aufsurani.blogspot.com سبق: نام دیو مالی
پیراگراف نمبر8
✍ اقتباس:
باغ کے داروغہ( عبدالرحیم خان فینسی) خود بھی ۔۔۔۔۔ نہ ستائش کی تمنا نہ صلے کی پروا۔
✍ حوالۂ متن:
سبق کا عنوان: نام دیو مالی
مصنف کا نام: مولوی عبدالحق
صنف: خاکہ نگاری
ماخذ: چند ہم عصر
✍ خط کشیدہ الفاظ کے معانی:
داروغہ ۔۔۔۔ محافظ،نگران۔ کارگزار ۔۔۔۔ اچھا کام کرنے والا، کام میں مستعد۔
مستعد ۔۔۔۔ چست و چالاک، ہوشیار۔ کھینچ تان ۔۔۔۔ سختی سے کام لینا۔
ڈانٹ ڈپٹ ۔۔۔۔ جھاڑ پلانا۔ نگرانی ۔۔۔۔ دیکھ بھال، نظر رکھنا۔
ڈھیل ۔۔۔۔ رعایت،کوتاہی، کمی۔ بیڑی ۔۔۔۔ درخت کے پتے سے بنی سگریٹ۔
فطرتاً ۔۔۔۔ قدرتی طور پر۔ کاہل ۔۔۔۔ سست ۔
آرام طلبی ۔۔۔۔کام چوری۔ سستی اور کاہلی۔ موروثی ۔۔۔۔ وراثتی ۔
نوبت ۔۔۔۔حالت ۔ دنیا و مافیہا ۔۔۔۔ دنیا جہان۔
بےخبر ۔۔۔۔ لاعلم، لاپروا۔ ستائش ۔۔۔۔ تعریف۔
صلہ ۔۔۔۔ بدلہ ، معاوضہ۔
✍ سیاق و سباق:
تشریح طلب اقتباس درسی سبق " نام دیو مالی" کےدرمیان سے اخذ کیا گیا ہے۔ اس کا سیاق و سباق یہ ہے کہ نام دیو مالی بہت نفاست پسند تھا۔وہ خود بھی صاف ستھرا رہتا اور چمن کو بھی صاف ستھرا رکھتا تھا۔ پودوں کو پانی دینے سمیت شاخوں کی کانٹ چھانٹ سب کچھ وقت پر کرتا تھا۔ایک سال جب بارش کم ہوئی تو پانی کی کمی ہوگئی اور باغ پر آفت ٹوٹ پڑی۔ایسے وقت میں بھی نام دیو مالی نے کہیں نہ کہیں سے پانی لا کر اپنے چمن کو ہرابھرا رکھا۔
✍ تشریح:
مولوی عبدالحق اردو ادب کے نامور اور بلند پایہ محقق ، نقاد ، خاکہ نگار اور عمدہ انشاپرداز تھے۔انھوں نے اردو زبان و ادب کے فروغ میں نمایاں کردار ادا کیا۔ اردو کے حوالے سے نمایاں خدمات پر انھیں " بابائے اردو" کا لقب ملا۔ درسی سبق " نام دیو مالی " ان کی خاکہ نگاری کا عمدہ نمونہ ہے۔ اس میں وہ نام دیو مالی کی محنت ، ایمانداری اور اس کے پُرعظمت کام کو اجاگر کرتے ہیں۔
تشریح طلب اقتباس میں مصنف کہتا ہے کہ مقبرہ رابعہ دورانی اورنگ آباد کے باغ کی پہرہ داری اور حفاظتی امور کی ذمہ داری کا کام عبدالرحیم خان فینسی کے سپرد تھا۔ وہ کام کے حوالے سے بہت چست اور چالاک تھے اور دوسروں سے کام لینا اچھی طرح جانتے تھے۔ وہ یہ بھی بخوبی جانتے تھے کام چور مالیوں سےکیسے کام لیا جاتا ہے۔ وہ باغ کی حفاظت اور اس کی نگرانی میں کبھی کوتاہی نہیں کرتے تھے۔ انھیں اچھی طرح معلوم تھا کہ اپنی ذمہ داری سے ذرا سا بھی غافل ہوئے اور مالیوں سے چشم پوشی کی تو وہ آرام طلب بن جاتے ہیں اور کام کرنے کی بجائے فارغ بیٹھے رہتے یا درختوں کے سائے میں آرام سے نکمے پڑے بیڑی پیتے رہتے ہیں۔
سستی اور کام چوری انسان کی فطرت اور جبلت میں شامل ہے۔انسان ہمیشہ سے آرام اور آسائش کا طلب گار رہا ہے اور یہ اس کی کمزوری بھی ہے کیونکہ کام میں سستی اور آرام کی چاہت انسان کے اندر وراثتی طور پر موجود ہے۔ یہی وجہ ہے کہ معمولی سی رعایت ملتے ہی باغ کے مالی کام چوری سے باز نہ آتے۔ نام دیو مالی باقی سب مالیوں سے منفرد خوبیوں کا مالک تھا۔ اسے اپنے کام کے دوران کبھی بھی ڈانٹ ڈپٹ ہوئی اور نہ ہی اسے کچھ کہنے سننے کی ضرورت پیش آئی کیونکہ وہ پوری لگن اور تندہی سے اپنا کام فرض سمجھ کر کرتا تھا۔ بقول شاعر:
؎ نامی کوئی بغیر مشقت نہیں ہوا
سو بار عقیق کٹا تب نگیں ہوا
نام دیو مالی دنیا جہان کی ہاؤ ہو سے بےپروا اور لاتعلق ہوکر اپنے کام سے کام رکھتا تھا۔وہ نہ تو کسی کو خوش کرنے کےلیے کام کرتا اور نہ ہی اسے اس بات کی کوئی لالچ تھی کہ اسے اچھے کام کا اچھا صلہ ملے گا بلکہ اسے اپنے کام سے لگاؤ تھا اس وجہ سے وہ اپنے کام میں مصروف رہتا تھا۔ بقول شاعر:
؎ مت سہل اسے جانو ، پھرتا ہے فلک برسوں
تب خاک کے پردے سے انسان نکلتا ہے
No comments:
Post a Comment