aufsurani.blogspot.com
سبق: نام دیو مالی
پیراگراف نمبر4
✍ اقتباس:
اب مجھے اس سے دلچسپی ہونے لگی ۔۔۔۔۔۔۔۔ چہرے پر خوشی کی لہر دوڑ جاتی۔
✍ حوالۂ متن:
سبق کا عنوان: نام دیو مالی
مصنف کا نام: مولوی عبدالحق
صنف: خاکہ نگاری
ماخذ: چند ہم عصر
✍ خط کشیدہ الفاظ کے معانی:
دلچسپی ۔۔۔۔ شوق ، رغبت ، میلان۔ آس پاس ۔۔۔۔ ارد گرد، گردونواح، قرب و جوار۔
مگن ۔۔۔۔ مصروف ، مشغول۔ پیڑوں ۔۔۔۔ درختوں۔
پرورش ۔۔۔۔ نشوونما، پالنا پوسنا۔ نگہداشت ۔۔۔۔ حفاظت ، دیکھ بھال۔
سرسبز ۔۔۔۔ ہرابھرا۔ شاداب ۔۔۔۔ تروتازہ۔
سرسبز و شاداب ۔۔۔۔ ہرابھرا اور تروتازہ۔ پھلتے پھولتے ۔۔۔۔ نشوونما پاتے، بڑھتے۔
توانا ۔۔۔۔ طاقت ور ۔ ٹانٹا ۔۔۔۔ توانا، مضبوط۔
توانا اور ٹانٹا ۔۔۔۔ طاقت ور اور مضبوط۔ خوشی کی لہر دوڑنا۔۔۔۔ بہت زیادہ خوشی ہونا۔
✍ سیاق وسباق:
تشریح طلب اقتباس درسی سبق " نام دیو مالی" کے ابتدائی حصے سے اخذ کیا گیا ہے۔ اس کا سیاق و سباق یہ ہے کہ مصنف کہتا ہے کہ نام دیو مالی مقبرہ رابعہ دورانی اورنگ آباد کے باغ میں پودوں کی دیکھ بھال کرتا، ان کی کانٹ چھانٹ کرتا اور انھیں بڑھتا دیکھ کر مسکراتا اور خوش ہوتا تھا۔وہ پودوں سے محبت کرتا اور انھیں اپنی اولاد سمجھتا تھا۔ کسی پودے کو اگر کیڑا لگ جاتا یا کوئی روگ پیدا ہو جاتا تو وہ بہت فکرمند ہو جاتا۔
✍ تشریح:
مولوی عبدالحق اردو ادب کے نامور اور بلند پایہ محقق ، نقاد ، خاکہ نگار اور عمدہ انشاپرداز تھے۔انھوں نے اردو زبان و ادب کے فروغ میں نمایاں کردار ادا کیا۔ اردو کے حوالے سے نمایاں خدمات پر انھیں " بابائے اردو" کا لقب ملا۔ درسی سبق " نام دیو مالی " ان کی خاکہ نگاری کا عمدہ نمونہ ہے۔ اس میں وہ نام دیو مالی کی محنت ، ایمانداری اور اس کے پُرعظمت کام کو اجاگر کرتے ہیں۔
تشریح طلب اقتباس میں مصنف نام دیو مالی کی پودوں سے محبت اور ان کی خدمت کے حوالے سے اپنا مشاہدہ بیان کرتے ہوئے کہتا ہے کہ جب میں نام دیو مالی کو باغ میں تندہی اور لگن سے کام کرتے ہوئے دیکھتا تو مجھے بہت خوشی ہوتی۔ میری رغبت اس کا کام دیکھنے میں بڑھنے لگتی۔ میں اپنا لکھنے کا کام چھوڑ کر اسے باغ میں کام کرتے ہوئے دیکھنا شروع کر دیتا۔ نام دیو مالی کو اس بات کی ذرا بھر بھی خبر نہ ہوتی کہ کوئی اس کے کام کو بغور دیکھ رہا ہے۔ کون اس کو دیکھ رہا ہے یا اس کے گردونواح میں کون کیا کر رہا ہے اسے کچھ پروا نہیں تھی اور نہ ہی اس نے کبھی یہ سب کچھ جاننے کی کوشش کی۔ اسے اپنے کام سے مطلب تھا اس لیے وہ دوسروں کی طرف توجہ دینے کی بجائے خود کو اپنے کام میں مصروف رکھتا تھا۔ جیسا کہ ایک قول ہے:
✌" آگے بڑھنے والا ہمیشہ محنت سے اپنے کام پر توجہ دیتا ہے کیونکہ اس کے پاس ضائع کرنے کو وقت نہیں ہوتا "۔✌
نام دیو مالی اولاد سے محروم تھا اس لیے وہ باغ کے پودوں اور درختوں کو ہی اپنی اولاد سمجھتا تھا اور ان کی حفاظت بھی اولاد کی طرح کرتا تھا۔ وہ شبانہ روز محنت سے پودوں کی خدمت اور دیکھ بھال کرتا۔ پودوں کو ہرابھرا اور تروتازہ دیکھ کر بےحد خوش ہوتا۔ جس طرح ایک ماں اپنے بچوں کو کھیلتا اور ہنستا مسکراتا دیکھ کر خوش ہوتی ہے بالکل اسی طرح نام دیو مالی اپنے پودوں کو بڑھتا اور نشوونما پاتا دیکھ کر خوش ہوتا تھا۔ اسے پودوں سے اس قدر لگاؤ اور انس تھا کہ وہ ہر پودے پر انفرادی توجہ دیتا۔ ان سے پیار کرتا اور ہر پودے کی مکمل دیکھ بھال کرتا تھا۔ اس دوران وہ پودوں کو جھک کر یوں دیکھتا جیسے وہ چھپ کر ان سے باتیں کر رہا ہو۔ اس کی پودوں سے محبت کا ثبوت یہ تھا کہ اس کے لگائے ہوئے پودے ہمیشہ ہرے بھرے ہوتے۔اپنے پودوں کو ہرابھرا ، تروتازہ اور مضبوط دیکھ کر اس کا چہرہ خوشی سے دمک اٹھتا تھا۔ بقول شاعر:
؎ خونِ جگر دے کے نکھاریں گے رخِ برگِ گلاب
ہم نے گلشن کے تحفظ کی قسم کھائی ہے
No comments:
Post a Comment