aufsurani.blogspot.com aufsurani.blogspot.com
سبق: نام دیو مالی
پیراگراف نمبر10
اقتباس:
یہ وہ وقت تھا کہ قحط ۔۔۔۔۔۔۔۔ پودوں کے حق میں آبِ حیات تھا۔
حوالۂ متن:
سبق کا عنوان: نام دیو مالی
مصنف کانام: مولوی عبدالحق
صنف: خاکہ نگاری
ماخذ: چند ہم عصر
خط کشیدہ الفاظ کے معانی:
قحط ۔۔۔۔ قلت، خشک سالی . اوسان خطا ہونا ۔۔۔۔ ہوش اڑنا۔
میسر ہونا ۔۔۔۔ دستیاب ہونا، فراہم ہونا۔ قلت ۔۔۔۔ کمی۔
ڈھو ڈھو کر ۔۔۔۔ اٹھا اٹھا کر۔ گدلا ۔۔۔۔ گندا، غیرشفاف۔
آب حیات ۔۔۔۔ زندگی بخشنے والا پانی۔
سیاق و سباق:
تشریح طلب اقتباس درسی سبق" نام دیو مالی" کے درمیان سے اخذ کیا گیا ہے۔ اس کا سیاق و سباق یہ ہے کہ مصنف انسان کی فطرت کے بارے میں بتاتا ہے کہ انسان فطرتاً کاہل اور کام چور واقع ہوا ہے۔آرام طلبی ہم میں موروثی ہوگئی ہے لیکن نام دیو مالی کو کبھی کچھ کہنے سننے کی نوبت نہ آئی۔وہ دنیا و مافیہا سے بےخبر ہوکر کام کرتا تھا۔ مصنف کہتا ہے کہ اس کی اس بےمثل کارگزاری پر میں نے اسے انعام دینا چاہا تو اس نے لینے سے انکار کر دیا۔ وہ سمجھتا تھا کہ اپنے بچوں کے پالنے پوسنے میں کوئی انعام کا مستحق نہیں ہوتا۔
تشریح:
مولوی عبدالحق اردو ادب کے نامور اور بلند پایہ محقق ، نقاد ، خاکہ نگار اور عمدہ انشاپرداز تھے۔انھوں نے اردو زبان و ادب کے فروغ میں نمایاں کردار ادا کیا۔ اردو کے حوالے سے نمایاں خدمات پر انھیں " بابائے اردو" کا لقب ملا۔ درسی سبق " نام دیو مالی " ان کی خاکہ نگاری کا عمدہ نمونہ ہے۔ اس میں وہ نام دیو مالی کی محنت ، ایمانداری اور اس کے پُرعظمت کام کو اجاگر کرتے ہیں۔
تشریح طلب اقتباس میں مصنف بارشوں کی کمی اور پانی کی قلت کی وجہ سے لوگوں اور نام دیو مالی کو پیش آنے والی مشکلات کو بیان کرتے ہوئے کہتا ہے کہ پانی کی شدید کمی کے باعث لوگوں کی زندگی اجیرن ہوچکی تھی۔انھیں اپنی پیاس بجھانے کےلیے بھی پانی کہیں سے نہیں ملتا تھا۔ جیسا کہ کسی نے کیا خوب کہا ہے:
"پانی اللہ تعالیٰ کی بہت بڑی نعمت ہے اس کی قدر وہاں محسوس کی جاتی ہے جہاں پانی قطرہ قطرہ جمع ہوتا ہے اور لوگ اس کی بوند بوند کو ترستے ہیں۔"
پانی کی شدید قلت نے لوگوں کو تڑپا کر رکھ دیا تھا۔ ایسے بُرے اور کٹھن حالات میں بھی نام دیو مالی نے پانی کی تلاش کےلیے دوڑ دھوپ کرنا شروع کر دی تھی۔ اسے جہاں سے بھی پانی ملتا لے آتا اور اس سے اپنے پودوں کی پیاس بجھاتا تھا جس سے پودوں میں نئی زندگی کی لہر پیدا ہوجاتی تھی۔
قحط زیادہ ہوا تو پانی کی قلت میں بھی مزید بڑھ گئی۔ نام دیومالی کی پانی کےلیے جدوجہد میں بھی تیزی آگئی۔ وہ ہمت ہارنے والا نہیں تھا۔ اس نے پانی کی تلاش میں دن رات ایک کردی۔وہ راتوں کو بھی پانی کی تلاش میں نکل پڑتا تھا اور کہیں نہ کہیں سے پانی بھر کر لے آتا تھا۔ بقول راحت اندوری:
؎ میں نے اپنی خشک آنکھوں سے لہو چھلکا دیا
اک سمندر کہ رہا تھا مجھ کو پانی چاہیے
نام دیو مالی پودوں سے انتہائی لگاؤ رکھتا تھا اس وجہ سے اسے جس طرح کا پانی میسر آتا پودوں کی زندگی بچانے کےلیے لے آتا تھا۔قلت کی وجہ سے پانی کی مانگ بہت بڑھ چکی تھی اور لوگ اس کی تلاش میں مارے مارے پھرتے تھے لیکن پانی ملنے کا نام نہیں لے رہا تھا۔ ایسے کڑے وقت میں نام دیو مالی جو پانی تلاش کرکے لاتا وہ پانی کم ہوتا تھا بلکہ پانی اور کیچڑ کا آمیزہ زیادہ ہوتا تھا۔ گارے اور مٹی کی کثرت کی وجہ سے پانی بہت گندا اور غیرشفاف ہوتا تھا لیکن قلت اور قحط کے اس دور میں یہی پانی بھی غنیمت تھا اور پودوں کو نئی زندگی دے رہا تھا اور ان کےلیے آب حیات سے کم نہیں تھا۔ بقول شاعر:
؎ خون جگر دے کے نکھاریں گے رخِ برگِ گلاب
ہم نے گلشن کے تحفظ کی قسم کھائی ہے
No comments:
Post a Comment