مالی کے طور پر کام کرنے والا نام دیو محنت اور لگن کے ساتھ کام کرتا تھا۔ اس کے برعکس باغ کے دوسرے مالی کاہل اور کام چور واقع ہوئے تھے اس لیے انھیں ڈانٹ ڈپٹ کا سامنا ہوتا تھا لیکن نام دیو مالی دنیا و مافیہا سے بےخبر اپنے کام میں مصروف رہتا۔اسے کچھ کہنے سننے کی نوبت نہ آتی۔ وہ ستائش کی تمنا اور صلے کی پروا کیے بغیر محنت سے کام کرتا۔کم بارشوں کی وجہ سے پانی کی قلت نے جب لوگوں کے اوسان خطا کر رکھے تھے اور ان کے پاس پینے کا پانی تک نہیں تھا۔ نام دیو مالی اس وقت بھی کہیں نہ کہیں سے پانی لے آتا اور پودوں کی پیاس بجھاتا تھا۔
تشریح:
مولوی عبدالحق اردو ادب کے نامور اور بلند پایہ محقق ، نقاد ، خاکہ نگار اور عمدہ انشاپرداز تھے۔انھوں نے اردو زبان و ادب کے فروغ میں نمایاں کردار ادا کیا۔ اردو کے حوالے سے نمایاں خدمات پر انھیں " بابائے اردو" کا لقب ملا۔ درسی سبق " نام دیو مالی " ان کی خاکہ نگاری کا عمدہ نمونہ ہے۔ اس میں وہ نام دیو مالی کی محنت ، ایمانداری اور اس کے پُرعظمت کام کو اجاگر کرتے ہیں۔
تشریح طلب اقتباس میں مصنف مقبرہ رابعہ دورانی اورنگ آباد میں مالی کی حیثیت سے کام کرنے والے نام دیو کے متعلق بیان کرتا ہے کہ نام دیو پودوں سے لگاؤ رکھتا اور ان کا بہت زیادہ خیال رکھتا تھا۔ اس کی پودوں سے انسیت کا اندازہ اس بات سے لگایا جاسکتا ہے کہ ایک سال جب بارش بہت کم ہوئی اور پانی کی کمی ہوگئی بلکہ پانی کا قحط پڑ گیا تو پانی دوسرے کنوؤں کے ساتھ ساتھ ان خاص کنوؤں کی تہ سے بھی نیچے چلا گیا جن میں اترنے کےلیے سیڑھیاں لگائی گئی ہوتیں ہیں۔
پانی کی شدید قلت کی وجہ سے باغ کی حالت ابتر ہونے لگی۔ پودے ناگہانی مصیبت کا شکار ہوگئے۔ بہت سے پودے اور درخت پانی نہ ملنے کی وجہ سے ضائع ہوگئے۔جن پودوں میں زندگی کے آثار پائے جاتے تھے، وہ بالکل کمزور ہوکر مرجھا گئے تھے۔ ان کی رونق ماند پڑنے لگی اور ان کے پتے آہستہ آہستہ ایسے زرد پڑنے لگےجیسے تپ دق کے مریضوں کا چہرہ بیماری کی وجہ سے پیلا پڑ چکا ہوتا ہے۔ جیسا کہ کسی نے خوب کہا ہے:
"پانی اللہ تعالیٰ کی بہت بڑی نعمت ہے اس کی قدر وہاں محسوس کی جاتی ہے جہاں پانی قطرہ قطرہ جمع ہوتا ہے اور لوگ اس کی بوند بوند کو ترستے ہیں۔"
مقبرہ رابعہ دورانی اورنگ آباد کے وسیع و عریض باغ کا جو حصہ نام دیومالی کے سپرد تھا، وہ پانی کی شدید قلت کے باوجود بھی سرسبزوشاداب تھا۔نام دیو مالی کے باغ کی تروتازگی اور شادابی کی وجہ یہ تھی کہ اس نے اس مشکل وقت میں بھی پودوں کی خدمت کرنا نہ چھوڑی۔ وہ پانی کی تلاش میں نکل جاتا اور دُور دُور سے تھوڑا یا زیادہ جو پانی ملتا گھڑے میں بھر کر لے آتا اور اس سے اپنے پودوں کی پیاس بجھاتا تھا۔ بقول شاعر:
؎ خون جگر دے کے نکھاریں گے رخِ برگِ گلاب
ہم نے گلشن کے تحفظ کی قسم کھائی ہے
No comments:
Post a Comment