پیراگراف5 تشریح دہم سبق مرزا محمد سعید

          سبق: مرزا محمد سعید

      پیراگراف نمبر5

        اقتباس:

       پچاس ساٹھ سال پہلے دلی کے۔۔۔۔۔۔۔۔۔۔۔۔۔۔۔۔۔۔۔۔دوسرے پروفیسر مرزا محمد سعید ۔

      حوالۂ متن:

      سبق کا عنوان: مرزا محمد سعید

     مصنف کا نام: شاہد احمد دہلوی

            صنف:           خاکہ نگاری

           ماخذ:        گنجینۂ گوہر

            خط کشیدہ الفاظ کے معانی:

    شرفا ۔۔۔۔۔۔۔ شریف کی جمع، معزز لوگ، شریف لوگ۔

       نظریہ ۔۔۔۔۔۔۔۔ اصول، نصب العین، مقصد۔

        اصلاح ۔۔۔۔۔۔درستی۔

علمی حلقے ۔۔۔۔۔۔۔۔۔اہلِ علم و ادب۔

    نمود ۔۔۔۔۔۔۔ شہرت، ناموری، نمائش

     سیاق و سباق:

          تشریح طلب اقتباس درسی سبق " مرزا محمد سعید" کے درمیان سے اخذ کیا گیا ہے۔مصنف کہتے ہیں کہ مرزا صاحب دلی کے شریف اور متمول خاندان سے تعلق رکھتے تھے۔ سرسید احمد خان اور منشی ذکاءاللہ سے ان کی عزیزداری تھی۔ مرزا صاحب نے گورنمنٹ کالج لاہور سے تعلیم حاصل کی ۔انھوں نے اس زمانے میں اعلیٰ تعلیم حاصل کی جب انگریزی تعلیم کے حصول کو مسلمان گھرانوں میں اچھا نہیں سمجھا جاتا تھا۔ ان کے استادوں میں علامہ اقبالؒ بھی شامل تھے جن سے ان کے مخلصانہ تعلقات تھے۔ 

         تشریح:

                     شاہد احمد دہلوی اردو ادب کے نامور مصنف تھے۔ وہ زبان و بیان پر مکمل عبور رکھتے تھے۔وہ موسیقار کے ساتھ ساتھ خاکہ نگار بھی تھے۔ مرزا محمد سعید کا شمار ان کے اساتذہ میں ہوتا ہے۔ اپنے استاد محترم کی زندگی کا خاکہ انھوں نے درسی سبق " مرزا محمد سعید" میں بیان کیا جو کہ ان کی کتاب  گنجینۂ گوہر سے اخذ کیا گیا ہے۔اس سبق میں وہ مرزا محمد سعید کی شخصیت اور ان کے علمی مرتبے کو نہایت عمدگی سے بیان کرتے ہیں۔

                                    تشریح طلب اقتباس میں مصنف گزشتہ ادوار کے متعلق بتاتے ہیں کہ تقریباً پچاس ساٹھ سال پہلے برصغیر میں انگریزوں کے غاصبانہ تسلط کی بدولت مسلمان انگریزوں کو اپنا کھلا دشمن تصور کرتے تھے اس لیے دہلی میں مقیم وہ بااثر اور معزز مسلمان جنھیں مسلم معاشرے میں بہت عزت و احترام حاصل تھا،انگریزی تعلیم کو کچھ اہمیت نہ دیتے تھے بلکہ اسے نفرت آمیز نگاہوں سے دیکھتے تھے اور مسلمانوں کو انگریزی تعلیم سے دور رہنے کی تلقین کرتے تھے۔

                                سرسید احمد خان نے جب دیکھا کہ انگریزی تعلیم کے حوالے سے مسلمانوں کا طرز عمل اور رویہ کافی جذباتی ہے اور مسلمانوں کو اس طرزعمل کی وجہ سے ہر لحاظ سے نقصان ہو رہا ہے تو انھوں نے مسلمانوں کی تعلیم کے حوالے سے اس غلط نظریے کی اصلاح اور درستی کرنے کی کوشش شروع کر دی کیونکہ وہ سمجھتے تھے کہ علم سیکھنے کی کوئی سرحد نہیں ہوتی اور نہ ہی کسی سے مخالفت کی وجہ سے علم سے دوری اختیار کی جاسکتی ہے۔اسلام میں تو حصولِ علم کی بہت ترغیب دی گئی ہے اور حضوراکرمﷺ  نے غزوۂ بدر میں اس شرط پر دشمن قیدیوں کو رہا فرمایا کہ وہ مسلمان بچوں کو علم سکھائیں اور حدیث مبارکہ بھی ہے:

" علم حاصل کرو خواہ تمھیں چین ہی کیوں نہ جانا پڑے"۔

اور بقول شاعر:

   وہ باتیں جن سے قومیں ہو رہی ہیں نامور سیکھو

  اٹھو تہذیب سیکھو ، صنعتیں سیکھو ، ہنر سیکھو

                                   چناں چہ سرسید احمد خان کی کوشش سے مسلمانوں کے نظریے اور رویوں میں انگریزی تعلیم کے حوالے سے کچھ نہ کچھ  بہتری آئی ۔یہی وجہ ہے کہ اکثر مسلمانوں کی ممانیت کے باوجود اس زمانے میں دہلی کے دو نوجوانوں پروفیسر مشتاق احمد زاہدی اور پروفیسر مرزا محمد سعید نے اعلیٰ تعلیم حاصل کرکے علم و ادب کے مراکز میں کافی شہرت حاصل کی اور ان کو علمی میدان میں قدر کی نگاہ سے دیکھا جانے لگا اور انھیں یہ شہرت اور عزت کٹھن دور میں علم کے حصول کی بدولت ملی تھی۔ اس لیے کسی شاعر نے خوب کہا:

                تعلیم وہ خوب ہے جو سکھائے ہنر

              اچھی ہے وہ تربیت جو روحانی ہے

پیراگراف 4 تشریح دہم سبق مرزا محمد سعید

 

       سبق: مرزا محمد سعید

     پیراگراف نمبر4

       اقتباس:

    مرزا صاحب دلی کے شرفا کے۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ان کی قرابت داری ہوگئی تھی۔

      حوالہ متن:

     سبق کا عنوان: مرزا محمد سعید

     مصنف کا نام: شاہد احمد دہلوی

    صنف: خاکہ نگاری

    ماخذ: گنجینۂ گوہر

        خط کشیدہ الفاظ کے معانی: 

   شرفا۔۔۔۔۔۔۔۔۔شریف کی جمع، معزز لوگ۔شریف لوگ۔

    متمول۔۔۔۔۔۔۔۔۔۔ مال دار، دولت مند

       چشم و چراغ۔۔۔۔۔۔۔ پیارا بیٹا، آنکھوں کا تارا۔

    تراہا۔۔۔۔۔۔۔ وہ مقام جہاں سے تین راستے نکلتے ہیں۔

    سیدھا ہاتھ۔۔۔۔۔ دایاں ہاتھ۔

      نکڑ۔۔۔۔۔۔ کونا، گوشہ۔

      آبائی۔۔۔۔۔۔۔ باپ دادا کی۔

      قدیم۔۔۔۔۔۔ پرانا

       عزیزداری۔۔۔۔۔۔۔۔ تعلق داری، دوستی۔

      قرابت داری۔۔۔۔۔۔ تعلق داری، دوستی۔

            سیاق و سباق :

                                   تشریح طلب اقتباس درسی سبق " مرزا محمد سعید" کے درمیان سے اخذ کیا گیا ہے۔ مصنف ، مرزا صاحب کے علمی کارناموں کو اجاگر کرتے ہیں کہ وہ اپنے لیے کام کرتے تھے اس وجہ سے انھوں نے لاہور کے پبلشر کی آفر ٹھکرا دی اور اس کےلیے لکھنے سے انکار کر دیا۔ ان کے ادبی کارناموں میں ان کی کتاب" مذہب اور باطنیت" کا بہت بڑا مقام ہے۔ انھوں نے پچاس ساٹھ برس پہلے اعلیٰ تعلیم حاصل کی جب انگریزی تعلیمی کا حصول معیوب سمجھا جاتا تھا اور علامہ اقبالؒ کا شمار ان کے استادوں میں ہوتا تھا۔

              تشریح: 

                                  شاہد احمد دہلوی اردو ادب کے نامور مصنف تھے۔ وہ زبان و بیان پر مکمل عبور رکھتے تھے۔وہ موسیقار کے ساتھ ساتھ خاکہ نگار بھی تھے۔ مرزا محمد سعید کا شمار ان کے اساتذہ میں ہوتا ہے۔ اپنے استاد محترم کی زندگی کا خاکہ انھوں نے درسی سبق " مرزا محمد سعید" میں بیان کیا جو کہ ان کی کتاب  گنجینۂ گوہر سے اخذ کیا گیا ہے۔اس سبق میں وہ مرزا محمد سعید کی شخصیت اور ان کے علمی مرتبے کو نہایت عمدگی سے بیان کرتے ہیں۔

                             تشریح طلب اقتباس میں مصنف شاہداحمد دہلوی اپنے استاد محترم پروفیسر مرزا محمد سعید کے علمی کارناموں کو بیان کرنے کے بعد ان کے خاندان اور عزیز دوستوں کے متعلق بیان کرتے ہیں کہ مرزا صاحب ہندوستان کے مرکزی شہر دہلی میں رہنے والے ایک شریف اور مال دار گھرانے سے تعلق رکھتے تھے اور اپنے گھر والوں کےلیے ہر دل عزیز اور ان کی آنکھوں کا تارا تھے۔ جیسا کہ قول ہے:

" نیک اولاد آنکھوں کی ٹھنڈک ہوتی ہے۔"

                   دہلی میں ایک مقام جہاں سے تین راستے نکلتے تھے " تراہا بیرم خان" کے نام سے مشہور تھا۔ ان تینوں راستوں میں سے ایک راستہ دائیں طرف مڑ جاتا تھا اور اس راستے کے کونے میں ہی مرزا صاحب کا مکان تھا اور یہ مکان انھیں وراثت میں ملا تھا کیونکہ ان کے باپ دادا بھی اسی مکان میں رہتے تھے۔ سرسیداحمد خان بھی اسی علاقے میں ہی رہتے تھے اور ان کا بھی اس علاقے میں اپنا مکان تھا جوکہ کافی پرانا ہو چکا تھا۔اسی قربت کی وجہ سے مرزا صاحب کی سرسید احمد خان سے گہری وابستگی اور دوستی ہوگئی تھی۔

                               نامور مؤرخ، مترجم اور معلم منشی ذکاءاللہ بھی دہلی ہی کے رہنے والے تھے۔سرسید احمد خان کے ان سے دیرینہ تعلقات اور ان سے گہری دوستی تھی۔ حضرت علیؓ کا قول ہے:

" دوست کا دوست بھی آپ کا دوست ہوتا ہے۔"

چونکہ مرزا صاحب کی سرسید احمد خان سے گہری وابستگی تھی اور منشی ذکاءاللہ سرسید احمد خان کے گہرے دوست تھے اس وجہ سے مرزا صاحب کی بھی منشی ذکاءاللہ سے تعلق داری اور دوستی قائم ہوگئی تھی۔ بقول شاعر:

      ؎       رونقیں تھیں جہاں میں کیا کیا کچھ

                 لوگ  تھے  رفتگاں  میں کیا کیا کچھ

                             

                             

پیراگراف نمبر3 تشریح دہم سبق مرزا محمد سعید

 

              سبق:مرزا محمد سعید

                      پیراگراف نمبر3

                                                            اقتباس:

                                            عالِم کی موت عالَم کی موت ہوتی ہے۔۔۔۔۔۔۔۔۔۔۔۔۔۔۔۔۔صلے کی پروا سے بےنیاز ہوکر۔

                                                         حوالہ متن:

                                                               سبق کا عنوان:                                  مرزا محمد سعید

                                                               مصنف کا نام:                                  شاہد احمد دہلوی

                                                                      صنف:                                     خاکہ نگاری

                                                                        ماخذ:                                    گنجینۂ گوہر

                                                  خط کشیدہ الفاظ کے معانی:

                                                                         عالِم ۔۔۔۔۔۔۔۔۔۔۔۔۔۔۔۔۔۔علم رکھنے والا۔

                                                                        عالَم ۔۔۔۔۔۔۔۔۔۔۔۔۔۔۔۔۔۔ جہان۔

                                                               رخصت ہونا ۔۔۔۔۔۔۔۔۔۔۔۔۔۔۔۔۔۔۔ فوت ہو جانا، دنیا سے چلے جانا۔

                                                              عدم موجودگی ۔۔۔۔۔۔۔۔۔۔۔۔۔۔۔۔۔۔۔ غیرموجودگی

                                                                        گھاؤ ۔۔۔۔۔۔۔۔۔۔۔۔۔۔۔۔۔۔۔۔۔   زخم

                                                                      واقف ۔۔۔۔۔۔۔۔۔۔۔۔۔۔۔۔۔۔۔۔۔  جاننے والے، پہچاننے والے۔

                                                                    شہرت ۔۔۔۔۔۔۔۔۔۔۔۔۔۔۔۔۔۔۔۔۔ مشہوری، ناموری۔

                                                                    ستائش ۔۔۔۔۔۔۔۔۔۔۔۔۔۔۔۔۔۔۔۔۔   تعریف۔

                                                                      تمنا   ۔۔۔۔۔۔۔۔۔۔۔۔۔۔۔۔۔۔۔۔۔۔ آرزو، خواہش۔

                                                                      صلہ ۔۔۔۔۔۔۔۔۔۔۔۔۔۔۔۔۔۔۔۔۔   بدلہ، عوض

                                                                      پروا ۔۔۔۔۔۔۔۔۔۔۔۔۔۔۔۔۔۔۔۔۔۔   فکرمندی۔

                                                                    بےنیاز ۔۔۔۔۔۔۔۔۔۔۔۔۔۔۔۔۔۔۔۔۔ بےفکر۔

                              سیاق و سباق:

                                                                    تشریح طلب اقتباس درسی سبق " مرزا محمد سعید کے ابتدائی حصے سے لیا گیا ہے۔ مصنف مرزا محمد سعید کے متعلق بتاتے ہیں کہ ان کی وفات کی خبر اخبارات کے ذریعے ملی اور ان کی وفات کا ان کے قدر دانوں تک کو کچھ معلوم نہ ہوا۔ مرزا صاحب جیسی شخصیت سے غفلت برتنے کی سزا ہمیں یہ ملی کہ اللہ تعالیٰ نے ایکا ایکی ان کو ہم سے چھین لیا۔ مرزا صاحب کبھی فرمائشی کام نہیں کرتے تھے بلکہ وہ اپنی تسکین کےلیے لکھتے اور اس وقت لکھتے جب ان کا جی چاہتا۔کسی کو خوش کرنے کےلیے ہرگز نہیں لکھتے تھے۔

                                    تشریح:

                                                                       شاہد احمد دہلوی اردو ادب کے نامور مصنف تھے۔ وہ زبان و بیان پر مکمل عبور رکھتے تھے۔وہ موسیقار کے ساتھ ساتھ خاکہ نگار بھی تھے۔ مرزا محمد سعید کا شمار ان کے اساتذہ میں ہوتا ہے۔ اپنے استاد محترم کی زندگی کا خاکہ انھوں نے درسی سبق " مرزا محمد سعید" میں بیان کیا جو کہ گنجینۂ گوہر سے اخذ کیا گیا ہے۔اس سبق میں وہ مرزا محمد سعید کی شخصیت اور ان کے علمی مرتبے کو نہایت عمدگی سے بیان کرتے ہیں۔

                             تشریح طلب اقتباس میں مصنف، مرزا محمد سعید کی وفات اور ایک صاحبِ علم شخصیت کے دنیا سے رخصت ہو جانے سے ہونے والے نقصان کے متعلق آگاہ کرتے ہیں کہ ایک عالم جب اس دنیا سے چلا جاتا ہے تو علم و عمل کا ایک پورا جہان بھی اس کے ہمراہ رخصت ہو جاتا ہے اور ان کے پیچھے دنیا میں ایک خلا رہ جاتا ہے جس کو کسی صورت پُر نہیں کیا جاسکتا۔

 جیسا کہ حدیث مبارکہ ہے:

" ایک عالم کی موت ایک مصیبت ہے جس کی تلافی ممکن نہیں، ایسا نقصان ہے جو پورا نہیں ہوسکتا اور ایک ایسا ستارہ ہے جو موت کی وجہ سے بے نور ہوجاتا ہے۔"

                           مرزا محمد سعید جیسی صاحبِ علم شخصیت کے اس دنیا سے چلے جانے سے جو نقصان  علمی دنیا کو ہوا اسے کبھی پورا نہیں کیا جاسکتا کیونکہ صرف وہ خود اس دنیا سے رخصت نہیں ہوئے بلکہ علم کا بڑا سمندر بھی اپنے ساتھ لے گئے۔ ان کے دنیا سے چلے جانے کے بعد ان کی یادیں ہی باقی رہ گئی ہیں۔ ان کی یادیں اور ان کے بچھڑنے کا رنج و غم ہمیں بےچین کرتے رہیں گے اور ہم ان کو بھولے سے بھی نہ بھول پائیں گے۔ بقول اقبالؒ

                                                                        ؎      آئے عشاق    ،  گئے وعدۂ فردا  لے کر

                                                                            اب انھیں ڈھونڈ چراغِ رخِ زیبا لے کر

                               مصنف، مرزا صاحب کے خصائل بیان کرتے ہوئے مزید کہتے ہیں کہ وہ خاموش طبع انسان تھے اور دنیاوی رنگینیوں میں پڑے بغیر خاموشی سے الگ تھلگ ہوکر اپنے کام سے کام رکھتے تھے۔ ان کی زندگی اس قدر خاموش تھی کہ ان کے ہم عصر لوگ بھی ان کے ان کارموں کے متعلق کچھ نہیں جانتے تھے جو انھوں نے علم و ادب کے میدان میں سر انجام دیے تھے۔ اس کی وجہ یہ تھی کہ مرزا صاحب اپنا کام کسی بھی شہرت اور نمود و نمائش کےلیے نہیں کرتے تھے بلکہ وہ شہرت اور نمود کےنام سے ہی پریشان ہوجاتے تھے۔یہی وجہ ہے کہ وہ عوامی مقامات اور عوامی اجتماعات میں شریک ہونے سے گریز کرتے تھے۔ وہ اپنا علمی و ادبی کام ناموری، دولت، شہرت اور اپنی تعریف کے حصول کےلیے کرنے کی بجائے اپنے شوق،  دلی سکون اور اپنی راحت کےلیے کرتے تھے اور ان کا یہ کام ہمیشہ بے لوث ہوتا تھا۔ بقول  شاعر:

                                                                            ؎      حرصِ دولت کی نہ عِز و جاہ کی

                                                                                   بس    تمنا    ہے     دلِ   آگاہ   کی

                                                                                                 یا  

                                        بقول غالبؔ :

                                                                     ؎      نہ    ستائش    کی    تمنا    نہ    صلے   کی    پروا

                                                                          گر نہیں ہیں میرے اشعار میں معنی نہ سہی

پیراگراف نمبر 2 تشریح دہم سبق مرزا محمد سعید

 

سبق : مرزا محمد سعید

پیراگراف نمبر2

اقتباس:

افسوس! اتنا بڑا صاحبِ کمال۔۔۔۔۔۔۔۔۔۔۔۔۔۔۔۔ ایکاایکی ہم سے چھین لیا گیا۔

حوالہ متن:

سبق کا عنوان: مرزا محمد سعید

مصنف کانام:  شاہد احمد دہلوی

    صنف:             خاکہ نگاری

   ماخذ:             گنجینۂ گوہر

خط کشیدہ الفاظ کے معانی:

افسوس۔۔۔۔۔۔۔۔ دکھ ، رنج۔

صاحبِ کمال۔۔۔۔۔۔۔۔۔ماہر، کمال رکھنے والا

سناؤنی۔۔۔۔۔۔۔۔۔ موت کی خبر۔

بےخبر۔۔۔۔۔۔۔۔ غافل ، لاعلم۔

شعار۔۔۔۔۔۔۔۔ طور طریقہ، سلیقہ۔

اہلِ کمال۔۔۔۔۔۔۔ مہارت رکھنے والا

غافل۔۔۔۔۔۔۔ لاعلم، بےخبر۔

غفلت۔۔۔۔۔۔ لاپروائی، لاعلمی۔

مجرمانہ۔۔۔۔۔۔۔ جرم کا سبب بننے والی۔

ایکاایکی۔۔۔۔۔۔۔ اچانک۔

چھین لینا۔۔۔۔۔۔۔ ہتھیا لینا۔

سیاق و سباق:

               تشریح طلب اقتباس درسی سبق " مرزا محمد سعید کے ابتدائی حصے سے اخذ کیا گیا ہے۔ مصنف کہتا ہے کہ مرزا محمد سعید کی وفات کے متعلق ان کے دوستوں اور قدردانوں کو خبر تک نہ ہوئی بلکہ تیسرے دن اخبار کے ذریعے ان کی وفات کا معلوم ہوا۔مرزا صاحب جیسے عالِم کی موت عالَم کی موت ہوتی ہے اور ان کے اس دنیا سے رخصت ہو جانے سے ہمارا اتنا بڑا نقصان ہوا جس کا اندازہ ہی نہیں لگایا جاسکتا۔

تشریح:

            شاہد احمد دہلوی اردو ادب کے نامور مصنف تھے۔ وہ زبان و بیان پر مکمل عبور رکھتے تھے۔وہ موسیقار کے ساتھ ساتھ خاکہ نگار بھی تھے۔ مرزا محمد سعید کا شمار ان کے اساتذہ میں ہوتا ہے۔ اپنے استاد محترم کی زندگی کا خاکہ انھوں نے درسی سبق " مرزا محمد سعید" میں بیان کیا جو کہ گنجینۂ گوہر سے اخذ کیا گیا ہے۔اس سبق میں وہ مرزا محمد سعید کی شخصیت اور ان کے علمی مرتبے کو نہایت عمدگی سے بیان کرتے ہیں

                            تشریح طلب اقتباس میں مصنف، مرزا محمد سعید کی وفات پر اظہار افسوس کرتے ہوئے لکھتا ہے کہ ان کی وفات سے  ہمیں دکھ اور کرب تو ملا ہی ہے  مگر بےحد افسوس کی بات یہ ہے کہ مرزا صاحب جیسی علم و عمل پر یقینی رکھنے والی باکمال شخصیت ہم سے جدا ہوگئی لیکن ان کی وفات کی خبر نہ تو ہمیں ملی اور نہ ہی ان کے دوست احباب اور عقیدت مندوں تک اس کی اطلاع پہنچی۔ بقول شاعر:

           زندگی جن کے تصور سے جلا پاتی تھی

           ہائے کیا لوگ تھے جو دامِ اجل میں آئے

                  

                  مرزا محمد سعید اعلیٰ صلاحیتوں کے مالک انسان تھے مگر بہت قابلِ افسوس بات یہ ہے کہ مرزا صاحب جیسی عظیم المرتبہ اور صاحبِ علم شخصیت ہم سے جدا ہوگئی مگر ہم اپنی لاپروائی کی وجہ سے  اس بات سے مکمل بےخبر رہے۔ زندہ اور ہمیشہ امر رہنے والی قومیں کسی طور پر بھی اہلِ علم اور صاحبِ کمال شخصیت سے غافل اور بےخبر نہیں رہتیں بلکہ وہ ہمیشہ ایسی شخصیت سے جڑی رہتی ہیں اور ان کی قدر کرتی ہیں جبکہ جو لوگ اپنے باکمال اور علمی شخصیات کے ساتھ لاپروائی اور عدم توجہ برتتے ہیں ان کا یہ کام قدرت کے نزدیک بہت بڑا جرم ہوتا ہے اور قدرت اس جرم کی سزا غافل معاشرے کو یوں دیتی ہے کہ معاشرے سے اہل علم کو اٹھا لیتی ہے اور دنیا والے ان کے فیوض و برکات سے محروم ہوجاتے ہیں۔ جیسا کہ حدیث مبارکہ ہے:

"  عالم کی وفات کے ساتھ علم بھی اٹھا لیا جاتا ہے۔"

                 مصنف کہتا ہے کہ مرزا محمد سعید جیسی علمی شخصیت سے لاپروائی اور عدم توجہی برت کر ہم نے بھی یہی بڑی سزا پائی کہ اللہ تعالیٰ نے مرزا صاحب کو اچانک ہم سے جدا کرکے اپنے پاس بلا لیا۔ بقول اقبال

      آئے  عشاق ، گئے  وعدۂ فردا   لے کر

      اب انھیں ڈھونڈ چراغِ رخِ زیبا لے کر

پیراگراف نمبر1تشریح, دہم سبق مرزا محمد سعید

  

سبق نمبر1 

مرزا محمد سعید 

پیراگراف نمبر1:

اقتباس:

صبح اخباروں میں یہ خبر۔۔۔۔۔۔۔۔۔۔۔۔۔۔۔۔۔۔۔۔۔۔سانحۂ ارتحال کی خبرتک نہ ہوئی۔

حوالہ متن:

سبق کا عنوان: مرزا محمد سعید

مصنف کا نام: شاہد احمد دہلوی

صنف: خاکہ نگاری

ماخذ: گنجینۂ گوہر

خط کشیدہ الفاظ کے معانی:

دل دھک رہ جانا۔۔۔۔۔۔۔۔۔۔۔۔۔۔۔حیران و پریشان ہوجانا، مضطرب ہوجانا۔

سوئم۔۔۔۔۔۔۔۔۔وفات کا تیسرا دن۔

علالتِ مزاج۔۔۔۔۔۔۔۔۔۔ بیمار طبیعت۔

مرض الموت۔۔۔۔۔۔۔۔۔۔۔موت کا سبب بننے والی بیماری۔

اطلاع۔۔۔۔۔۔۔۔۔۔ خبر، آگاہی۔

پرسوں۔۔۔۔۔۔۔۔گزشتہ کل سے پہلے کا دن۔

رحلت۔۔۔۔ وفات، موت۔

سیکڑوں۔۔۔۔۔۔ سو سے زائد۔

قدردان۔۔۔۔۔۔۔ چاہنے والے۔

سانحہ۔۔۔۔۔۔۔۔ حادثہ، واقعہ

ارتحال۔۔۔۔۔۔ رحلت، وفات

سانحۂ ارتحال۔۔۔۔۔ وفات کا حادثہ یا واقعہ۔

خبر۔۔۔۔۔۔۔۔۔ اطلاع۔

سیاق و سباق:

       تشریح طلب اقتباس درسی سبق " مرزا محمد سعید" کا ابتدائی پیراگراف ہے۔ مصنف شاہد احمد دہلوی، مرزا محمد سعید کے بارے میں بتاتے ہیں کہ ہم ان کی وفات سے بےخبر رہے اور ہماری مرزا صاحب سے غفلت برتنے کا ہی نتیجہ ہے کہ اللہ تعالیٰ نے ان کو ایکا ایکی ہم سے چھین لیا۔ان کی موت عالَم کی موت ہے۔ان کے اس دنیا سے رخصت ہو جانے سے جو نقصان ہوا اس کا اندازہ ہی نہیں لگایا جاسکتا۔

تشریح:

                    شاہد احمد دہلوی اردو ادب کے نامور مصنف تھے۔ وہ زبان و بیان پر مکمل عبور رکھتے تھے۔وہ موسیقار کے ساتھ ساتھ خاکہ نگار بھی تھے۔ مرزا محمد سعید کا شمار ان کے استادوں میں ہوتا ہے۔ اپنے استاد محترم کی زندگی کا خاکہ انھوں نے درسی سبق " مرزا محمد سعید" میں بیان کیا جو کہ گنجینۂ گوہر سے اخذ کیا گیا ہے۔اس سبق میں وہ مرزا محمد سعید کی شخصیت اور ان کے علمی مرتبے کو نہایت عمدگی سے بیان کرتے ہیں

                                     تشریح طلب اقتباس میں مصنف نامور عالم اور صاحبِ کمال شخصیت مرزا محمد سعید کی وفات کے حوالے سے بیان کرتا ہے کہ صبح سویرے جب اخبارات میں یہ خبر پڑھی کہ پروفیسر مرزا محمد سعید وفات پا گئے ہیں اور آج ان کی وفات کو تیسرا دن ہو چکا ہے تو دل کو بہت دکھ اور رنج ہوا کیونکہ ایسی عظیم اور صاحبِ علم شخصیت کی جدائی بہت بڑے صدمے سے کم نہیں ہوتی مگر موت جیسی حقیقت سے کبھی انکار نہیں کیا جاسکتا۔ قرآن مجید میں ارشاد ہے

"  ہر ذی روح نے موت کا ذائقہ چکھنا ہے.

 بقول شاعر:

   ؎   موت سے کس کو رستگاری ہے

 آج  وہ ، کل  ہماری  باری   ہے

                        مرزا محمد سعید بےحد سنجیدہ، کم گو بلکہ خاموش طبع انسان تھے اس لیے انھوں نے اپنی زندگی انتہائی سادگی اور دنیا کی رنگینی سے الگ تھلگ ہو کر گزاری یہاں تک کہ داعی اجل کو لبیک کہ گئے۔مصنف کہتا ہے کہ ان کی وفات کا صدمہ اس لحاظ سے بھی بہت زیادہ ہے کہ دو دن پہلے ان کا انتقال ہوگیا مگر ہمیں اور ان کے دوست احباب کو نہ تو ان کی طبیعت کی خرابی کی کہیں سے اطلاع ملی اور نہ ہی ان کی اس بیماری کے بارے میں کچھ آگاہی ملی جس سے ان کی وفات ہوئی۔ان کی وفات کا جس قدر بھی غم کیا جائے وہ کم ہے۔  بقول شاعر:

؎   زندگی جن کے تصور سے جلا پاتی تھی

   ہائے کیا لوگ تھے جو دامِ اجل میں آئے

                                    یا

 ؎    فضائے شہر اس قدر ہے سوگوار کس لیے

    ہر اک دکھائی دے رہا ہے اشک بار کس لیے

جماعت نہم اور انٹر کی پروموشن کے حوالے سے طلبا کے ذہن میں اٹھنے والے سوالات کے جوابات

*طلباء کے تمام سوالات کے جوابا، امید ہے کہ سب کی کنفیوژن دور ہو جاۓ گی*

سوال 1: کون سے طلباء کو اگلی کلاس میں پروموٹ کیا گیا ہے؟

1- وہ طلباء جنہوں نے اس سال نہم یا گیارہویں کا امتحان دینا تھا۔

2- وہ طلباء جنہوں نے پچھلے سال نہم یا گیارہویں کا امتحان دیا تھا مگر مارکس کم ہونے کی وجہ سے اس سال دوبارہ نہم یا گیارہویں کا داخلہ بھیجا تھا۔

ان طلباء کو اگلی کلاس میں کیسے پروموٹ کیا گیا ہے ؟

ایسے طلباء اگلے سال دہم یا بارہویں کا امتحان دیں گے اس بنا پر ان کو نہم اور گیارہویں میں مارکس دے دیے جائیں گے۔

نوٹ: ان طلباء کے چونکہ پیپر نہیں ہوۓ لہذا ان سے اگلے سال داخلہ فیس نہیں لی جاۓ گی۔

سوال نمبر 2: جن طلباء کے اس سال دہم کے امتحان ہو چکے ان کا کیا فیصلہ ہوا ہے؟

15 جون سے طلباء کے پیپرز کی مارکنگ ہو گی اور  ستمبر میں باقاعدہ طور پر رزلٹ دیا جاۓ گا۔

ایسے طلباء کا سبجیکٹ وائز رزلٹ بھی مینشن ہو گا۔

سوال:پریکٹیکل امتحان کا کیا ہو گا؟

پریکٹیکل امتحان نہیں لیا جاۓ گا۔کلاس نہم اور دہم میں متعلقہ مضمون میں مارکس کی بنیاد پر اس فارمولے سے مضامین کے پریکٹیکل کے مارکس کیلکولیٹ کیے جائیں گے

(50% marks of Practical)+ [(Obtained marks in that subject/total marks in subject) x 50 % marks of practical]

مثال کے طور پر فزکس کے پریکٹیکل امتحان کے 30 نمبر ہوتے ہیں تو ان کا 50% 15 نمبر بنتے ہیں۔تھیوری کے کل مارکس میٹرک فزکس کے 120 ہوتے ہیں اگر ایک طالب علم بورڈ میں اس مضمون میں  120 میں سے 100 نمبر لیتا ہے تو اس کے پریکٹیکل مارکس یہ ہوں گے۔

(15) + [(100/120) x 15]

15 + 12.5 = 27.5 =27 or 28

یعنی فزکس میں بچے کو 27 یا 28 نمبر پریکٹیکل میں دیے جائیں گے۔

باقی مضامین کے پریکٹیکل مارکس اسی طرح کیلکولیٹ ہوں گے۔

سوال 3: میٹرک سپلی والوں کا کیا ہو گا؟

ایسے طلباء جن کی ایک تا 3 سپلیاں ہیں وہ پاس کر دیے جائیں گے۔ ان کو پاس کرنے کا میتھڈ یہ ہے:

اگر نہم میں سپلی ہے تو نہم میں باقی مضامین کے مارکس کو جمع کریں اور مضامین کی تعداد پر تقسیم کریں تو ایوریج مارکس آئیں گے۔

فارمولا یہ ہو گا:

(Sum of marks in subjects other than supply subjects/Total number of passed subjects)

اس طرح جو ایوریج نمبر ہوں گے وہ فیل مضامین میں لگ جائیں گے اور پاس کر دیا جاۓ گا۔

اگر کوئی بچہ صرف دہم میں سپلی والا تھا تو اس کےلیے یہی فارمولا ہو گا۔

اگر کسی کی نہم دہم دونوں میں سپلیاں تھیں تو بھی یہی فارمولا لگایا جاۓ گا۔

جن طلباء کا پاس ہونے کا آخری چانس تھا ان کو اسی فارمولے کے تحت مارکس دے کر پاس کیا گیا ہے۔

سوال 4: انٹر پارٹ 2 کے طلباء جنہوں نے اس سال پہلی بار پیپر دینا تھے ان کا کیا ہو گا؟

 ان طلباء کو تین فیصد اضافی نمبر دے کر پاس کیا گیا ہے۔

ایسے طلباء کو سبجیکٹ وائز رزلٹ نہیں دیا جاۓ گا رزلٹ کارڈ پر صرف کل مارکس کا آپشن ہو گا( تاہم رزلٹ کارڈ کا حتمی فیصلہ ہونا ابھی باقی ہے ہو سکتا ہے سبجیکٹ وائز مارکس کےلیے کوئی انتظام ہو جاۓ تاہم ابھی تک کا فیصلہ یہی ہے کہ کل حاصل کردہ مارکس کا 3% اضافی دینا ہے تو ہر مضمون کے انفرادی مارکس رزلٹ کارڈ پر نہیں ہوں گے)

فارمولا یہ ہو گا

(2 x obtained marks in P-1) + (Obtained marks in P-1 x 0.03)

واضح رہے حتمی فارمولا بورڈ خود جاری کر دے گا

سوال:پریکٹیکلز کا کیا ہو گا؟

پریکٹیکلز نہیں ہوں گے اور پارٹ 1 تھیوری مضامین کی بنیاد پر پریکٹیکل میں مارکس دیے جائیں گے تاہم ہر پریکٹیکل مضمون کے 50% نمبر سب کو ملیں گے باقی 50% تھیوری بیسڈ کیلکولیٹ ہوں گے اور پارٹ 1 کے تھیوری مارکس کو بنیاد بنایا جاۓ گا۔

یہ 50% نمبر فزکس بائیو کیمسٹری میں 15 جبکہ کمپیوٹر میں 25 بنتے ہیں۔

مثال کے طور پر فزکس میں پریکٹیکل کے کل 30 نمبر ہوتے ہیں اور تھیوری پارٹ 1 میں کل 85 مارکس ہوتے ہیں اگر ایک بچے کے تھیوری میں 85 میں سے 75 نمبر ہیں تو اس کے پریکٹیکل میں مارکس یوں لگیں گے:

(50% marks of practical) + [(obtained marks in subject/total marks in that subject) x 50% marks of practical in that subject)

(15)+ [(75/85) x 15]

15+13.23=28.23 =28 marks

یعنی فزکس پریکٹیکل 30 میں سے 28 نمبر ہوں گے۔

باقی مضامین کے مارکس اسی فارمولے سے نکالے جا سکتے ہیں۔

سوال 5: جو بچے امپروومنٹ والے ہیں ان کا کیا ہو گا؟

امپرومنٹ کیٹیگری 1: ایسے بچے جو صرف پارٹ 2 امپروو کر رہے تھے ۔ان کو پارٹ 1 کے مساوی نمبر پارٹ ٹومیں ملیں گے۔پریکٹیکل کے سابقہ مارکس و ہی رہیں گے وہ تبدیل نہیں ہوں گے۔

obtained marks= (2 x marks in P-1) + (previous year marks in practicals)

مثال کے طور پر کسی بچے کےپارٹ1 مارکس 400 تھے اور اس کے پریکٹیکل میں مارکس 60 تھے تو اس کے مارکس یہ ہوں گے:

(400x2 )+60= 860 marks

امپرومنٹ کیٹگری 2: ایسے بچے جو پارٹ 1 امپروو کر رہے تھے ۔ ایسے بچوں کو پارٹ 2 کے مساوی نمبر ملیں گے جبکہ پریکٹیکل مارکس وہی رہیں گےجو پہلے تھے 

obtained marks= (2x marks in P-2) + (previous marks in Practicals)

امپروومنٹ کیٹیگری 3: ایسے بچے جو کچھ مضامین repeat کر رہے تھے ۔ ایسے بچوں کے متعلقہ سبجیکٹ میں دونوں سال کے مارکس کو دیکھا جاۓ گا اور جس سال میں زیادہ نمبر ہوں گے ان کو 2 سے ضرب دے کر اس سبجیکٹ کے کل مارکس بن جائیں گے۔جبکہ پریکٹیکل مارکس وہی رہیں گے جو پہلے تھے۔

فرض کریں ایک بچے نے فزکس کو امپروو کیا اور اس کے پارٹ 1 مارکس 40 جبکہ پارٹ 2 مارکس 75 تھے تو ایسے بچے کو پارٹ 1 میں بھی 75 نمبر دے دیے جائیں گے یعنی فزکس میں بچے کے مارکس جو پہلے 115 بن رہے تھے اب بڑھ کر 150 ہو جائیں گے۔

نوٹ : اسلامیات اور مطالعہ پاکستان کو پیرالل رکھا جاۓ گا۔یعنی اگر کسی نے مطالعہ امپروو کی تو اس کو اسلامیات کی بنیاد پر مارکس ملیں گے۔

امپروومنٹ کیٹیگری 4: ایسے بچے جو پارٹ 1 اور 2 مکمل repeat کر رہے تھے۔ایسے طلباء کا کلیئر فیصلہ سامنے نہیں آیا تاہم غالب امکان ہے ان کو کیٹیگری 3 میں رکھا جاۓ گا۔بصورت دیگر ایسے بچے کمپوزٹ امتحان کا حصہ بنیں گے جو اگست میں لیا جاۓگا۔

ہر طالب علم کا انفرادی اسٹیٹس بورڈ ویب سائٹ پر بہت جلد جاری کر دیا جاۓ گا۔جس سے طلباء کی کنفیوژن ختم ہو جاۓگی.

سوال 6: انٹر سپلی والوں کا کیا ہو گا؟

ایسے طلباء جن کی ایک تا 2 سپلیاں ہیں وہ پاس کر دیے جائیں گے۔ ان کو پاس کرنے کا میتھڈ یہ ہے:

اگر 11 میں سپلی ہے تو 11 میں باقی مضامین کے مارکس کو جمع کریں اور مضامین کی تعداد پر تقسیم کریں تو ایوریج مارکس آئیں گے۔

فارمولا یہ ہو گا:

(Sum of marks in subjects other than supply subjects/Total number of passed subjects)

اس طرح جو ایوریج نمبر ہوں گے وہ فیل مضامین میں لگ جائیں گے اور پاس کر دیا جاۓ گا۔

اگر کوئی بچہ صرف 12 میں سپلی والا تھا تو اس کےلیے یہی فارمولا ہو گا۔

اگر کسی کی 11اور 12  دونوں میں سپلیاں تھیں تو بھی یہی فارمولا لگایا جاۓ گا۔

جن طلباء کا پاس ہونے کا آخری چانس تھا ان کو اسی فارمولے کے تحت مارکس دے کر پاس کیا گیا ہے.

سوال نمبر 7: کن بچوں کے اسپیشل امتحان ہوں گے:

ایسے بچے جن کا کمبائن امتحان تھا یا جو ایڈیشنل مضامین کے پیپر دے رہے تھے مثال کے طور پر وہ بچے جو ایف اے کمبائن کر رہے تھے۔وہ بچے جنہوں نے پہلے انٹر میں بائیو پڑھی اب ایڈیشنل math کا پرچہ دینا چاہتے تھے ان کا امتحان اگست میں ہو گا ان بچوں کو دوبارہ داخلہ نہیں بھیجنا پڑے گا۔

سوال 8: جن بچوں کو اس پالیسی پر اعتراض ہے وہ کیا کریں:

ایسے بچے 15 جولائی تک بورڈ کو اطلاع دیں گے۔اس کا طریقہ کار بورڈ جلد جاری کر دے گا۔ایسے بچے اس سال امتحان نہیں دے سکیں گے ان کا امتحان اگلے سال یعنی 2021 میں لیا جاۓ گا۔

آزادی ایک انمول نعمت ہے۔

                     آزادی ایک انمول نعمت ہے ۔

ہوا اور پانی قدرت کا انمول تحفہ ہیں۔ان کےبغیر گویا زندگی کا وجود ہی ناممکن ہے۔ اپنی زندگی کی آخری سانسیں لینے والا شخص ہی ہوا اور پانی کی قدروقیمت کا زیادہ قریب سے قدردان ہوتا ہے۔وہ گہری سانسیں اور ہچکیاں لیتے وقت ہوا ہی کو اپنے اندر داخل اور باہر خارج کر رہا ہوتا ہے۔اس دوران اگر اس کے منھ پر ہاتھ رکھ کر یہ ہوا اس کے جسم میں داخل نہ ہونے دی جاٸے تو وہ گنتی کی چند سانسیں بھی پوری نہ کرسکے گا اور موقع پر دم توڑ دےگا۔اسی طرح پانی کی قدروقیمت کا اس شخص سےبڑھ کر کس کو پتا ہوگا جو تشنہ لب ہو مگر پانی کا ایک گھونٹ اسے میسر نہ ہو جس سے وہ اپنا حلق گیلا کرسکے اور اس گھونٹ کےلیے وہ اپنی زندگی بھر کی جمع پونجی تک قربان کرنے کو تیار ہوگا۔

               آزادی بھی دنیا کی انھیں انمول نعمتوں میں سے ایک نعمت ہے۔اس کی قدروقیمت کو اگر جاننا ہے تو اس پرندے  کودیکھ کر جاننےکی کوشش کرو جو کبھی آزاد فضاٶں میں اڑتا اور خوشیوں کے گیت گاتا تھا مگرجب کسی شکاری کے جال میں پھنسا تو اپنی آزادی کھو بیٹھا اور غلامی کے قفس سے اپنی چونچ رگڑ رگڑ کر اپنی جان سے ہاتھ دھو بیٹھا یا پھر آزادی کی قدرومنزلت اس بادشاہ سے پوچھو جو آزادی کے دنوں میں خوب صورت علاقوں اور دلکش وادیوں کا حکمران تھا لیکن جب کسی کا غلام بنا تو قبر کےلیے دوگز زمین بھی میسر نہ تھی اور بےبسی اور عبرت کا ایسا نمونہ بنا کہ خود ہی کہنے پر مجبور ہوا:

کتنا  ہے  بدنصیب  ظفر ، دفن  کےلیے

دو گز زمین بھی نہ ملی کوٸےیار میں

ایسی بےیارومددگار زندگی کو اور آزادی کی قدر کوکچھ یوں بھی بیان کیاگیا ہے:

فانی  ہم  تو  جیتے  جی  وہ  میت   ہیں   بےگوروکفن

غربت جس کو راس نہ آٸی اور وطن بھی چھوٹ گیا

آزادی کی اہمیت اور قدر پوچھنی ہےتو اس سے پوچھو جوکھانے کا ایک لقمہ تک اپنی مرضی سے نہ لے سکتاہو۔ مگر ہمارے جیسی وہ نوجوان نسل آزادی کی قدرومنزلت کو کیسے جانے گی جس نے آنکھ ہی ایک آزاد اور خود مختار معاشرے میں کھولی ہے۔وہ اس آزادی کےلیے دی گٸی قربانیوں کا تصور ہی کرسکتی ہے ورنہ ہمارےآبا و اجداد نے جس قدر اذیتیں اور مشکلات جھیل کر ہمارےلیے ایک آزاد وطن حاصل کیا اس تک ہمارا گمان بھی نہیں پہنچ سکتا۔اگر آج ہم نے ان سب قربانیوں کی صحیح معنوں میں قدر کی ہوتی تو آج ہمارا ملک یوں زبوں حالی کا شکار نہ ہوتا جیسے آج ہے۔

             آزادی کی اہمیت جاننے کےلیے ضروری ہے کہ ہم پاکستان بننے سے پہلے انگریزوں اور ہندوٶں کے شکنجوں میں جکڑے ہوٸے مسلمانوں کی داستان کو پڑھیں جنھوں نے آزادی کی خاطر اپنا تن من دھن سب کچھ لٹا دیا اور بہت بھاری قیمت چکا کر اس ملک کو آزاد کرایا۔ کسی نے کیا خوب ہی کہا ہے:

لہو  میں  ڈوب  کر  پہنچے  جو  کنارے  تک

وہ جانتے ہیں کہ یہ راہ کس قدر تھی کٹھن

سلام  تم   پہ  اے   شہیدان  عرصہ  تقسیم 

کہ  جان  دے  کے  بچاٸی  ہے  آبروٸے وطن

مجھے اپنی آزادی کی تاریخ بتاتی ہے کہ آزادی کےلیے ایک قیمت ہمیں یہ بھی چکانی پڑی کہ 

دل تھام کے سنو نوجوانو کہ قیام پاکستان کے بعد ہندوٶں کے ظلم و ستم سے بچ جانے والی ایک ماں اپنے شیرخوار بچے کے ہمراہ پاکستان کی آزاد پاک سرزمین پر قدم رکھنے کےلیے بےچین تھی اور ایک طویل سفر کاٹ کر آزادی کی راہ پر گامزن تھی لیکن  اندھیری رات کی درندگی اسے بھٹکا کر ایک گاٶں کے قریب لا پھینکتی ہے اور وہ خونخوار ہندو درندوں کے غول میں بری طرح محصور ہو جاتی ہے۔درندوں کا ہجوم اسے پکڑ کر میدان میں لے آتا ہے۔ڈھول پیٹے جاتے ہیں اور سارا گاٶں تماشے کےلیے جمع ہوجاتا ہے۔وہ ان سب کے وسط میں اپنے معصوم بچے کو اپنے ساتھ سمٹاٸے بت بنی کھڑی ہے۔اس کی روح فنا ہوچکی ہے مگر ممتا کا پیار جاگ رہا ہے۔زبان گنگ ہے لیکن اس کی ملتجی آنکھیں فضاٶں میں قیامت خیز ارتعاش پیدا کر رہی ہیں۔ آزاد ملک میں دونمبری کرنا اور رشوت لے کر  ملک کےلیے قربانیوں کو آج یکسر بھلا دینا آسان ہے مگر قربانیوں کے ان مناظر کو آج تصور کے ساتھ ہی اپنے ساتھ جوڑنا  درد ناک اذیت دیتا ہے۔زمین و آسمان نے آزادی کے حصول کی خاطر سراپا مظلومیت کی ایسی تصویر بہت ہی کم دیکھی ہوگی جو اس ماں اور اس کے معصوم بچے کی بنی ہوٸی تھی۔جب شورو شعب بڑھتا ہے تو ایک درندہ صفت ہندو شخص اس بے یارومددگار ماں پر جھپٹتا ہے اور اس کے لخت جگر کو چھین کر آزادی کے حصول کی سخت سزا دینا چاہتا ہے۔ہجوم فرط مسرت سے دیوانہ ہوتا ہے، ڈھول روز روز سے بجنے لگتے ہیں اور بےبس مامتا پتھراٸی ہوٸی آنکھوں سے اپنے لخت جگر کی آزادی اور اس کی زندگی کی بھیک مانگتی ہے لیکن وہ درندہ غراتے ہوٸے بچے کو ماں کی آغوش سے کچھ فاصلے پر لے کر اس کی شہ رگ کو کاٹ دیتا ہے۔یوں ایک ماں کو آزادی کی اہک بڑی قیمت چکانی پڑتی ہے

             آزادی کی حقیقی اہمیت اور قدروقیمت وہی لوگ جانتے ہیں جنھوں نے خون کا آخری قطرہ تک قیمت میں دے کر اس کو حاصل کیاہے۔اس آزادی کے حصول کے جرم میں پندرہ لاکھ مسلمانوں کو گاجر مولی کی طرح ہندوٶں نے کاٹا۔ایک لاکھ سے زاٸد مسلمان عورتوں اور دوشیزاٶں کو اپنی عزت و آبرو کی قربانی دینا پڑی لیکن آج ہمیں اس بات کا معمولی سا بھی احساس نہیں کہ جن درندوں سے آزادی کے حصول کےلیے ہم نے بہت کچھ گنوایا آج انھیں کم ظرفوں کے آگے جھکتے چلے جا رہے ہیں اور ان کی غلامی کا طوق اپنے ہاتھوں سےاپنے  گلے میں ڈال کر ان معصوم اور بےگناہوں کی لاشوں کا سودا کرنے جا رہے ہیں جنھوں نے اپنی جانوں کو تو کٹا دیا لیکن غلامی کی زنجیریں پہننے سے انکار کردیا۔

               آج مقبوضہ جموں و کشمیر میں آزادی کے حصول کےلیے سرگرم لوگوں پر ظلم کے پہاڑ توڑے جا رہے ہیں اور ہم ان ظالموں اور درندہ صفت وحشیوں سے دوستی کی پینگیں بڑھا رہے ہیں۔ایسی قوم آزادی کی قدروقیمت کیا جانے گی جو اپنی ماٶں،بہنوں اور بیٹیوں کی عزت کے لٹیروں کے ساتھ مضبوط تعلقات قاٸم کرکے  مساٸل کے حل تلاش کرنا چاہ رہی ہے اور اپنی  بقا شروع دن سے گجرال، واچپاٸی،من موہن سنگھ اور اب نریندر مودی کو خوش کرنے میں سمجھ رہی ہے کہ ان سے اچھے تعلقات سے ہی ہم کامیاب ہوں گے اور انھوں نے ہماری امن کی خواہش کو ہماری کمزوری سمجھ کر پورے کشمیر کو جیل بنا دیا اور ہم بےبسی کے ساتھ اپنے مسلمان بہن بھاٸیوں کا تماشا دیکھتے رہے۔ کاش کہ ہم آزادی کی قدروقیمت کو جان سکتے اور اس بات کو سمجھتے کہ واچپاٸیوں، سنگھوں،سکھوں ،گجرالیوں ،مودیوں اور لارڈ بیٹنوں نے آزادی ہمیں تھالیوں اور طشتریوں میں رکھ کر پیش نہیں کی تھی بلکہ اس کے حصول کےلیے مسلمانوں نے اپنی جان اور اپنا تن من دھن سب کچھ قربان کر دیا تھا تب جاکر آزادی ہمارے ماتھے کا جھومر بنی تھی۔

                 کیا ہے آزادی ، کوٸی سمجھتا ہی نہیں،جانتا ہی نہیں،سوچتا ہی نہیں کہ شاید اس واسطے کہ یہ ہمیں مل گٸی ،اپنے آباواجداد سے اور مل گیا ہمیں ایسا چمن جو لگایا کسی نے تھااور اس کا ثمر ہم بڑے شوق سے اور قربانیوں سےبےنیاز ہوکر کھارہے ہیں مگر یہ سمجھتے ہیں اور نہ سوچتے ہیں کہ اس چمن کے گل و رنگ و بو کےلیے کتنے افراد نے اپنے دامن کی خوشیوں کے خون کیے تھے،کتنی ماٶں کے لخت جگر کٹ گٸے تھے،کتنے مدفن بنے ،تھے،کتنی عصمتیں لٹ گٸی تھیں،خون کے دریا بہے تھے ۔کتنی ماٶں کے لخت جگر کٹ گٸے تھے، آرزوٶں کے کتنے محل جلے تھے اور ان کا دھواں ہرطرف پھیل کر یاس و حسرت کی اک داستان بن گیا تھا،اک زباں بن گیا تھا اور سب اپنا سب کچھ لٹاکر ایک منزل کی طرف چلے تھے اور اک آزاد وطن کی طرف بڑھے تھے اور ایک ہم ہیں کہ کچھ جانتے ہی نہیں اور کچھ سوچتے ہی نہیں۔

                  ہمارے جیسے نوجوان آزادی کی قدروقیمت کو سمجھ ہی نہیں سکتے کیونکہ ہم نے غلامی کی زندگی کو قریب سے دیکھا ہی نہیں ۔آزادی کے تقدس  کو اگر ہم نے دیکھنا ہے تو فلسطین، کشمیر،چیچنیا،افغانستان  اور عراق جاکر دیکھو ۔ فلسطین میں جاٶ اور دیکھو کتنی عزتیں اور جانیں یہودیوں سے آزادی کی خاطر لٹ چکی ہیں اور کتنی نظریں حسرت و یاس کے ساتھ صلاح الدین ایوبی کو تلاش کر رہی ہیں۔چیچنیا میں جاٶ اور دیکھو کتنے مسلمان ہیں جو روسی جارحیت کا شکار ہیں۔ کشمیر میں مسلمانوں سے پوچھو کہ آزادی کا نعرہ انھیں کتنا مہنگا پڑ رہا ہے۔افغانی اور عراقی عوام سے جاکر پوچھو کہ آگ اورخون کا کھیل رچا کر گوروں نے کس طرح ان کی آزادی کو سلب کر رکھا ہے۔

                آج افسوس اس بات پر ہوتا ہے کہ جس مقصد کےلیے ہم نے آزادی حاصل کی تھی اسے ہم بھول چکے ہیں اور جن کی ثقافت اور تہذیب سے ہم نے چھٹکارا پایا تھا آج اسی کے دلدادہ بنے ہوٸے ہیں تو اس سے صاف ظاہر ہوتا ہےکہ ہم نے آزادی جیسی نعمت کو پہچانا ہی نہیں ہے اور اگر پہچانا ہے تو پھر ہم نے آزادی کےحصول کےلیے گرنے والے خون اور لٹنے والی عصمتوں کا سودا کیا ہوا ہے۔آج ہم آزادی حاصل کر چکنے کے باوجود بھی غلام ہیں تو ان درندوں کی تہذیب و ثقافت کے غلام ہیں جنھوں نے مسلمانوں پر عرصہ دراز تنگ کر رکھا ہے۔

                   آزادی جیسی انمول چیز کو حاصل کرنے کےلیے مسلمان فاتحین نے ان گوری چمڑی والوں سے مقابلہ کیا جن کی غلامی میں آج ہم خودبخود جھکتے چلے جا رہے ہیں۔ٹیپو سلطان نے حصول آزادی کےلیے جس طرح اپنی جان کا نذرانہ پیش کیا اس کی مثال بہت کم ملتی ہے۔اس نے آزادی کی منزلت کو پہچانا اس لیے اس کا نام شیر میسور کے نام سےتاریخ کے سنہری حروف میں لکھا ہوا ہے۔ صلاح الدین ایوبی کو آج بھی مسجد اقصی پکار رہی ہے اور ہماری بےبسی کا رونا رو رہی ہے۔مسجد اقصی اور بابری مسجد اپنی آزادی کی بقا کےلیے کسی مرد جری کی آس لیے راہ تک رہی ہیں لیکن ہمارے کانوں پہ جوں تک نہیں رینگتی ہے۔آج ہم نے انگریزوں سے حاصل کی گٸی آزادی کو جسے ہمارے اجداد نے خون کی ندیاں بہا کر سیراب کیا تھا اسے پھر انگریزوں کے آگے گروی رکھ رہے ہیں۔ 

ہم نے ڈالروں کی چمک دیکھ کر اپنے ملک کو اغیار کے کہنے پر دہشت گردی اور بدامنی کی اماج گاہ بنانے کی سعی لاحاصل کی۔میں قوم کو باور کرا دینا چاہتا ہوں کہ ملک کی آزادی وخودمختاری کو ڈالروں کی چمک سے داٶ پر لگانے سے کبھی نہ ملک آگے بڑھا کرتے ہیں اور نہ افراد ترقی پاتے ہیں۔ اگر ایسا ہوتا تو آج میر جعفر اور میر صادق جیسے ملک فروشوں کا نام سنہرے حروف میں لکھا جاتا مگر  انگریزوں کی غلامی میں اپنی نجات سمجھنے والے ان غداروں کا انجام تو سب کے سامنے ہے ہی مگر ” کلاٸیو کے گدھے“ جیسا خطاب بھی رہتی دنیا کےلیے ان کے سر کا تاج رہے گا اور علامہ اقبال ایسے ملک فروشوں کو یوں اوقات دکھاتے ہیں

جعفر از بنگال،صادق از دکن

ننگ دیں، ننگ ملت،ننگ وطن

         آزادی ایک انمول نعمت ہے۔اس کی خاطر لڑنے والا تاریخ میں انمول رہاہے اور اس کو بیچ کر اس کی قیمت لینے والا ہمیشہ غدار بن کر ذلیل اور رسوا  ہوا ہے۔میری دعا ہے کہ اللہ تعالی ہمیں حقیقی معنوں میں آزادی کی قدر عطا فرماٸے اور ملک پاکستان کوہمیشہ ہمیشہ کےلیے  ہمارے لیے آباد اور خوشحال رکھے۔ آمین