aufsurani.blogspot.com aufsurani.blogspot.com
سبق: علی بخش
پیراگراف نمبر9
اقتباس :
ڈاکٹر صاحب بڑے درویش آدمی تھے ۔۔۔۔۔۔۔۔۔۔ خواہ مخواہ ایسے ہی بھوکے نہ رہا کرو۔
حوالۂ متن:
سبق کا عنوان: علی بخش
مصنف کا نام: قدرت اللہ شہاب
صنف: خاکہ نگاری
ماخذ: شہاب نامہ
خط کشیدہ الفاظ کے معانی:
درویش ۔۔۔۔ فقیر، اللہ والے، خدارسیدہ۔ حساب کتاب ۔۔۔۔ لین دین۔
کفایت ۔۔۔۔ بچت۔ ضائع کرنا ۔۔۔۔ کھونا، گنوانا۔
تکلیف ۔۔۔۔ کوفت، پریشانی۔ اکثراوقات ۔۔۔۔ بیشتر بار، متعدد بار
مہنگی ۔۔۔۔ گراں۔ ناراض ہونا ۔۔۔۔ خفاہونا، برہم ہونا۔
خواہ مخواہ ۔۔۔۔ بلاوجہ۔
سیاق و سباق:
تشریح طلب اقتباس درسی سبق "علی بخش" کے درمیان سے اخذ کیا گیا ہے۔اس کا سیاق و سباق یہ ہے کہ علی بخش مصنف قدرت اللہ شہاب کے ساتھ گاڑی میں سفر کے دوران علامہ اقبالؒ کے واقعات بیان کر رہا تھا۔ علی بخش نے بتایا کہ علامہ اقبالؒ میں ایک عجیب بات تھی کہ رات کو سوتے ہوئے انھیں جھٹکا لگتا اور وہ مجھے آواز دے کر بلاتے۔ اس موقع پر وہ مجھ سے گردن کی پچھلی رگوں اور پٹھوں کو زور زور سے دبواتے۔ علی بخش نے مزید بتایا کہ اس کی ایک مربع زمین کے معاملے میں لائل پور کے ڈپٹی کمشنر ، مال افسر اور سارا عملہ میری آؤ بھگت کرتا ہے۔ میری ساری عزت اور قدر بھی صرف ڈاکٹر صاحب کی وجہ سے ہے۔
تشریح:
قدرت اللہ شہاب اردو کے نامور ادیب اور افسانہ نگار ہیں۔ انھوں نے علم و عمل کے میدان میں نمایاں کارنامے سرانجام دیے۔ وہ زبان و بیان پر دسترس رکھتے تھے۔ ان کا طرز تحریر انتہائی سادہ ہوتا اور اپنے اندر جاذبیت اور دل کشی رکھتا تھا۔ " شہاب نامہ " ان کی خودنوشت ہے جو مقبول یادداشتوں کے مجموعے پر مشتمل ہے۔ درسی سبق " علی بخش " بھی شہاب نامہ سے اخذ کیا گیا ہے۔ اس سبق میں وہ علامہ اقبال کے دیرینہ اور وفادار ملازم علی بخش کی خدمات اور ان کی زندگی سے جڑے علامہ اقبال کے حالات و واقعات کو اجاگر کرتے ہیں۔
تشریح طلب اقتباس میں مصنف، علامہ اقبالؒ کے دیرینہ ملازم علی بخش کی علامہ اقبالؒ سے وابستہ یادوں کو اجاگر کرتا ہے جو علی بخش نے مصنف کو دورانِ سفر گاڑی میں بتائیں تھیں۔ علی بخش نے بتایا کہ علامہ اقبالؒ خدا رسیدہ اور اللہ والے انسان تھے۔ انھوں نے گھر کے کاموں کی مکمل ذمہ داری میرے سپرد کر رکھی تھی۔ اسی وجہ سے گھر کے اخراجات کا حساب کتاب بھی میرے پاس ہی ہوتا تھا۔ انھوں نے کبھی اخراجات کے حوالے سے کوئی روک ٹوک نہیں کی پھر بھی میں بچت سے کام لیتا اور کبھی فضول خرچی نہ کرتا تھا۔ قرآن مجید میں ارشاد ہے:
" بےشک فضول خرچی کرنے والے شیطان کے بھائی ہیں۔" (سورة الاسرا: 27)۔
علی بخش نے مزید بتایا کہ میں ڈاکٹر صاحب کا پیسا کبھی ضائع کرتا اور نہ اس کا ناجائز استعمال کرتا کیونکہ مجھے ان کا پیسا ضائع کرنے سے بہت دکھ اور افسوس ہوتا۔ اس لیے میں اس حوالے سے خاص خیال رکھتا تھا۔ بقول شاعر:
؎ بےضرورت ایک پیسا تُو نہ کھیسے سے نکال
وقت پر کام آئے گا تُو پاس رکھ کر دیکھ لے
جب کبھی میں ضروری کام کے سلسلے میں ریل گاڑی کے ذریعے سفر کرتا تو دورانِ سفر گاڑی کئی اسٹیشنوں پر رکتی مگر میں بھوک لگنے کے باوجود وہاں کھانا نہیں کھاتا تھا اور بھوکا رہنے کو ہی ترجیح دیتا تھا۔ اس کی وجہ یہ تھی کہ ان اسٹیشنوں پر روٹی مہنگی ملتی تھی اور میں اپنی ذات کےلیے مہنگا کھانا پسند نہیں کر سکتا تھا۔ جب ڈاکٹر صاحب کو میرے بھوکا رہنے کا علم ہوتا تو وہ بہت ناراضی کا اظہار کرتے اور مجھ سے کہتے کہ انسان کو ہمیشہ وقت اور حالات کے مطابق چلنا چاہیے۔ تمھیں جب بھوک لگے تو کھانا کھالیا کرو۔ بلاوجہ خود کو بھوکا رکھ کر اذیت میں ڈالنا اچھی بات نہیں۔
No comments:
Post a Comment