سبق: مجھے میرے دوستوں سے بچاؤ
پیراگراف نمبر1
اقتباس:
ایک دن دلی کے چاندنی چوک ۔۔۔۔۔۔۔۔۔۔۔ لفظ بہ لفظ لکھی جائے۔
حوالہ متن:
سبق کا عنوان: مجھے میرے دوستوں سے بچاؤ
مصنف کا نام: سجاد حیدر یلدرم
صنف: افسانہ
ماخذ: خیالستان
خط کشیدہ الفاظ کے معانی؛
مؤثر ۔۔۔۔۔ پُراثر، کارگر۔ حالتِ زار ۔۔۔۔۔ بری حالت۔
اسپیچ ۔۔۔۔۔ تقریر۔ دہرانا ۔۔۔۔۔ بار بار کہنا۔
پیرائے ۔۔۔۔۔ طرز ، ڈھنگ، طریقہ۔ بدمعاشی ۔۔۔۔۔ بدکرداری، لُچاپن۔
بےحیائی ۔۔۔۔۔ بےغیرتی، بےشرمی۔ مسخ کرنا ۔۔۔۔۔ بگاڑنا، تباہ کرنا۔
صدا ۔۔۔۔۔ آواز۔ قسیُّ القلب ۔۔۔۔۔ سنگ دل۔
لفظ بہ لفظ ۔۔۔۔۔ پوری کی پوری۔
سیاق و سباق:
تشریح طلب اقتباس درسی سبق " مجھے میرے دوستوں سے بچاؤ" کا ابتدائی پیراگراف ہے۔ اس کا سیاق و سباق یہ ہے کہ مصنف دلی کے چاندنی چوک میں موجود ایک فقیر کے حوالے سے بتاتا ہے کہ وہ اپنی رٹی رٹائی تقریر لوگوں کو سنا کر بھیک مانگ رہا تھا۔ وہ کہتا تھا کہ میں بدنصیب ہوں اور آفت کا مارا سات بچوں کا باپ ہوں۔ اپنے وطن جانا چاہتا ہوں۔ کوئی میری مدد نہیں کرتا۔ میرا کوئی دوست نہیں۔ میں غریب الوطن ہوں۔
تشریح :
سجاد حیدر یلدرم اردو ادب کے نامور مصنف اور افسانہ نگار تھے۔ان کے افسانوں میں رومانیت کا رنگ غالب ہوتا ہے اور یہ انشائے لطیف کا بھی عمدہ نمونہ ہیں۔ ایسا ہی ان کا افسانہ "مجھے میرے دوستوں سے بچاؤ" ہے جس میں وہ اپنے مخلص دوستوں سے عاجز نظر آتے ہیں اور انھیں ہر صورت چھوڑ دینے کے درپے ہیں۔
تشریح طلب اقتباس میں مصنف ایک فقیر کا حال بیان کرتا ہے کہ دلی کے چاندنی چوک سے گزرنے کے دوران میں نے ایک فقیر کو دیکھا جو بڑے پُر اثر انداز سے لوگوں کو اپنی طرف متوجہ کرنے کی کوشش کرکے انھیں اپنی خستہ حالی سے آگاہ کر رہا تھا۔ وہ پیشہ ور بھکاری کی طرح ایک متاثرکن اور درد بھری تقریر یاد کیے ہوئے تھا جسے وہ لوگوں کے سامنے بیان کرکے ان کی ہمدردی حاصل کرنے کی کوشش کر رہا تھا۔ وہ ہر دو تین منٹ کے بعد رٹے رٹائے الفاظ دہرا دیتا تھا۔مصنف کہتا ہے کہ اس کا اس طرح درد بھری آواز میں اپنی بات کو بار بار بیان کرکے لوگوں کو اپنی طرف متوجہ کرنے کا انداز مجھے ایسا خاص محسوس ہوا کہ میں اس کی لگائی جانے والی صدا دلچسپی لے کر سننے کےلیے ٹھہر گیا۔
مصنف اس فقیر کا حلیہ بیان کرتے ہوئے کہتا ہے کہ وہ بہت دراز قد تھا ۔اس کا موٹاتازہ جسم اس کی صحت مندی کو عیاں کر رہا تھا۔ وہ کسی لحاظ سے مجبور اور بےبس نظر نہ آتا تھا۔ اس کا چہرہ بھی کافی خوب صورت تھا لیکن اس نے غربت کی آڑ لے کر اسے اپنے نکمے پن ، بےحیائی ، بےعزتی اور بدمعاشی سے بگاڑا ہوا تھا۔ جیسا کہ شاعر کہتا ہے؛
؎ عقل مند کو بےعقل بنا دیتی ہے غربت
خوب صورت کو بدصورت بنا دیتی ہے غربت
اس کا خوب صورت اور اچھا چہرہ بھیک مانگنے جیسی قبیح حالت میں انتہائی برا لگ رہا تھا اس وجہ سے بےغیرتی اور بےشرمی اس کے چہرے سے نمایاں ظاہر ہو رہی تھی۔ اس نے ایسا روپ اس لیے اختیار کیا ہوا تھا کہ لوگ اس پر ترس کھا کر اسے بھیک دینے کےلیے رضامند ہوں مگر بھیک مانگنے کا یہ طرز دنیا و آخرت دونوں کےلیے انسان کی خوب صورتی بگاڑنے کا سبب بنتا ہے اور اس نے اپنے خوب صورت چہرے کو بےحیائی سے بگاڑا ہوا بھی تھا ۔ حدیث مبارکہ ہے؛
" لوگوں کے سامنے ہاتھ پھیلانے والا روز قیامت اس حالت میں آئے گا کہ اس کے چہرے پر گوشت کا ٹکڑا نہ ہوگا"۔ (صحیح مسلم)۔
آخر میں مصنف اس فقیر کی درد بھری آواز کے متعلق بیان کرتا ہے کہ میں اس قدر سنگ دل نہیں ہوں کہ اس کی صدا کو مختصر بیان کر دوں کیونکہ اس کی لوگوں کو متوجہ کرانے کی غرض سے لگائی جانے والی اور بار بار دہرائی جانے والی صدا اس لائق ہے کہ اسے پوری کی پوری آپ کے سامنے رکھی جائے اور اس میں معمولی سی بھی تحریف نہ کی جائے۔
No comments:
Post a Comment