aufsurani.blogspot.com aufsurani.blogspot.com سبق: علی بخش
پیراگراف نمبر11
اقتباس:
جھنگ پہنچ کر میں اسے ایک رات ۔۔۔۔۔۔۔۔۔ کام بھی نہیں کرسکتے تو ہم پر لعنت ہے۔
حوالۂ متن:
سبق کا عنوان: علی بخش
مصنف کا نام: قدرت اللہ شہاب
صنف: خاکہ نگاری
ماخذ: شہاب نامہ
خط کشیدہ الفاظ کے معانی:
ہاں ۔۔۔۔ پاس۔ قابل ۔۔۔۔ لائق۔
فرض شناس ۔۔۔۔ ذمہ داری سے کام کرنے والا۔ سپرد کرنا۔۔۔۔ حوالے کرنا، سونپنا۔
نہایت ۔۔۔۔ بہت زیادہ۔ مقدس ۔۔۔۔ پاک۔
تابوت ۔۔۔۔ میت کو دفن کرنے کا صندوق۔ عقیدت ۔۔۔۔ لگاؤ، محبت، عزت و احترام۔
معمولی ۔۔۔۔ عام سا، ہلکا سا۔ لعنت ۔۔۔۔ پھٹکار۔
سیاق و سباق:
تشریح طلب اقتباس درسی سبق " علی بخش " کا آخری اقتباس ہے۔ مصنف قدرت اللہ شہاب، علامہ اقبال کے دیرینہ اور وفادار ملازم علی بخش کو اس کی زمین کا قبضہ دلانے کی غرض سے جھنگ لے جاتا ہے اور اسے وہاں کے مجسڑیٹ مہابت خان کے سپرد کر دیتا ہے تاکہ وہ اس کی زمین شریر لوگوں کے قبضے سے چھڑا کر اس کےحوالے کرسکے۔
تشریح:
قدرت اللہ شہاب اردو کے نامور ادیب اور افسانہ نگار ہیں۔ انھوں نے علم و عمل کے میدان میں نمایاں کارنامے سرانجام دیے۔ وہ زبان و بیان پر دسترس رکھتے تھے۔ ان کا طرز تحریر انتہائی سادہ ہوتا اور اپنے اندر جاذبیت اور دل کشی رکھتا تھا۔ " شہاب نامہ " ان کی خودنوشت ہے جو مقبول یادداشتوں کے مجموعے پر مشتمل ہے۔ درسی سبق " علی بخش " بھی شہاب نامہ سے اخذ کیا گیا ہے۔ اس سبق میں وہ علامہ اقبال کے دیرینہ اور وفادار ملازم علی بخش کی خدمات اور ان کی زندگی سے جڑے علامہ اقبال کے حالات و واقعات کو اجاگر کرتے ہیں۔
تشریح طلب اقتباس میں مصنف قدرت اللہ شہاب ، علامہ اقبالؒ کے دیرینہ ملازم علی بخش کے حوالے سے بتاتا ہے کہ جب میں اسے لے کر جھنگ پہنچا تو میں نے علی بخش کو ایک رات اپنے پاس ہی ٹھہرایا۔ اگلے دن صبح سویرے میں نے اسے اپنے علاقے کے مجسٹریٹ کپتان مہابت خان کے حوالے کر دیا۔ کپتان مہابت خان بہت ہی لائق اور ایماندار آدمی تھا۔وہ بطور مجسٹریٹ اپنے فرائض اوراپنی ذمہ داریوں سے مکمل طور پر آگاہ تھا۔ وہ پوری محنت اور ذمہ داری سے اپنے فرائض سرانجام دیتا تھا۔ جیساکہ قرآن مجید میں ارشاد ہے:
" بےشک ہم نے انسان کو بڑی محنت اور مشقت میں رہنے والا بنایا ہے ۔" (سورة البلد)۔
علامہ اقبالؒ کے خدمت گزار کی حیثیت کے پیش نظر کپتان مہابت خان علی بخش سے بڑی عزت و احترام کے ساتھ پیش آیا۔اس نے علی بخش کو اس طرح اپنے گلے سے لگایا جس طرح لوگ کسی پاک اور نیک ہستی کی وفات کے بعد اس کے تابوت کو عقیدت و محبت کے ساتھ اپنے سینے سے لگاتے ہیں۔اس نے نہ صرف علی بخش سے والہانہ عقیدت اور محبت کا اظہار کیا بلکہ ساتھ میں اس بات کا اعلان کرکے یقین دہانی بھی کرائی کہ وہ علی بخش کو بلاتاخیر آج ہی اپنے ساتھ لائل پور لے جائے گا اور شریر لوگوں کے ناجائز قبضے سے اس کی زمین واگزار کراکے اس کا قبضہ علی بخش کو دلا کر ہی واپس آئے گا۔ ناجائزی کی بھی کوئی حد ہوتی ہے اور اگر ہم علی بخش کا چھوٹا سا کام بھی نہیں کرسکتے تو ہم سے بڑھ کر مطعون کوئی نہیں ہوسکتا۔ بقول شاعر:
؎ اپنے لیے تو سبھی جیتے ہیں اس جہاں میں
ہے زندگی کا مقصد اوروں کے کام آنا
